Wɩɩsɛ há zɔ́kɛ́ Sodomi rɩ́ Gɔmɔɔrɛ wɩ́ɛ́
19
1 Malɩ́kawa ná bɛllɛ há mʋ́ɛ́ peri Sodomi gbaŋ, rɩ Lɔtɛ lɩ́ɔ́ ké Sodomi dánnʋɔ mɛ́. Ʋ há ná nɩɛ ná bɛllɛ rɩ ɓaá kó, ʋ ísó mʋ́ céŋwó, a ɓírmi a kánʋ́ sɩ́ɛ́ cú tíé. 2 Ká bʋlɛ́: «Ŋ nyúútɩ́náwa, ɩ́ cʋ́rɛ ko zʋʋ cɔ́ŋ jaa mɛ́; rɩ́wɔ́ a nyii pɛ́ɩ́wa rɩ́ɩ́wa sɛ́sɩ́wa naasɛ ká pɛ́, a cɔŋ fól isi a daarɛ aá mʋ́ɩ́wa dɩmʋ́ɩ́.» Ɛ́ nɛ́ ɓa sɛ́: «Aɩ́, á sɩ́ cɔ pʋmmɔ, nɩɛ náŋá dɩcémi.» 3 Amá Lɔtɛ háárɩ́wɔ́ mɛ́ wérí, ɓa bɔl ká mʋ́ zʋ́ʋ́ jaa. Ʋ a ɓɩdííli wérí, anɛ cana, a wasɛ sɩbʋ́rtóó dɩpɛ́ŋ hé a pɔ́wɔ́, ɓa dí.4 Ɓa ha wɩ dóŋ pɩ́nɛ́, rɩ Sodomi báála kúó góŋ Lɔtɛ jaa; tɔ́ɔ́ ná heŋbiwafɛlɛ rɩ́ bánɩ́ɩ́náwa wuu. 5 Ɓa yɩ́rɛ Lɔtɛ a bʋ́lʋ́ rɩ́ bʋlɛ́: «Báála ná há kúé zʋ́ɩ́ jaa tɩ́taŋ né ɓa mɩŋ nɛɛ́? Lɩ́sɩ́wɔ́ párá, ráá pɩ́ŋwɔ́.» 6 Ɛ́ nɛ́ Lɔtɛ ko lɛ ká kánʋ́ dánnʋɔ tɔ́, ká cɛ́ dánnʋɔ mɛ́. 7 A bʋ́lwɔ́ rɩ́ bʋlɛ́: «Ŋ nɩwere, ɩ́ sɩ́ wɩ́tɔk né duo á. 8 Ɩ́ ná, ŋ kéŋ tolé bɛllɛ ha há wɩ báála wɩ́ɛ́ ɛ̃, ɩ́ lo ríŋ káŋwɔ́ lɩɩ pɛ́ɩ́wa rɩ́ɩ́wa ɛ́ɩ́wa há có ɛ́ arɩ́wɔ́. Amá báála nyáŋ é, ɩ́ sɩ́wɔ́ wɩ́ɩ́ wuu á, ŋ jaa nɩhʋɔra nɛ́.» 9 Ɛ́ nɛ́ ɓa ɓɛ Lɔtɛ mɛ́ bʋlɛ́: «Kaa tuu lɛ, ɩ má nɩhʋ́ɔ́r aá ja rɩ́ɩ́ mákrá. Á sɩ́ bɛ́ŋsɩ́ kɩ́llɩ́wɔ́.» Ká mʋ́ ka Lɔtɛ yiki rɩ́ dóé, ká mʋ́ rɩ́wɔ́ pánnɛ boro. 10 Malɩ́kawa ná bɛllɛ de cɔ́ Lɔtɛ nɛ́sɛ mɛ́, a kaa pɔsɛ hé jaa sɩɛrʋ ká ka dánnʋɔ tɔ́. 11 Ká de pi nyʋ́mmʋ hé Sodomi báála ná há cɛ́ dánnʋɔ mɛ́, a pɔ́wɔ́ heŋbie ká zɛ́ yákwɔ́ nɔhɔ̃́ mɛ́, ɓa wuu nyʋmmɛ a báá wɩ dánnʋɔ dɩhɩ̃́ ɛ̃. 12 Ká malɩ́kawa ná bɛllɛ sɩɛ́ bʋl Lɔtɛ rɩ́ bʋlɛ́: «Nɛrɔ ná wuu há kɛ́ɩ́ nɩtɩ́ná a mɩŋ rɛɛ́, a rɩ́wɔ́ wuu lɛ tɔ́ɔ́ né mí: ɩ bɛlɛ, ɩ tolé, a rɩ́wɔ́ báláwa. 13 Bee wɩ́ɛ́ ɛ́ tɔ́ɔ́ nɩɛ wɩ́bɔmɔ wɩ́ɛ́ zɩ́nɔ́ yakɛ Wɩɩsɛ mɛ́, ɛ́ nɛ́ ʋ tʋ́ŋrá ráá ko zɔ́kwɔ́ tɔ́ɔ́.» 