Ɩsɩmayɛlɛ lʋlɛ́ wɩ́ɛ́
16
1 Abɩraŋ háálɔ Sarayi fa wɩ bíí wuu lʋ́lɛ́ pɔ́ʋ́. Amá ʋ fa kéŋ tolyómo oro, ʋ yɩr nɛ́ Agaarɛ a lɛ Ezipiti. 2 Ɛ́ nɛ́ ʋ sɩɛ́ bʋl Abɩraŋ rɩ́ bʋlɛ́: «Ná! Wɩɩsɛ wɩ lóí ŋ lʋl bio. Zʋʋ pɩ́nɩ́ŋ yómó né rɩ́; nɛ́ŋ wɩ wɩ́ɩ́ ɛ̃, ʋ sɩ́ wólli bíí lʋl rɩ́ŋ tɩ́llʋ́.» Ɛ́ nɛ́ Abɩraŋ sáŋʋ́ háálɔ cáánɛ. 3 Sarayi sɩɛ́ kánʋ́ tolyómo Agaarɛ pɔ́ʋ́ bála Abɩraŋ, ʋ pii mákʋ́ háálɔ. Ɛ́ tɛ́ŋ mɛ́, rɩ Abɩraŋ há mʋ́ɛ́ ké Kanaŋ mɛ́, bɩŋsɛ fí ní. 4 Abɩraŋ zʋʋ pɛ́ Agaarɛ, ʋ ka puo. Ʋ há kúé ná rʋʋ kéŋ puo, ɛ́ nɛ́ ʋ isi aá lɔ́rʋ́ jaamaá. 5 Ɛ́ nɛ́ Sarayi bʋl Abɩraŋ rɩ́ bʋlɛ́: «Ɩ nɛ́ tɛ zome nyáŋ toló né há píé aá tʋ́ksɩ́ŋ. Ŋ nɛ́ keníŋ yómo pɛ́ɩ́, ʋ zaá bel rʋʋ kéŋ puo ʋ isi aá lɔ́rɩ́ŋ. Wɩɩsɛ nɛ́ káŋ rɩ́ rɩ́ pɛ́kɛ sarɩ́yadííro.» 6 Ɛ́ nɛ́ Abɩraŋ sɛ́: «Ɩ yómo ní, ɩ há cóú ɛ́ wuu, a, ʋ mɩ́nɩ́ nɛ́sɛ mɛ́.» Ɛ́ nɛ́ Sarayi kánʋ́ aá bɛŋsɛ, ʋ lɩɩ fá kɛ́kʋ́ mɛ́. 7 Wɩɩsɛ malɩ́ka ko cémú dɩhɩ̃́ oro nyii háá bulé, gɩrbétéke mí; ɛ́ dɩhɩ̃́ mɩŋ Suur ŋmɛ́nɔ laka nɛ́. 8 A bɔ́sʋ́ bʋlɛ́: «Sarayi yómo Agaarɛ, ɩ lɛ́ nɛɛ́ a ko aá mʋ́ nɛɛ́?» Ɛ́ nɛ́ ʋ sɛ́: «Ŋ lɩ́ɔ́ fá aá kɛ́kɩ́ŋ jaamaá Sarayi mí ní.» 9 Ɛ́ nɛ́ Wɩɩsɛ malɩ́ka sɛ́: «Bɩrmʋ́ɩ́ jaamaá rɩ́ a múúrí tɩɩ pɔ́ʋ́. 10 Wɩɩsɛ sɩ́ a rɩ́ɩ́ duo nɩɛ pul, rɩ́wɔ́ sɩ́wɔ́ wóllí dɩɩsɛ.» 11 Wɩɩsɛ malɩ́ka baa bʋlɛ́:«Ná puo ní ɩ ka nyɛ, ɩ sɩ́ lʋl heŋbóle; ɩ sɩ́ pɔ́ʋ́ yɩr Ɩsɩmayɛlɛ, bee wɩ́ɛ́ Wɩɩsɛ nɩ́ɩ́ sazɔkɔ́ liŋó. 12 Ɛ́ bio sɩ́ nɛ kokúme há pɩ́ɩ́rɛ́ a bɩrmɛ baka omo; ʋ sɩ́ cɛ́ nɩɛ wuu mí, ká rɩ́ nɩɛ má wuu cɩ́nʋ́ mɛ́. Ʋ sɩ́ lɩɩ cíkú zʋ́ɔ́ ʋ dʋŋɔ.»
13 Agaarɛ cɛ́ bʋ́bɔ́sʋ́ tɩɩ: «Wɩɩsɛ ná háá náŋ nɛ́ ŋ ná nyɛ?» Ɛ́ nɛ́ ʋ pá Wɩɩsɛ ná há bʋ́l wɩ́ɛ́ ʋ rɩ́ yɩr a bʋlɛ́: «Ɩ nɛ́ ká Wɩɩsɛ ná háá náŋ.» 14 Ɛ́ nɛ́ tɛ ɓa ka ɛ́ vɩ́lɛ́ aá yɩ́rɛ Lahayɩ'royi ʋ mʋ́l nɛ́ ká: Nɩwómmi náŋ vɩ́lɛ́. Ʋ mɩŋ Kadɛsɛ rɩ́ Bɩrɛdɛ pɛ́kɛ nɛ́. 15 Agaarɛ lʋl heŋbóle pá Abɩraŋ; ɛ́ nɛ́ ʋ pɔ́ʋ́ yɩr Ɩsɩmayɛlɛ. 16 Abɩraŋ fa kéŋ bɩŋsɛ mɛɛ́sɩbaná rɩ́ balgo ní, tɛ́ŋ ná mɛ́ Agaarɛ há lʋ́l Ɩsɩmayɛlɛ pɔ́ʋ́.