Nowe nyiidaborzeno mí lɩɩ
8
1 Wɩɩsɛ líísí Nowe wɩ́ɛ́, ʋ rɩ́ balla ná rɩ́ pʋsɛ ná wuu há mɩŋ nyiidaborzeno ná sɩɛrʋ. Ɛ́ nɛ́ Wɩɩsɛ a poo lú tíé nyúú, nyii ná púl aá dʋɔkɛ. 2 Tíé mʋ́l nyibúlbʋɔnnɛ ná rɩ́ duólúri ná wuu tɔ́wɔ́ tɩɩ mɛ́, ká duóŋ siki. 3 Nyii sɩɛ́ púl aá pɔsɛ mʋɔ́ mʋɔ́wa; tápʋlɛ zɔlɔ rɩ́ mɛɛ́sɛllɛ rɩ́ fí ná, rɩ nyii ná múúró. 4 Caŋsɛ balpɛ nyúú mí, tápʋlɛ fí rí balpɛ kal, nyiidaborzeno ná túwó sakɛ Arara paalɩzeno nyúú. 5 Nyii ná ha dʋ́dʋɔkɛ wuu a mʋ́ peri caŋsɛ fí nyúú mí. Caŋsɛ fí ná nyúú mí, dʋ́ŋdʋ́ʋ̃́ tápʋl, rɩ pallɛ nyunni nyɩ́ɩ́sɔ́. 6 Tápʋlɛ mɛɛ́sɛllɛ nʋɔ mɛ́, Nowe wúri tókóró ná ʋ fa há hé nyiidaborzeno ná mɛ́. 7 Ʋ cɩ́ róŋ mí a lɩ́sɛ bʋ́ŋgáá tá ʋ lɛ a fil ká ko aá zʋ, naasɩ́ ɛrɛ́, a kaá ja nyii ná hʋ́ʋ̃́sɛ tenné. 8 Ʋ baa cɩ́ róŋ mí a lɩ́sɛ kuókʋ́ma tá rʋ́ʋ́ ná nyii ná hʋ́ʋ̃́sɔ́ rɛ́. 9 Amá kuókʋ́ma ná há lɩ́ɛ́, ʋ wɩ dɩpɔ́mɛ né, ká bɩrko zʋ nyiidaborzeno ná, bee wɩ́ɛ́ nyii ha tɔ́ tíé mí. 10 Nowe dɛllɛ tápʋlɛ balpɛ ká baa tá kuókʋ́ma ná ʋ baa lɛ. 11 Gbaanɛ nɛ́ kuókʋ́ma ná cɛwɛ ólívi tuu pa'ɔlmɛ ʋ nʋɔ mɛ́, a bɩrko Nowe rɩ́. Ɛ́ nɛ́ Nowe sɩɛ́ zɩŋ rɩ́ nyii ná hʋ́ʋ̃́sʋ́ rɛ́ tíé nyúú. 12 Ʋ baa dɛllɛ tápʋlɛ balpɛ báá, ká tá kuókʋ́ma ná ʋ lɛ. Amá ʋ há lɩ́ɛ́, ʋ báá wɩ bɩ́rɛ́ ko. 13 Nowe bɩŋsɛ zɔwalgo rɩ́ balá, dʋ́ŋdʋ́ʋ̃́ cana dʋ́ŋdʋ́ʋ̃́ tápʋl nɛ́ nyii ná hʋ́ʋ̃́sɛ ká tíé kaasɛ. Nowe dóri nyiidaborzeno ná nyúú tɔ́lɔ ká bel, rɩ tíé ɓɩɛ́na káásɔ́. 14 Caŋsɛ bɛllɛ nyúú mí, tápʋlɛ mɛrɛ́ rɩ́ balpɛ kal, tíé hɩ́lɔ́.15 Ɛ́ nɛ́ Wɩɩsɛ bʋl Nowe rɩ́ bʋlɛ́: 16 «Lɛ nyiidaborzeno ná mɛ́, ɩ rɩ́rɩ́ háálɔ rɩ́rɩ́ bɛlɛ arɩ́rɩ́ biháála. 17 Oŋwóme wuu: balla ná rɩ́wɔ́ duó wuu há mɩŋ ráŋ, pʋsɛ ná má rɩ́wɔ́ duó wuu, diíwiisi rɩ́wɔ́ duó wuu arɩ́ tíé tútuure ná wuu, lɩ́sɩ́wɔ́ wuu rɩ́wɔ́ lɛ a ɓɛ́sɛ tíé nyúú a pul sú dɩhɩ̃́ wuu.» 18 Ɛ́ nɛ́ Nowe ɓɩɛ́na lɛ, ʋ rɩ́rʋ́ háálɔ rɩ́rʋ́ bɛlɛ arɩ́rʋ́ biháála ná. 19 Balla, pʋsɛ, tíé tútuure, diíwiisi arɩ́ oŋwɩɛla ná wuu háá va tíé, ɓa má wuu lɛ nyiidaborzeno ná mɛ́, duó duówa.
20 Nowe má koro a pá Nyuutɩna, a kɛsɛ pʋsɛ rɩ́ diíwiisi ná há wéró duowa wuu, a ɓʋ́ʋ́sɛ a físíwó wuu koro ná nyúú a pá Nyuutɩna. 21 Nyuutɩna nɩ́wɔ́ sɔ́wero, a bʋ́lʋ́ sɩɛrʋ mɛ́ bʋlɛ́: «A mɔ zaa mɛ́, ŋ báá wɩ nɩbííno wɩ́ɛ́ tɩ́ŋ zɔkɛ tíé, bee wɩ́ɛ́ nɩbííno heŋbiíru mí wuu, ʋ sɩɛrʋ dé cólli bɔ́ŋbɔ́ŋ ɛɛ nɛ́. Ŋ báá wɩ oŋhiẽsí wuú zɔkɛ anɛ ŋ há á nyɛ; 22 a de kaá ja dúníé isé, ɓɩɛ dui rɩ́ ɓɩɛkʋsɛ́ sɩ́ mɩŋ, lʋmɔ rɩ́ waarʋ sɩ́ mɩŋ, tɔ́lɩɩla rɩ́ yibíŋ sɩ́ mɩŋ, rɩ́ wɔhɔ rɩ́ tɩ́taŋ mɩŋ a kaá mʋ́ wuu, ɓa waá tókí ná.»