PÚLE 13

Abɩraŋ rɩ́ Lɔtɛ cɔ́nnɛ náŋá mɛ́

1 Ɛ́ nɛ́ Abɩraŋ lɛ Ezipiti mí, ʋ rɩ́rʋ́ háálɔ arɩ́ óŋ ná wuu há kɔ́ʋ́ óŋ, a bɩrzɛ́ tɔ́ɔ́ lʋ́lɔ́ŋɛ rɩ́ cɔɔ, ráŋ ná ɓa háá yɩ́rɛ Nɩgɛɛvɛ. Lɔtɛ ha tɩ́ŋʋ́ mɛ́. 2 Abɩraŋ fa kéŋ ɓɩɛ wérí. Ʋ fa kéŋ pʋsɛ kɩ́ŋkáŋ, a ka wárɛ rɩ́ salmɛ má kɩ́ŋkáŋ. 3 Ʋʋ́ mʋ́ cíkú táŋtɛwa rɛɛ́, a isi mʋ́ ciki rɛɛ́; a a ɛ́ wuu a lɛ Nɩgɛɛvɛ mɛ́ a mʋ́ peri Betɛl, ráŋ ná ʋ fa há lá sɩ́ɛ́ cíkú táŋtɛwa a ké, púle mí, Betɛl rɩ́ Ayi pɛ́kɛ, 4 dɩhɩ̃́ ná ʋ há má vʋk'ɔ́ɔ́sɩ́koro dʋ́ŋdʋ́ʋ̃́ mɛ́. Abɩraŋ cɛ́ ráŋ a yɩ́rɛ hé Wɩɩsɛ mɛ́.

5 Lɔtɛ há tɩ́ŋʋ́ mɛ́ ʋ má fa kéŋ pʋsɛ kɩ́ŋkáŋ: pieŋse, bʋnnɛ rɩ́ nɛsɛ a má rɩ́rʋ́ táŋtɛwa. 6 Ɓa nɩɛ rɩ́wɔ́ pʋsɛ sɩɛ́ há kánɔ́, tíé waá peri rɩ́wɔ́ hé náŋá ké. 7 Kanaŋ tɩ́náwa rɩ́ Ferezi tɩ́náwa má fa ha mɩŋ ɛ́ tɔ́ɔ́ mɛ́. Abɩraŋ pʋnʋɔla rɩ́ Lɔtɛ pʋnʋɔla isi aá na náŋá. 8 Ɛ́ nɛ́ Abɩraŋ bʋl Lɔtɛ rɩ́ bʋlɛ́: «Nɛsɛ wɩ mɔhɛ̃́ rʋ́ʋ́ mɩ́ŋrá pɛ́kɛ, nɛsɛ wɩ mɔhɛ̃́ rʋ́ʋ́ mɩ́ŋrá pʋnʋɔla pɛ́kɛ; bee wɩ́ɛ́ ŋ rɩ́ rɩ́ ká jaa rɛ́. 9 Tíé ra wɩ́ɩ́ sɩ́ɛ́ pɩ́nɛ́ nyɛ rɛ́? Á cɔ́nnɛ náŋá mɛ́. Rɩɩ mʋ́ nágʋɔ rɩ́, ŋ sɩ́ mʋ́ néduu rí, ká rɩɩ mʋ́ néduu rɩ́, ŋ sɩ́ mʋ́ nágʋɔ rɩ́.» 10 Lɔtɛ bel, a ná Zʋrdɛŋ polo há pɩ́nɛ́ a mʋ́ yakɛ Sʋarɛ mɛ́, rʋʋ fɩ́ɛ́lɔ́ anɛ Wɩɩsɛ záádɛ́, anɛ Ezipiti tíé há fɩ́ɛ́lɔ́ ɛ́. Ʋ nɩɩsɔ nɛ́ ɛ́, rɩ Wɩɩsɛ fa ha wɩ Sodomi rɩ́ Gɔmɔɔrɛ zɔ́kɛ́. 11 Ɛ́ nɛ́ Lɔtɛ bɛ́llɛ pi Zʋrdɛŋ polo, a isi pɔ́ʋ́ tɩɩ mʋ́ ké tɔ́ɔ́ mʋ́l rɩ́. Ɓa á ɛ́ nɛ́ a cɔ́nnɛ náŋá mɛ́. 12 Abɩraŋ ké Kanaŋ mɛ́ nɛ́, ká Lɔtɛ má zʋ polo nʋɔ tɔ́nɛ sɩɛrʋ a mʋ́ cíkú táŋtɛwa Sodomi laka. 13 Sodomi tɩ́náwa sɩɛrʋ fa haakɩ́, ɓa a wɩ́ɛ́ ɓɩkana zɔkɛ Wɩɩsɛ mɛ́.

14 Lɔtɛ há cɔ́rɛ́ lʋ́ʋ́ dʋŋɔ ɛ́, Wɩɩsɛ bʋ́l Abɩraŋ rɩ́ a bʋlɛ́: «Cɩ́nɩ́ dɩcɩ́nɛ ká bel tɔ́ɔ́ nyúú rí, a bel tɔ́ɔ́ mʋ́l rɩ́, a bel tɔ́ɔ́ lʋ́lɔ́ŋsɛ. 15 Tɔ́ɔ́ né wuu ɩ háá belé nyɛ, ŋ sɩ́ púú pɛ́ɩ́ ɩ rɩ́ rɩ́ duo nɩɛ a kaá mʋ́ wuu. 16 Ŋ sɩ́ a rɩ́ɩ́ duo nɩɛ pul, rɩ́wɔ́ sɩ́ wóllí dɩ́ɩ́sɩ́wɔ́ anɛ tíé nyúú kuŋkulo ɓa há wʋ́ɔ́ wuó dɩɩsɛ ɛ́. 17 Isi gʋɔrɛ cɛl tɔ́ɔ́ ná gbési rɩ́rʋ́ jɛ́l wuu, ŋ á rɩ́ ŋ púú pɛ́ɩ́ nɛ́.» 18 Abɩraŋ baa pɔ́ʋ́ tɩɩ, a cúnnú táŋtɛwa, a ko ciki Mamire tuzeŋsi bamma mʋ́l, Ɛbɩrɔŋ laka; a má vʋk'ɔ́ɔ́sɩ́koro ráŋ a pá Wɩɩsɛ.