Abɩraŋ kíró la Lɔtɛ
14
1 Ɛ́ tɛ́ŋ mɛ́, Mezopotami kuóro Aŋrafɛl rɩ́ Ɛlasarɛ kuóro Arɩyɔkɛ rɩ́ Ɛlamɛ kuóro Kɛdɔlamɛrɛ arɩ́ Goyimi kuóro Tɩdalɛ, 2 ɓa ísó aá yo lal, ɓa rɩ́ Sodomi kuóro Bera, rɩ́ Gɔmɔɔrɛ kuóro Birisa, rɩ́ Adma kuóro Sɩnabɛ, rɩ́ Siboyimi kuóro Sɩmɛbɛrɛ, arɩ́ Bela kuóro; Bela ná há ká Sʋarɛ. 3 Ɛ́ kuóre bɔmmʋ́ɔ́ sɩɛ́ fa tʋ́ŋ nʋɔ mɛ́, ɓa rɩ́wɔ́ nɩɛ wuu sɩɛ́ tuwi cɛ́ Sidimi polo mí; mʋʋ ná ɓa háá yɩ́rɛ Mʋsʋwɩ, ʋ zaa tɔ́ ɛ́ polo wuu mí ní. 4 Tɛ́ŋ oro há dáárɛ́, kuóro Kɛdɔlamɛrɛ fa yóó díwó, ɓa mɩ́nʋ́ nɛ́sɛ mɛ́ bɩŋsɛ fí rí bɛllɛ. Amá bɩŋsɛ fí rí botoro nyúú mí, ɓa fa ísó nyɛl, a isi cɩ́nʋ́ mɛ́. 5 Ɛ́ nɛ́ bɩŋsɛ fí rí baná nyúú mí, Kɛdɔlamɛrɛ fa isi yɩ́rɛ kuówɩɛla ná wuu há mɩ́nʋ́ nɛ́sɛ mɛ́, ɓa mʋ́ yoo dí Refayitiwa Asɩtɛrɔtɛ Karnayimi mí, a yoo dí Zuzitiwa Haŋ mɛ́, a yo Emitiwa má dí Kiriyatayimi polo mí. 6 Ká ɓa fa zɛ́ Horitiwa mɛ́, ɓa paalɔ Seyiri daha, a kíríwó kaa mʋ́ lɛ Paraŋ, gɩrbétéke laka. 7 Ɓa sɩɛ́ fa há bɩ́rɛ́ aá col, ɓa kúó lɛ Ɛynɩmɩkɩpatɛ ná há ká Kadɛsɛ; a dí Amalɛkɛ tɩ́náwa tɔ́ɔ́ wuu, ká yoo dí Amoritiwa ná má há mɩŋ Hasatɩsɔŋ Tamarɛ mɛ́. 8,9 Sidimi polo ná mɛ́ nɛ́ sɩɛ́ Sodomi rɩ́ Gɔmɔɔrɛ rɩ́ Adma rɩ́ Siboyimi arɩ́ Bela ná há ká Sʋarɛ, ɓa kuóre isi lɩɩ céŋ Ɛlamɛ kuóro Kɛdɔlamɛrɛ, rɩ́ Goyimi kuóro Tɩdalɛ, rɩ́ Mezopotami kuóro Aŋrafɛl, rɩ́ Ɛlasarɛ kuóro Arɩyɔkɛ rɩ́wɔ́ yo lal: ɓa baná nyáŋ rɩ́wɔ́ ná bɔmmʋ́ɔ́. 10 Sodomi rí Gɔmɔɔrɛ kuóre rɩ́wɔ́ lalyoore bɔl ká fá. Gʋdrɔŋ butuonni sɩɛ́ fa káŋ ɛ́ polo sɩɛrʋ; ɓa náŋa tuwi ɓállɩ́wɔ́ sɩɛrʋ ká nɩlúúle fá zɛ́ paalɔ. 