Wɩɩsɛ yɩ́rɛ Abɩraŋ a bʋlʋ́ lʋ́ʋ́ tɔ́ɔ́ mɛ́
12
1 Wɩɩsɛ bʋ́l Abɩraŋ rɩ́ bʋlɛ́: «Lɩ́ɩ́ tɔ́ɔ́ mɛ́, lɛ ká tɛ́ɩ́ dunɩɛ, lɩ́ɩ́ áná jaa mɛ́, a mʋ́ tɔ́ɔ́ ná ŋ háá á rɩ́ŋ makɛ pɛ́ɩ́. 2 Ŋ sɩ́ a rɩ́ɩ́ duo pul kɩ́ŋkáŋ; ŋ sɩ́ hé bárka pɛ́ɩ́, ká a rɩ́ɩ́ yɩr lɛ. Nɩɛ sɩ́ tɩ́ŋɩ́ mɛ́ a náŋ bárka. 3 Ŋ sɩ́ hé bárka pá nɩɛ ná há sɩ́ hé bárka pɛ́ɩ́, ká zɔkɛ nɩɛ ná há sɩ́ zɔ́kɩ́. Ŋ sɩ́ tɩ́ŋɩ́ mɛ́ a hé bárka pá tíé nyúú duo wuu nɩɛ.» 4 Ɛ́ nɛ́ Abɩraŋ saŋ a lɩɩ col, anɛ ɛ́ Wɩɩsɛ há bʋ́lʋ́ rɩ́; Lɔtɛ má lɩɩ tɩ́ŋʋ́ mɛ́ col. Abɩraŋ kúó lɛ Haraŋ mɛ́ aá col, rʋʋ kéŋ bɩŋsɛ mɛɛ́sɩbotoro rɩ́ fí rí bɔmmʋ́ɔ́. 5 Abɩraŋ kenú háálɔ Sarayi tɩ́ŋʋ́ tɩɩ mɛ́, a pɛ́ kánʋ́ máálá bio Lɔtɛ má. Ɓa pɛ́ páwɔ́ kuóɓɩɛ rɩ́ nɩbííne ná wuu ɓa fa há kené Haraŋ mɛ́, a lɛ, a mʋ́ Kanaŋ. Ɓa sɩɛ́ va wuu a mʋ́ peri Kanaŋ. 6 A cáŋʋ́ lɛ a vaa mʋ́ peri Moore tuzeno oro Sɩsɛmɛ mɛ́. Ɛ́ tɛ́ŋ mɛ́ rɩ Kanaŋ ná nɩɛ fa mɩŋ ráŋ. 7 Wɩɩsɛ tuwi a baa bʋl Abɩraŋ rɩ́ a bʋlɛ́: «Ŋ sɩ́ pi tɔ́ɔ́ né pɛ́ɩ́ duo nɩɛ.» Ɛ́ nɛ́ Abɩraŋ isi má vʋk'ɔ́ɔ́sɩ́koro a pá Wɩɩsɛ ná há kúé lʋ́ʋ́ mɛ́. 8 Ká Abɩraŋ baa isi ráŋ, a mʋ́ Betɛl pallɛ dɩhɩ̃́, a cíkú táŋtɛwa Betɛl rɩ́ Ayi pɛ́kɛ. Betɛl mɩŋ tɔ́ɔ́ nyúú rí, ká Ayi mɩŋ tɔ́ɔ́ mʋ́l rɩ́. Abɩraŋ baa má vʋk'ɔ́ɔ́sɩ́koro ráŋ a yɩ́rɛ hé Wɩɩsɛ mɛ́. 9 Abɩraŋ válɔ́ cíkú táŋtɛwa ɛ́ nɛ́ a caasɛ tɔ́ɔ́ lʋ́lɔ́ŋɛ rɩ́ cɔɔ aá mʋ́ ráŋ ná ɓa háá yɩ́rɛ Nɩgɛɛvɛ.Abɩraŋ túwí Ezipiti
10 Losubɔmɔ oro ko zʋ tɔ́ɔ́; Ɛ́ nɛ́ Abɩraŋ isi tuwi Ezipiti rʋ́ʋ́ ké ráŋ mʋɔ́. 11 Ɓa há mʋ́ɛ́ aá peri Ezipiti, ʋ bʋ́lʋ́ háálɔ Sarayi rɩ́ bʋlɛ́: «Zesi, ŋ ɩ́ɔ̃́ ɩ há ká háwérí nyɛ, 12 Ezipiti tɩ́náwa háá néí, ɓa sɩ́ bʋlɩ́ŋ háálɔ nɛ́ kɛ́ɩ́, ɓa sɩɛ́ sɩ́ ɓʋ́ŋ ká lóí. 13 Ɛ́ wɩ́ɛ́, bʋl pɔ́wɔ́ bʋlɩ́ káŋ nátoló ní, a makɛ rɩ́wɔ́ tɩ́ŋɩ́ wɩ́ɛ́ a kánɩ́ŋ wérí, ká tɩ́ŋɩ́ wɩ́ɛ́ a lo rɩ́ ŋ má ná waana.» 14 Abɩraŋ ɓɩɛ́na há mʋ́ɛ́ zʋ Ezipiti, Ezipiti tɩ́náwa nóú háálɔ rʋʋ ká háwérí kɩ́ŋkáŋ. 15 Faarɔŋ tʋtʋnnɩhɩɛ̃́sɛ nóú a ko máŋsʋ́ há wéró ɛ́ a pɔ́ʋ́. Ɛ́ nɛ́ ɓa mʋ́ ka ɛ́ háálɔ a kaa ko Faarɔŋ jaa. 16 Faarɔŋ tɩ́ŋʋ́ wɩ́ɛ́ a ka Abɩraŋ wérí, a a ɓa pɔ́ʋ́ pieŋse, bʋnnɛ, nɛsɛ, kokúsi, arɩ́ nyʋ́kmawa; a pɔ́ʋ́ tʋtʋnna má, báála rɩ́ háála. 17 Amá Wɩɩsɛ tɩ́ŋ Abɩraŋ háálɔ Sarayi Faarɔŋ jaa mɛ́ mɩnɛ́ ná wɩ́ɛ́ a lo Faarɔŋ rɩ́rʋ́ jaa nɩɛ wuu tɛnnɛ cúnni fʋbɔma. 18 Faarɔŋ ná a ɓa yɩ́rɛ Abɩraŋ pɔ́ʋ́, ʋ bɔ́sʋ́ bʋlɛ́: «Beé rí ɩ a nyɛ ŋ mɛ́? Beé rí ɩ wɩ bʋlɛ́ páŋ bʋlɩ́ háálɔ nɛ́? 19 Bee wɩ́ɛ́ rɛ́ ɩ sɛ́ rɩ́ ɩ nátoló ní, ŋ má laa pii mákɩ́ŋ háálɔ? Aã! néí háálɔ nɛ́, isi kánɩ́ ɓɩnɔ a lɩɩ col.» 20 Faarɔŋ a ʋ nɩɛ mʋ́ lɩ́sɛ Abɩraŋ, ʋ kánʋ́ háálɔ a pɔ́ʋ́ ɓɩɛ wuu, ɓa kánʋ́ mʋ́ peri súsúbʋɔ a tá.