Nowe zʋ́ nyiidaborzeno
7
1 Wɩɩsɛ bʋ́l Nowe rɩ́ bʋlɛ́: «Zʋ nyiidaborzeno ná sɩɛrʋ, ɩ rɩ́rɩ́ jaa nɩɛ wuu; bee wɩ́ɛ́ ŋ nóú rɩɩ dʋŋɔ nɛ́ ká nɩtaŋá ŋ sɩ́ɛ́ mɛ́, ɩ náŋa sɩɛrʋ. 2 Kɛsɛ pʋsɛ ná há wéró, duo wuu wál rɩ́ hálwa buke balpɛ, ká kɛsɛ pʋsolmé má wál rɩ́ hálwa, 3 a kɛsɛ diíwiisi má duo wuu, wál rɩ́ hálwa buke balpɛ, rɩ́wɔ́ wuu mɩ́nɩ́ laka a makɛ rɩ́wɔ́ duo sɩ́ yʋ́ksʋ́ tíé nyúú. 4 Ʋ káánɛ tápʋlɛ balpɛ ká rɩ́ŋ a rɩ́ duóŋ ko tíé nyúú tápʋlɛ mɛɛ́sɛllɛ wɔhɔ rɩ́ tɩ́taŋ wuu; oŋhiẽsé ná wuu ŋ há ɛ́ɛ́, ŋ sɩ́ a rɩ́wɔ́ tenni tíé nyúú.» 5 Nowe á wɩ́ɛ́ ná wuu ní, anɛ ɛ́ Wɩɩsɛ há mákɛ́ pɔ́ʋ́.Nyigíro ɓɩzeno kúó tɔ́ tíé wuu mí
6 Nowe fa kéŋ bɩŋsɛ zɔwalgo ní ká nyigíro ɓɩzeno ná ko tɔ́ tíé wuu mí. 7 Nowe rɩ́rʋ́ háálɔ rɩ́rʋ́ bɛlɛ arɩ́rʋ́ biháála nɛ́ zʋ́ nyiidaborzeno ná, rɩ́ nyikana ná sɩ́wɔ́ ɓʋ́ʋ́sʋ́. 8 Pʋsɛ ná há wéró arɩ́ pʋsolmé ná, diíwiisi arɩ́ tíé tútuure, 9 ɓa má wuu wál rɩ́ hálwa zʋ anɛ ɛ́ Wɩɩsɛ há mákɛ́ pá Nowe. 10 Tápʋlɛ balpɛ ná há dáárɛ́, nyii gíró kɩ́ŋkáŋ a tɔ́ tíé mí. 11 Nowe hiẽsó bɩŋsɛ zɔwalgo mí, caŋsɛ bɛllɛ nyúú mí tápʋlɛ fí rí balpɛ kal, nyii dé gú lɛ tíé mʋ́l nyibʋɔnnɛ wuu ní aá lɛ, ká nyii de lɛ bána nyúú cúcuuri anɛ ɓa há cɔ́kɛ bána lúri. 12 Duóŋ púló aá ko tíé nyúú, a dáánɛ tápʋlɛ mɛɛ́sɛllɛ, wɔhɔ rɩ́ tɩ́taŋ wuu. 13 Ɛ́ kal nɛ́ Nowe zʋ nyiidaborzeno ná sɩɛrʋ, ʋ rɩ́rʋ́ háálɔ arɩ́rʋ́ bɛlɛ: Sɛŋ rɩ́ Saŋ arɩ́ Zafe má rɩ́wɔ́ háála. 14 Balla rɩ́wɔ́ duó wuu, pʋsɛ rɩ́wɔ́ duó wuu, tíé tútuure rɩ́wɔ́ duó wuu, diíwiisi rɩ́wɔ́ duó wuu arɩ́ oŋfilé wuu má zʋ. 15 Oŋhiẽsé wuu bɛllɛ bɛllɛwa nɛ́ zʋ́ɛ́ mɩŋ Nowe laka. 16 Omo wuu wál rɩ́ hálwa nɛ́ zʋ́ɛ́ anɛ ɛ́ Wɩɩsɛ há mákɛ́ pá Nowe. Ʋ har mɛ́ nɛ́ Wɩɩsɛ tɔ́ dánnʋɔ hé Nowe mí.
17 Nyikana ná há gíré tɔ́ tíé wuu mí ɓa dáánɛ tápʋlɛ mɛɛ́sɛllɛ. Nyii ná há pɩ́ŋɛ́, ɓa kéŋ nyiidaborzeno ná ɓɔ́ ʋ isi daali. 18 Ká nyii ná ha pɩ́pɩŋ kɩ́ŋkáŋ a ka nyiidaborzeno ná bɩ́bɛ́ŋŋɛ nyii daha. 19 Nyii ná ɔsɛ pɩŋ kɩ́ŋkáŋ wuu, a tɔ́ tíé nyúú pallɩgbóru wuu mí. 20 Nyii ná há tɔ́ pallɛ mɛ́, a pɔ́ nyii daha káá tuwi paalɔ nyúú, ɓa lúŋ kɛ nɛ́gʋtóko sɩ́ɩ́ fí rí bɔmmʋ́ɔ́. 21 Tíé nyúú oŋhiẽsé rɩ́ oŋvalɛ́ wuu sʋsɛ: diíwiisi, pʋsɛ, balla, oŋwɩɛla ná wuu há ká mirmir tíé nyúú arɩ́ nɩbííne wuu. 22 Tíé nyúú wuu mí, omo ná wuu há kéŋ hiẽsó, ɓa wuu ní sʋ́sɛ́. 23 Onni ná wuu fa háá hiẽsé tíé nyúú, Wɩɩsɛ ɔ́ɔ́ ɓa wuu tenni: a de pɔ́ nɩbííno mí, pʋsɛ rɩ́ balla ná wuu há mɩŋ tíé nyúú arɩ́ bána nyúú diíwiisi, oro wuu wɩ tíé nyúú káánɛ́. Nowe dʋŋɔ arɩ́ nɩɛ ná há zʋ́ nyiidaborzeno sɩɛrʋ, ɓa nɛ́ ná waana. 24 Nyikana ná tɔ́ tíé mí ɛ́ nɛ́ a dáánɛ tápʋlɛ zɔlɔ rɩ́ mɛɛ́sɛllɛ rɩ́ fí.