Wɩɩsɛ há tá nʋɔ ná pá Abɩraŋ
15
1 Ɛ́ wɩ́ɛ́ há dáárɛ́, Wɩɩsɛ tɩ́ŋ wɩ́muulináálɛ mɛ́ a bʋl Abɩraŋ mɛ́, a bʋlɛ́: «Sɩ́ ló rí héwíŋ kánɩ́; ŋ nɛ́ ká kɛ́rɛ a pɔ́ɩ́ mɛ́, ŋ sɩ́ dí zilé ɓɩzeno a pɛ́ɩ́.» 2 Ɛ́ nɛ́ Abɩraŋ sɛ́: «Nyuutɩna ŋ Wɩɩsɛ, beé zilé ɩɩ́ ja rɩ́ɩ́ dí páŋ? Ŋ wɩ bíí kené, ŋ tʋtʋnnɔ Ɛlɩɛzɛrɛ há lɛ́ Damasɛ, ʋ nɩ́ɩ́ á rʋ́ʋ́ tɩ́llɩ́ŋ liwe.» 3 Abɩraŋ baa súúri bʋlɛ́: «Ɩ wɩ́ŋ duo pɛ́, nɛrɔ ná ɓa há lʋ́lɩ́ŋ jaa mɛ́, ʋ nɩ́ɩ́ á rʋ́ʋ́ tɩ́llɩ́ŋ liwe.» 4 Ɛ́ nɛ́ Wɩɩsɛ bʋl pɔ́ʋ́ bʋlɛ́: «Aɩ́! Ɛ́ báálɔ rá waá a rʋ́ʋ́ tɩ́llɩ́ liwe, ɩ tɩɩ bilʋlɩ́ nɩ́ɩ́ ísí tɩ́llɩ́ liwe.» 5 Ká Wɩɩsɛ a ʋ lʋ́ʋ́ táŋtɛ mɛ́ a cɛ́ pʋmmɔ, ʋ bʋ́lʋ́ rɩ́ bʋlɛ́: «Bel bána rɩ́, dɩɩsɛ caŋwʋllɛ wuu, rɩɩ nɛ́ wuolé.» Ká súúri pɔ́ʋ́ bʋlɛ́: «Ɩ duo nɩɛ á rɩ́wɔ́ káŋ mɔ ɛ́ nɛ́.» 6 Abɩraŋ la Wɩɩsɛ dí, ɛ́ nɛ́ Wɩɩsɛ pi taŋá pɔ́ʋ́. 7 Ká bʋ́lʋ́ rɩ́ bʋlɛ́: «Ŋ nɛ́ ká Wɩɩsɛ ná há ɛ́ɛ́ ɩ lɛ Uuri ná há mɩŋ Kalde mí, a ko rɛɛ́ rɩ́ŋ pi tíé né pɛ́ɩ́ rɩ́ɩ́ tɩ́llʋ́.» 8 Ɛ́ nɛ́ Abɩraŋ bɔsɛ bʋlɛ́: «Nyuutɩna Wɩɩsɛ, ŋŋ́ á rɩ́ŋ tɩŋ beé mí, a zɩŋ rɩ́ŋ sɩ́ tɩ́llɛ tíé né?» 9 Ɛ́ nɛ́ Wɩɩsɛ sɛ́: «Mʋ ja bɩŋsɛ botoro nɔbɩra, bɩŋsɛ botoro bʋmaá, bɩŋsɛ botoro peɓala arɩ́ kʋ́ma rɩ́ kuókʋ́ma a kaa ko.» 10 Abɩraŋ sɩɛ́ mʋ́ ja ɛ́ pʋsɛ wuu kaa ko. A kʋ́sɩ́wɔ́ wuu caksɛ bɛllɛ bɛllɛwa, ɓaamɔnáŋáwa mɛ́, a ka cɔrʋ ná bil caasɛ náŋá. Ʋ wɩ kʋ́sɛ ná é kʋ́sɛ́ caksɛ. 11 Duune ko tuwi pɔ́ŋ pʋsɛ ná Abɩraŋ há ɓʋ́ɛ́ daha, ʋ kiri. 12 Wɩɩsɛ há zʋ́ɛ́, tɔ́ɔ́ bíri kɩ́ŋkáŋ, héwíŋ kéŋ Abɩraŋ, kɔ́ʋ́ pɛ́ dóŋ lúŋ lúŋ. 13 Wɩɩsɛ baa bʋ́lʋ́ rɩ́ bʋlɛ́: «Zɩŋ rɩ́ɩ́ duo nɩɛ sɩ́ mʋ́ ké nɩhʋɔ́sɛ tɔ́ɔ́ oro mí; ɓa sɩ́ píwó makɛ yósi ráŋ, a a rɩ́wɔ́ ná wɩɩla bɩŋsɛ zɔwaná. 14 Ŋ sɩɛ́ sɩ́ a rɩ́ wɩɩla pérí nɩɛ ná há sɩ́ píwó makɛ yósi, ká rɩ́ɩ́ dunɩɛ nɛ́sɛ zʋ ɓɩɛ kɩ́ŋkáŋ, rɩ́wɔ́ kaa lɛ ɛ́ tɔ́ɔ́ mɛ́. 15 Amá ɩ é, ɩ sɩ́ dí tɔ́ɔ́ vɔkɛ ká sʋwɛ rɩ́ tɛŋfɩ́ɛ́l, rɩ́wɔ́ húí rɩ́ɩ́ mʋ́ɩ́ ánáwa rɩ́. 16 Ɩ duo nɩɛ woó woówa baná nyúú mí taŋa sɩ́ bɩrko rɛɛ́, tɛ́ŋ ná mɛ́ Amoritiwa wɩ́bɔmɔ há sɩ́ duki nɛ́sɛ, rɩ́ŋ kíríwó.» 17 Wɩɩsɛ há zʋ́ɛ́ tenni, tɔ́ɔ́ bíri, níŋpoo ní dé ko lɛ, arɩ́ nyʋɔsɛ, a zʋ pʋsɛ ná Abɩraŋ há kʋ́sɛ́ caksɛ pú pɛ́ksɛ mʋ́ lɛ. 18 Ɛ́ kal nɛ́ Wɩɩsɛ tá nʋɔ pá Abɩraŋ bʋlɛ́: «Tíé né wuu há pɩ́nɛ́ zʋʋ col, ŋ sɩ́ púú pɛ́ɩ́ duo nɩɛ. A pɔ́ Ezipiti mʋnaa mɛ́, a kaa mʋ́ yakɛ mʋnazeno ná ɓa háá yɩ́rɛ Ɛfɩratɛ mɛ́, ɓa pɛ́kɛ tɔ́nɛ nyáŋ wuu: 19 Kenitiwa tɔ́nɛ, Kenizitiwa tɔ́nɛ, Kadimonitiwa tɔ́nɛ, 20 Hititiwa tɔ́nɛ, Ferezɩɛ̃wa tɔ́nɛ, Refayitiwa tɔ́nɛ, 21 Amoritiwa tɔ́nɛ, Kananɩɛ̃wa tɔ́nɛ, Girigazitiwa tɔ́nɛ arɩ́ Yebusitiwa tɔ́nɛ.»