14 Ɛ́ nɛ́ Lɔtɛ lɩɩ gʋɔrɛ bʋ́lʋ́ tolé báláwa rɩ́ bʋlɛ́: «Ɩ́ fá lɛ tɔ́ɔ́ né mí, bee wɩ́ɛ́ Wɩɩsɛ sɩ́ zɔ́kʋ́.» Amá ʋ tolé báláwa ná bɩ́ɩ́nɔ́ rʋʋ gbé ní. 15 Tɩ́tapʋlla, malɩ́kawa ná haarɛ Lɔtɛ mɛ́ a bʋlɛ́: «Kánɩ́ háálɔ, a kɛ́sɩ́ tolé nyáŋ bɛllɛ, rɩ́ɩ́wa lɩɩ col, a makɛ rɩ́ɩ́wa sɩ́ tɩ́ŋ sʋsɛ wɩ́bɔŋ'aara sʋʋ.» 16 Lɔtɛ cɛ́ aá ziemi. Ɛ́ nɛ́ malɩ́kawa ná cɔ́ʋ́ nɛ́sɛ mɛ́, a kánʋ́ rɩ́rʋ́ háálɔ rɩ́rʋ́ tolé, a kaa lɛ tɔ́ɔ́ har rɩ́ tá. Wɩɩsɛ há wɩ có rʋʋ sʋ́wɔ́ wɩ́ɛ́. 17 Ɓa há kéŋwó lɛ tɔ́ɔ́ har rɩ́ ɛ́, malɩ́kawa ná nɔ́ŋɔ bʋ́l Lɔtɛ rɩ́ bʋlɛ́: «Fá, a makɛ rɩ́ɩ́ lɛ́ɩ́ mɩɩsɛ. Sɩ́ bɩ́rɩ́ dɛllɛ har rɩ́, sɩ́ laka rɛɛ́ cɩ́nʋ́, ká fá zɛ́ paalɔ daha, rɩ́ɩ́ sɩ́ sʋ́wʋ́.» 18 Ɛ́ nɛ́ Lɔtɛ sɛ́: «Ɛ́ wɩ wo, Nyuutɩna. 19 Ɩ mákɩ́ sawér páŋ a lo ŋ ná nyúwér má, a ná waana má, amá ŋŋ́ sʋlɩ́ rɛ́, ŋ wɩ paalɔ né wuo fá aá zɛ́ rɩ nabɔmɔ wɩ́ŋ púé, rɩ́ sʋʋ kánɩ́ŋ. 20 Ná tɔ́wie né, ʋ dɩhɩ̃́ wɩ bol rɩ́ fá mʋ́ hullé; lo ríŋ fá mʋ́ ráŋ a ná waana. Tɔ́wíé rá rɛ́?» 21,22 Ɛ́ nɛ́ malɩ́ka ná sɛ́: «Óó! Fá kɩ́kɛ́lɛ́ zʋ ráŋ a lɛ́ɩ́ tɩɩ. A tɩ́ŋɩ́ wɩ́ɛ́, ŋ wɩ ɛ́ tɔ́ɔ́ mɩ́ɩ́ tɩkɛ, ŋ wɩ wɩ́ɩ́ wuu a, rɩɩ wɩ ráŋ péré.» Ɛ́ wɩ́ɛ́ nɛ́ ɓa ka ɛ́ tɔ́ɔ́ aá yɩ́rɛ Sʋarɛ. 23 Wɩɩsɛ kúó aá poŋ, rɩ Lɔtɛ pérí Sʋarɛ. 24 Dɩtennitoo sɩɛ́ lo jirwíí há kéŋ níŋ lɛ bána rɩ́ tuwi anɛ duóŋ, a waasɛ Sodomi rɩ́ Gɔmɔɔrɛ. 25 A ka ɛ́ tɔ́nɛ bɛllɛ rɩ́wɔ́ kílo wuu vúkmi, a zɔkɛ nɩbííne rɩ́ tuuni wuu. 26 Lɔtɛ háálɔ bɩ́rɛ́ dɛllɛ har rɩ́, a bɩrmɛ yɛdɔ́wɩ́. 27 Abɩrahaŋ cɔŋ fól isi a mʋ́ dɩhɩ̃́ ná Wɩɩsɛ há kúé cɛ́ bʋl wɩ́ɛ́ ʋ rɩ́. 28 Ʋ bél Sodomi rɩ́ Gɔmɔɔrɛ cɔɔ rɩ́, arɩ́ tɔ́nɛ ná wuu há mɩ́ŋwɔ́ laka polo nʋɔ, rʋʋ ná nyʋɔsɛ há ísé ráŋ, aá zɛ́ bána, anɛ níŋ háá dí jaa, nyʋɔsɛ lɩ́lɛ. 29 Wɩɩsɛ há zɔ́kɛ́ Lɔtɛ dɩmɩnɩ́ kílo tɔ́nɛ ná, ʋ bɩ́ɩ́nɛ́ Abɩrahaŋ wɩ́ɛ́, a ka Lɔtɛ lɩ́sɛ ká nyɩkɛ ɛ́ tɔ́nɛ.
