Wɩɩsɛ bíl nʋtʋmɛ ʋ rɩ́ Nowe pɛ́kɛ
9
1 Wɩɩsɛ hé bárka pá Nowe rɩ́rʋ́ bɛlɛ a bʋ́lwɔ́ rɩ́ bʋlɛ́: «Ɩ́ ka lʋla, ɩ́ pul a sú tíé nyúú. 2 Tíé nyúú pʋsɛ rɩ́ balla wuu, rɩ́ bána nyúú diíwiisi wuu, rɩ́ tíé tútuure wuu arɩ́ mʋʋ náŋwʋlɛ́ wuu sɩ́ fɩ́fɛ́wa héwíŋ kɩ́ŋkáŋ. Ŋ píwó wuu héíwa nɛ́sɛ mɛ́. 3 Oŋhiẽsé ná é wuu háá valɛ́, ɩ́ wówó dídí; ŋ nɛ́ pɛ́ɩ́wa anɛ ŋ há pɛ́ɩ́wa oŋpaa ɛ́. 4 Amá ɩ́ wɩ namɩɛ rɩ́rʋ́ hiẽsó dí, ʋ mʋ́l nɛ́ ká ɩ́ wɩ cɛ́l dí, cɛ́l nɛ́ ká hiẽsó. 5 Ɩ́ má cɛ́l nɛ́ kɛ́ɩ́wa hiẽsó, ɛ́ wɩ́ɛ́, ŋ sɩ́ pííwa hiẽsó wɩ́ɛ́ bɔ́sɩ́wa tɩɩ. Pʋna rɩ́ ballɔ ná é wuu há sɩ́ lɩ́sɛ nɩbííno hiẽsó, ŋ sɩ́ púú wɩ́ɛ́ bɔ́sʋ́; rɩ nɩbííno má ɓʋ́ʋ́ nɩbínɔ́ŋɔ, ŋŋ́ púú hiẽsó wɩ́ɛ́ rɩ́ bɔsɛ nɛ́ŋ ná há ɓʋ́ɛ́ nɛ́. Ŋ sɩ́ pi nɩbííno wuu hiẽsó wɩ́ɛ́ a bɔ́sʋ́ maábinɔ́ŋɔ. 6 Nɛrɔ ná wuu há bɩ́sɛ nɩbííno cɛ́l, nɩbííno níí á rʋ́ʋ́ bɩ́sɛ tɩ́na má cɛ́l, bee wɩ́ɛ́ Wɩɩsɛ á nɩbííno ʋ nɩ́ɛ́sʋ́ há nɩhɩ̃́ ɛ́ nɛ́. 7 Ɩ́ é, ɩ́ lʋl bɛlɛ a pul kɩ́ŋkáŋ a la tíé wuu.»8 Wɩɩsɛ baa bʋl Nowe rɩ́rʋ́ bɛlɛ rɩ́ a bʋlɛ́: 9 «Ŋ é, ŋ sɩ́ tá nʋɔ pɛ́ɩ́wa arɩ́rɩ́wa duo nɩɛ ná há sɩ́ isi lɛ́ɩ́wa mɛ́; 10 arɩ́ oŋhiẽsé ná há mɩ́nɩ́wa laka: diíwiisi, pʋsɛ, balla wuu arɩ́ onni ná wuu há lɛ́ nyiidaborzeno ná mɛ́ arɩ́ ɓɩlʋllɛ́ wuu, ŋ sɩ́ tá nʋɔ pɔ́wɔ́ wuu. 11 Nʋtálɔ ná ŋ há tɛ́ɛ́ pɛ́ɩ́wa nɛ́ nyɛ: nyigíro ɓɩzeno báá waá kó zɔkɛ oŋhiẽsí wuu, nyigíro ɓɩzeno báá waá kó zɔkɛ tíé.» 12 Ká Wɩɩsɛ súúri bʋlɛ́: «Ŋ rɩ́rɩ́wa pɛ́kɛ arɩ́ oŋhiẽsé ná wuu ɩ́ rɩ́wɔ́ há mɩŋ náŋá mɛ́ a de kaá mʋ́ wuu, pɛ́kɛ nʋtálɔ ná malla nɛ́ nyɛ: 13 Ŋ héŋ duósii duóbána mɛ́, rʋ́ʋ́ nɛ́ a nʋtálɔ malla ŋ rɩ́ tíé pɛ́kɛ. 14 Rɩŋ nɛ́ kúé a rɩ́ daŋdɩɛrɛwa hé náŋá mɛ́, duósii ná sɩ́ lɛ duóbásɛ mɛ́, 15 rɩ́ŋ líísíŋ nʋtʋmɛ ná wɩ́ɛ́ ŋ há bílé ŋ rɩ́rɩ́wa pɛ́kɛ arɩ́ oŋhiẽsé wuu pɛ́kɛ, a sɩ́ ló rí nyigíro ɓɩzeno baa ko a zɔkɛ oŋhiẽsé wuu. 16 Duósii ná sɩ́ mɩŋ duóbána mɛ́, rɩ́ŋ bélú káá líísíŋ tɩɩ nʋtʋmɛ ná há wɩ tókó kené wɩ́ɛ́, ŋ há bílé ŋ rɩ́ tíé nyúú oŋhiẽsé wuu pɛ́kɛ.» 17 Ʋ dɩtenní, Wɩɩsɛ bʋ́l Nowe rɩ́ bʋlɛ́: «Nʋtʋmɛ ná ŋ há bílé ŋ rɩ́ tíé nyúú oŋhiẽsé wuu pɛ́kɛ nɛ́ ɛ́.»
Nowe rɩ́rʋ́ bɛlɛ wɩ́ɛ́
18 Nowe bɛlɛ ná há lɛ́ nyiidaborzeno ná mɛ́ nɛ́ ká: Sɛŋ rɩ́ Saŋ arɩ́ Zafe. Saŋ nɛ́ ká Kanaŋ áná. 19 Nowe bɛlɛ nyáŋ botoro ní púlé a baa la tíé wuu.
20 Nowe ní ká dʋ́ŋdʋ́ʋ̃́ paarɔ ná há cɔ́ŋsɛ víínyi tuu. 21 Ɛ́ víínyi dɩvɛ́ŋ nɛ́ ʋ nyɔ a buki, a wúrkú tɩɩ ká ka ɛ́ mɩ́nʋ́ táŋtɛ sɩɛrʋ. 22 Kanaŋ áná Saŋ, zʋʋ nóú áná hɩɩ̃sɛ a lɩɩ bʋl pɔ́ʋ́ mááláwa pʋmmɔ. 23 Ɛ́ nɛ́ Sɛŋ rɩ́ Zafe pi kóóti zeno tɔ́wɔ́ vapara mɛ́, ká nʋkɛ tulé zʋ táŋtɛ ná a pii yoo tɔ́wɔ́ áná hɩɩ̃sɛ mɛ́. Ɓa há bɩ́rwɔ́ liŋsi tɛ́wɔ́ áná ɛ́, ɓa wʋ́ʋ́ hɩɩ̃sɛ né. 24 Dɩvɛ́ŋ ná há kúé lɛ Nowe sɩ́ɛ́ mɛ́, ʋ nʋ́ʋ́ bio ɓɩwie há pí wɩ́ɩ́ ná ɔ́ʋ́ mɛ́. 25 Ɛ́ nɛ́ Nowe sɛ́: «Rɩ́ Wɩɩsɛ ɓʋsɛ Kanaŋ pʋ́sɛ, rʋ́ʋ́ ɔ́ʋ́ mááláwa rɩ́rʋ́ maábɛlɛ yósi má yómo!»
26 Ká bʋlɛ́: «Rɩ́ Nyuutɩna yɩr lɛ, ʋ nɛ́ ká Sɛŋ Wɩɩsɛ! Rɩ́ Kanaŋ a Sɛŋ yómo! 27 Rɩ́ Wɩɩsɛ a rɩ́ Zafe nóú tɩɩ, rʋ́ʋ́ ná dɩkéni Sɛŋ táŋtɛwa sɩɛrʋ, ká rɩ́ Kanaŋ ɔ́wɔ́ yómo!»