Wɩɩsɛ wɩ́bilí ná malla
17
1 Abɩraŋ há kúé ka bɩŋsɛ mɛɛ́sɩbaná rɩ́ fí rí nɛ́mɛ́, Wɩɩsɛ kúó tuwi bʋ́lʋ́ rɩ́ bʋlɛ́: «Ŋ nɛ́ ká Wɩɩsɛ ná há kéŋ dóé wuu. Zɩ́mɩ́ tɩɩ kanɛ́, a a nɩtaŋá ŋ sɩ́ɛ́ mɛ́ wuu. 2 Ŋ sɩ́ bil nʋtʋmɛ rʋ́ʋ́ áŋ rɩ́rɩ́ pɛ́kɛ wɩ́ɩ́, ká rɩ́ŋ a rɩ́ɩ́ duo pul wérí, rɩ́wɔ́ sɩ́ɩ́ dunɩɛ wóllí dɩɩsɛ.» 3 Abɩraŋ tuwi ɓírmi a ka sɩ́ɛ́ cú tíé, ká Wɩɩsɛ ha bʋ́lʋ́ rɩ́ bʋlɛ́: 4 «Ná nʋtʋmɛ ná há ká wɩ́ɩ́ ŋ rɩ́rɩ́ pɛ́kɛ, ɩ sɩ́ a nɩbííne duó duówa ɓɩkana naabál. 5 Ɓa báá wɩ́ɩ́ kaa yɩ́rɛ Abɩraŋ, ɓa sɩ́ yɩ́yɩ́rɩ́ Abɩrahaŋ, bee wɩ́ɛ́ ŋ sɩ́ a rɩ́ɩ́ a nɩbííne duó duówa ɓɩkana naabál. 6 Ŋ sɩ́ a rɩ́ɩ́ pul kɩ́ŋkáŋ rɩ́ duó duówa lɩ́ɩ́, rɩ́ kuóre má tɩɩ lɩ́ɩ́. 7 Nʋtʋmɛ né ŋ há bílé pɛ́ɩ́ nyɛ, ʋ waá tá. Ʋ sɩ́ tɩ́ŋɩ́ mɛ́ a lɩɩ tɩ́ŋɩ́ bɛlɛ rɩ́wɔ́ nihẽ má nihẽ mí, a kaá mʋ́ wuu tokó toó. Ŋ sɩ́ ɛ́ɩ́ Wɩɩsɛ, a ɛ́ɩ́ duo nɩɛ má wuu Wɩɩsɛ, rɩɩ nɛ́ sʋ́wɛ́ má. 8 Tíé né ɩ zaa há kénú daha nyɛ anɛ nɩhʋ́ɔ́r, Kanaŋ tíé né wuu, ŋ sɩ́ púú pɛ́ɩ́ rɩ́rɩ́ dunɩɛ. Ɩ́ sɩ́ tɩ́llʋ́ a kaá mʋ́ wuu, ká rɩ́ŋ ɛ́ɩ́ duo wuu Wɩɩsɛ.» 9 Ká Wɩɩsɛ ha súúri bʋlɛ́: «Ɩ é, zíl nʋɔ ná ŋ há tɛ́ɛ́ pɛ́ɩ́, ɩ rɩ́rɩ́ duo nɩɛ, woó woówa wuu. 10 Ná ɛ́ ná ɩ rɩ́rɩ́ duo nɩɛ há sɩ́ ka nʋtʋmɛ ná há mɩ́nɩ́ŋ rɩ́rɩ́wa pɛ́kɛ: báálɔ é wuu mɔhɔ̃́ rɩ́wɔ́ cókú pɛŋ. 11 Ɩ́ pɛnɛ ná conné ní káŋ rɩ́rɩ́wa nʋtʋmɛ ná malla. 12 Heŋbóle é wuu, ɩ́ fɩ́ɩ́lʋ́ ʋ tápʋlɛ córí kal. arɩ́ yósi wuu, ɓa ná ɓa há lʋ́lɩ́ jaa mɛ́, arɩ́ ɓa ná há ká nɩyɔwɛ́ wuu, ɩ́ cónníwó pɛnɛ. Ɩ́ deé tʋŋ ɛ́ wuu. 13 Yómo ná ɓa há lʋ́lɩ́ jaa mɛ́ arɩ́ ʋ ná ɩ há yɔ́wɛ́, ɩ́ cónníwó pɛnɛ, a makɛ rɩ́ŋ nʋtʋmɛ ná malla mɩ́nɩ́wa tɛŋ mɛ́ bɩná rɩ́ bɩná wuu. 14 Heŋbóle pɛŋkɛnɔ tɩ́na, rʋʋ nɛ́ wʋ́ʋ́ pɛŋ cóké, rɩ́wɔ́ lɩ́sʋ́ ɩ duo sɩɛrʋ, ʋ há wɩ́ŋ nʋtʋmɛ ná zílé wɩ́ɛ́.» 