11 Bɩbara pa Sodomi rɩ́ Gɔmɔɔrɛ ɓɩɛ wuu, a kúóríwó ɓɩdííle má wuu ɓa vʋ́ʋ́ra mɛ́, a kaa lɩɩ col. 12 Abɩraŋ máálá bio Lɔtɛ má fa mɩŋ Sodomi mí ní. Ɓa pɛ́ kánʋ́ má, a pɔ́ʋ́ ɓɩɛ wuu a kaa col. 13 Ɛ́ nɛ́ nɩfáálɛ ná nɔ́ŋɔ ko hóú duosi pá Ebire báálɔ Abɩraŋ, rʋʋ fa mɩŋ Mamire tuzeŋsi laka nɛ́. Ɛ́ Mamire ká Amoriti rí, ʋ maábináŋa nɛ́ ká Ɛsɩkɔl rɩ́ Anɛrɛ; ɓa wuu botoro ká Abɩraŋ naanɩɛ nɛ́. 14 Abɩraŋ há nɩ́ɛ́ rɩ ɓa sɛ́ ɓa kenú máálá bio anɛ lal yómo kaa col, ʋ ísó yɩ́rʋ́ nɩɛ wuu hé náŋá mɛ́, a mʋ́ aá peri báála zotoro rí fí rí córí, a wuu zɩŋ lal yoe. Ɓa lɩɩ kiri kuóre ná baná har, a mʋ́ peri Daŋ. 15 A kánʋ́ nɩɛ ɓa púl púlwa, a lo tɔ́ɔ́ bíri ká ɓa de isi suki dɩŋdɔmɔ ná hé aá yo. A ŋmásɩ́wɔ́, a kiri kaa mʋ́ lɛ Hoba, Damasɛ lʋ́lɔ́ŋɛ; 16 ká lɔ́wɔ́ oŋpaalɛ́ ná wuu. A lɔ́ʋ́ máálá bio Lɔtɛ má rɩ́rʋ́ ɓɩɛ wuu, a la háála rɩ́ báála ná má wuu ɓa fa há kɛ́sɛ́.Mɛlɩsɩsɛdɛkɛ hé bárka pá Abɩraŋ
17 Abɩraŋ sɩɛ́ há yóé dí Kɛdɔlamɛrɛ rɩ́rʋ́ kuówɩɛla ná ká bɩrɛ aá ko, Sodomi kuóro lɩ́ɔ́ cémú Save polo ná há ká kuóro polo mí. 18 Ká Salɛmɛ kuóro Mɛlɩsɩsɛdɛkɛ, Wɩɩsɛ ná há kɛ onni wuu vʋk'ɔɔsɔ, ka dɩpɛ́ŋ rɩ́ dɩvɛ́ŋ ko. 19 Ʋ hé bárka pá Abɩraŋ a bʋlɛ́: «Rɩ́ Wɩɩsɛ ná há kɛ onni wuu, a a bána rɩ́ tíé, rʋ́ʋ́ hé bárka pá Abɩraŋ. 20 Ká rɩ́ píŋ pá Wɩɩsɛ ná há kɛ onni wuu, ʋ há kɛ́sɩ́ dɩŋdɔma héí nɛ́sɛ mɛ́.» Ɛ́ nɛ́ Abɩraŋ há kírí kuóre ná ká la onni ná wuu, ʋ lɩ́sɩ́wɔ́ wuu fí nyúú kere a pá ɛ́ báálɔ. 21 Ɛ́ nɛ́ Sodomi kuóro sɩɛ́ bʋl Abɩraŋ rɩ́ bʋlɛ́: «Pi nɩbííne pá ŋ ká má ka ɓɩɛ wuu.» 22 Ɛ́ nɛ́ Abɩraŋ má sɛ́: «Ŋ ɓɔ́ŋ nɛ́sɛ caasɛ Wɩɩsɛ ná há kɛ onni wuu, a a bána rɩ́ tíé; 23 ŋ ŋmɩ́ɛ́sɔ́ ŋ wɩ óŋ wuu la ɩ dɩhɩ̃́; gepúnyɛrɩ́ má tɩɩ, rɩ́ natɔwɔ vɔwɛ́ má, ŋ waá la. Rɩ́ɩ́ sɩ́ kóó bʋlɛ́: ‹Ŋ nɛ́ tɛ Abɩraŋ a ɓɩ́ɛ́ tɩ́ná.› 24 Ɓɩdííle ná ŋ heŋbiisi há díé dʋŋɔ, arɩ́ óŋ ná há ká Anɛrɛ rɩ́ Ɛsɩkɔl arɩ́ Mamire kér, ʋ nɛ́ rɩ́wɔ́ la, rɩ ɛ́ rá ŋ wɩ óŋ wuu ja.»