Lɔtɛ rɩ́rʋ́ tolé wɩ́ɛ́
30 Héwíŋ há kéŋ Lɔtɛ, ʋ wɩ Sʋarɛ mɛ́ kéne có, ɛ́ nɛ́ ʋ kɛ́sʋ́ tolé bɛllɛ a zɛ́ mɩŋ paalɔ daha, ɓaá cɔ paalɔ bʋɔ sɩɛrʋ. 31 Ɛ́ nɛ́ kal oro, tolé ná máálá bʋ́lʋ́ maábio rɩ́ bʋlɛ́: «Á áná nɩ́ɩ́nɔ́ ká bál má tórá dɩmɩnɩ́ né, rʋ́ʋ́ járá anɛ ɛ́ báála háá ja háála. 32 Ko rá pi dɩvɛ́ŋ párá áná rʋ́ʋ́ nyɔɔ buki ráá zʋʋ pɩ́nʋ́ rɩ́, a lʋl bɛlɛ, rʋ́ʋ́ duo sɩ́ yʋ́ksʋ́.» 33 Ɓa ɓɩɛ́na a ɓa áná nyɔ dɩvɛ́ŋ a buki, ká máálá zʋʋ pɩ́nʋ́ rɩ́ ɛ́ tɩ́taŋ, kɔ́ʋ́ wɩ ɛ̃. Lɔtɛ wʋ́ʋ́ toló há zʋ́ʋ́ basa tɛ́ŋ ná mɛ́ ɛ̃, ʋ wʋ́ʋ́ há lɛ́ tɛ́ŋ ná mɛ́ ɛ̃. 34 Tɔ́ɔ́ pʋl, máálá ná baa bʋl maábio rí bʋlɛ́: «Ŋ nɛ́ die zʋ́ɛ́ pɩ́ŋrá áná rɩ́, á zaa baa pɔ́ʋ́ dɩvɛ́ŋ rʋ́ʋ́ nyɔ a buki ká rɩ́ɩ́ má baa zʋʋ pɩ́nʋ́ rɩ́ tɩ́taŋ né, ráá ja duo párá áná.» 35 Ɓa baa a ɓa áná nyɔ dɩvɛ́ŋ a buki, ká maábio má zʋʋ pɩ́nʋ́ rɩ́ kɔ́ʋ́ wɩ ɛ̃; ʋ wɩ tɛ́ŋ ná mɛ́ toló há zʋ́ɛ́ pɩ́nʋ́ basa mɛ́ ɛ̃, ʋ wʋ́ʋ́ há lɛ́ tɛ́ŋ ná mɛ́ ɛ̃. 36 Ɛ́ nɛ́ Lɔtɛ tolé ná bɛllɛ wuu kɛsɛ puusi arɩ́wɔ́ áná. 37 Máálá ná ko lʋl heŋbóle a pɔ́ʋ́ yɩr: Mɔwabɛ. Ʋ nɛ́ ká nɩɛ ná ɓa zaa háá yɩ́rɛ Mɔwabitiwa naabál. 38 Ɛ́ nɛ́ maábio ná má ko lʋl heŋbólé a pɔ́ʋ́ yɩr: Bɛnammɩ. Ʋ má nɛ́ ká nɩɛ ná ɓa zaa háá yɩrɛ Amonitiwa naabál.