15 Ká Wɩɩsɛ baa bʋl Abɩrahaŋ rɩ́ bʋlɛ́: «Báá sɩ́ɩ́ háálɔ yɩr Sarayi ná yɩ́rʋ́; ʋ yɩr nɛ́ sɩ́sɛ́nyɛ ká Saara. 16 Ŋ sɩ́ hóú nyúú bárka, ŋ sɩ́ a rʋ́ʋ́ lʋl bio pɛ́ɩ́. Ŋ sɩ́ hóú nyúú bárka, rʋ́ʋ́ a duó duówa ɓɩkana wuu nahã́. Tɔ́kana rɩ́ kuóre sɩ́ lʋ́ʋ́ duo sɩɛrʋ.» 17 Ɛ́ nɛ́ Abɩrahaŋ baa tuwi ɓírmi, a kánʋ́ sɩ́ɛ́ cú tíé, a mɔŋ, ká bʋ́lʋ́ sɩɛrʋ rɩ́ bʋlɛ́: «Ŋ bɩŋsɛ nɛ́ zɔlɔ, ŋ báá sɩ́ wólli bíí lʋl? Ŋ háálɔ Saara má bɩŋsɛ nɛ́ mɛɛ́sɩbaná rɩ́ fí, ʋ é báá wo bíí aá lʋl?» 18 Kɔ́ʋ́ sɩɛ́ bʋl Wɩɩsɛ rɩ́ bʋlɛ́: «Rɩ́ Ɩsɩmayɛlɛ é ha wa rɩ́ɩ́ cóllú, ʋ mɔhɔ̃́.» 19 Ɛ́ nɛ́ Wɩɩsɛ sɛ́: «Aɩ́! Ɩ háálɔ Saara nɩ́ɩ́ á rʋ́ʋ́ lʋl heŋbóle pɛ́ɩ́, rɩ́ɩ́ hóú́ yɩr, Ɩzakɛ. Ŋ sɩ́ lo ríŋ nʋtʋmɛ mɩ́nɩ́ŋ rɩ́rʋ́ pɛ́kɛ a rɩ́rʋ́ duo nɩɛ pɛ́kɛ, rʋʋ nɛ́ sʋ́wɛ́ má. Ɛ́ nʋtʋmɛ sɩɛ́ waá giri. 20 Ká Ɩsɩmayɛlɛ ná má wɩ́ɛ́ ɩ há bʋlɛ́, ŋ nɩ́ɩ́ sʋlɛ́ rɛ́. Ŋ sɩ́ hóú nyúú bárka, rʋ́ʋ́ lʋla pul kɩ́ŋkáŋ. Kuóbɛlɛ fí rí bɛllɛ sɩ́ lʋ́ʋ́ duo nɩɛ sɩɛrʋ, a dí kuorí, ká rʋ́ʋ́ a duo ɓɩzeno naabál 21 Amá bio ná Saara háá á rʋ́ʋ́ lʋl wɩ́ɩ́rɛ́ nyɛ cɛ́rɛ mɛ́ a pɛ́ɩ́, Ɩzakɛ ná, ŋ rɩ́rʋ́ nɛ́ sɩ́ ka nʋtʋmɛ.» 22 Wɩɩsɛ há bʋ́l ɛ́ pá Abɩrahaŋ ko tenni, ʋ ísó col ká tɔ́ʋ́. 23 Ɛ́ kal wuu sɩɛ́, Abɩrahaŋ ísó kánʋ́ bio Ɩsɩmayɛlɛ, a kɛ́sʋ́́ jaa báála wuu, yósi ná ɓa há lʋ́lʋ́ jaa mɛ́, arɩ́ ɓa ná ʋ há yɔ́wɛ́ wuu, a cónníwó pɛnɛ anɛ ɛ́ Wɩɩsɛ há sʋ́ʋ́ a. 24,25 Abɩrahaŋ fa kéŋ bɩŋsɛ mɛɛ́sɩbaná rɩ́ fí rí nɛ́mɛ́ nɛ́, ʋ bio Ɩsɩmayɛlɛ má ka bɩŋsɛ fí rí botoro, ká cónníwó pɛnɛ. 26 Ɛ́ kal tɩɩ nɛ́ Abɩrahaŋ rɩ́rʋ́ bio Ɩsɩmayɛlɛ cónníwó pɛnɛ, 27 ɓa rɩ́rʋ́ jaa báála ná ʋ há yɔ́wɛ́, rɩ́wɔ́ ná ɓa há lʋ́l ráŋ wuu.