Babɛl jɩtúkgbóó
11
1 Ɛ́ tɛ́ŋ mɛ́, dúníé nɩɛ wuu faá bʋl liŋó balá nɛ́, onni yɩ́rɛ má balá. 2 Ɓa isi tɔ́ɔ́ mʋ́bʋɔ rɩ́ a va wuu, a mʋ́ tuki polnazeno oro mí, Sɩnɩarɛ dɩtɩ́llɛ a ké ráŋ. 3 Ɓa sɩɛ́ bʋl náŋá rɩ́ bʋlɛ́: «Á mʋ́, a ŋmɔwɛ wárɛ́wa a wasɛ.» Wárɛ́wa ná nɛ́ bɩ́rmɩ́wɔ́ dɔ́wʋ́ɔ́, ká gʋdrɔ́ŋ má bɩ́rmɩ́wɔ́ tɛ́sɔɔlɔ́. 4 Ɓa baa bʋl náŋá rɩ́ bʋlɛ́: «Á mʋ́, a sɔ tɔ́ɔ́ párá tɩɩ, a sɔ jɩtúkgbóó rʋ́ʋ́ nyúú zɛ́ aá tɩkɛ bána mɛ́. Ʋ ɛ́, á sɩ́ ná yɩr, a makɛ rɩ́rá sɩ́ tíé nyúú wuu ɓɛ́sʋ́.»5 Nyuutɩna tuwi rʋ́ʋ́ ná tɔ́ɔ́ ná rɩ́ jɩtúkgbóó ná nɩbííne háá sɔɛ́. 6 Ʋ nóú ko tenni rʋʋ sɛ́: «Ná, ɓa ká duo balá nɛ́, a wuu bʋ́bʋl liŋó balá; nówó háá tʋ́mʋ́ ná. Sɩ́sɛ́nyɛ, rɩ ɓa bɩ́ɩ́nɛ́ wɩ́ɩ́ wuu, ɓaá á nɛ́, wɩ́ɩ́ toó aá kɛ́rɛ. 7 Ɛ́ wɩ́ɛ́, á mʋ́, á tuwi a káŋwɔ́ liŋó ná gɩrmɛ, rɩ́wɔ́ báá sɩ́ náŋá wɩ́bʋlɛ́ nɛ́.» 8 Ɛ́ nɛ́ Nyuutɩna a ɓa pɩsɛ a ɓɛ́sɛ sú tíé nyúú wuu, a pi tɔ́ɔ́ ná sɔɛ tá. 9 Ɛ́ nɛ́ ɓaá yɩ́rɛ ɛ́ dɩhɩ̃́ Babɛl, bee wɩ́ɛ́ ráŋ nɛ́ Nyuutɩna gɩrmɛ dúníé wuu liŋó, a cɩ́ róŋ a ɓa pɩsɛ a ɓɛ́sɛ sú tíé nyúú wuu.
Sɛŋ duo nɩɛ a kaá mʋ́ yakɛ Abɩraŋ mɛ́
10 Ná Sɛŋ duo nɩɛ: Sɛŋ bɩŋsɛ zɔlɔ nɛ́ ká ʋ lʋl Arɩpaksadɛ, rɩ nyigíro ɓɩzeno ná há dáárɛ́ bɩŋsɛ bɛllɛ nɛ́. 11 Arɩpaksadɛ lʋlɛ́ har rɩ́ mɛ́, Sɛŋ ha dí tɔ́ɔ́ bɩŋsɛ zɔmʋ́ɔ́, a lʋl heŋbólli rɩ́ tolé.
12 Arɩpaksadɛ bɩŋsɛ mɛrɛ́ rɩ́ fí rí bɔmmʋ́ɔ́ nɛ́ ká ʋ lʋl Sela. 13 Sela lʋlɛ́ har rɩ́ mɛ́, Arɩpaksadɛ ha dí tɔ́ɔ́ bɩŋsɛ zɔwaná rɩ́ botoro, a lʋl heŋbólli rɩ́ tolé.
14 Sela bɩŋsɛ mɛrɛ́ rɩ́ fí ní ká ʋ lʋl Ɩbɛrɛ. 15 Ɩbɛrɛ lʋlɛ́ har rɩ́ mɛ́, Sela ha dí tɔ́ɔ́ bɩŋsɛ zɔwaná rɩ́ botoro, a lʋl heŋbólli rɩ́ tolé.
16 Ɩbɛrɛ bɩŋsɛ mɛrɛ́ rɩ́ fí rɩ́ baná nɛ́ ká ʋ lʋl Pelegi. 17 Pelegi lʋlɛ́ har rɩ́ mɛ́, Ɩbɛrɛ ha dí tɔ́ɔ́ bɩŋsɛ zɔwaná rɩ́ mɛrɛ́ rɩ́ fí, a lʋl heŋbólli rɩ́ tolé.
18 Pelegi bɩŋsɛ mɛrɛ́ rɩ́ fí ní ká ʋ lʋl Rehu. 19 Rehu lʋlɛ́ har rɩ́ mɛ́, Pelegi ha dí tɔ́ɔ́ bɩŋsɛ zɔwɛllɛ rɩ́ nɛ́mɛ́, a lʋl heŋbólli rɩ́ tolé.
20 Rehu bɩŋsɛ mɛrɛ́ rɩ́ fí rɩ́ bɛllɛ nɛ́ ká ʋ lʋl Serugi. 21 Serugi lʋlɛ́ har rɩ́ mɛ́, Rehu ha dí tɔ́ɔ́ bɩŋsɛ zɔwɛllɛ rɩ́ balpɛ, a lʋl heŋbólli rɩ́ tolé.
22 Serugi bɩŋsɛ mɛrɛ́ rɩ́ fí ní ká ʋ lʋl Nahɔrɛ. 23 Nahɔrɛ lʋlɛ́ har rɩ́ mɛ́, Serugi ha dí tɔ́ɔ́ bɩŋsɛ zɔwɛllɛ, a lʋl heŋbólli rɩ́ tolé.
24 Nahɔrɛ bɩŋsɛ mɛrɛ́ rɩ́ nɛ́mɛ́ nɛ́ ká ʋ lʋl Tera. 25 Tera lʋlɛ́ har rɩ́ mɛ́, Nahɔrɛ ha dí tɔ́ɔ́ bɩŋsɛ zɔlɔ rɩ́ fí rɩ́ nɛ́mɛ́, a lʋl heŋbólli rɩ́ tolé.
26 Tera bɩŋsɛ mɛɛ́sɩbotoro rɩ́ fí ní ká ʋ lʋl Abɩraŋ, Nahɔrɛ rɩ́ Haraŋ.
27 Ná Tera duo nɩɛ: Tera lʋ́l Abɩraŋ, Nahɔrɛ rɩ́ Haraŋ. Haraŋ lʋl Lɔtɛ, 28 ká sʋwɛ Uuri mí, Kalde tíé, ʋ áná Tera sɩ́ɛ́ mɛ́. 29 Abɩraŋ rɩ́ Nahɔrɛ isi ja háála; Abɩraŋ háálɔ yɩr nɛ́ Sarayi, Nahɔrɛ háálɔ yɩr Milka, Haraŋ toló. Haraŋ nɛ́ lʋ́l Yisika má. 30 Sarayi fa ká hápɩ́rɛ́ rɛ́, ʋ wɩ bíí kené.