Og Ikotolu Sulat tidu ni
YAHIYA
Salam bug Pongoni-ngoni
1
Salam diyon dinika Gayus,
ok kolasahan nog gilugu sok kotombaꞌ nok kolasahan ku tokodoy.
Akon kini ok solokotow migmokogulang song mga moktotombaꞌ.
2 Kolasahan Gayus,
bung mayan mobais da ok kobotang-botang nu bu molasiga mamaꞌ nok kopagas nok pongandol nu ni Isa Al-Masih.
Ok Tabang ni Gayus song mga Moktotolagad
3 Landuꞌ tokodoy og loliyagu sok pogdatong nong mga koilugan ta sok kotombaꞌ.
Miksuksug ilon dinakon nong mimologboga sok kosobonnalan bug mga taluꞌ bug ginang nu mounut sok kosobonnalan.
4 Daꞌdun ong mokolabi sog loliyagu nong modongogu nong migunut sok kosobonnalan ok piglogumbataan ku sok kotombaꞌ.
5 Kolasahan Gayus,
kopongandolan ka poꞌ tinolagad nu ong mga koilugan ta sok kotombaꞌ nong minangoy diyon diniyu,
bisan daꞌ nu ilon kolilahoy.
6 Sinuksugan nilon og jomaa nong mga moktotombaꞌ ni Isa Al-Masih dini pasal sog lasa nok pitongow nu dinilon.
Dadi bilaꞌ matong ilon puliꞌ diyon,
mobais nok tabangan nu sop ilon bagun mokodayun ilon sok pokpanow nilon.
Yonin kini og dait inangon song mga moktotolagad sok Tuhan.
7 Poꞌ ilon kini mokpanowan bagun mokposampoy pasal ni Isa Al-Masih,
bu ondiꞌ na dodaꞌ ilon tumabuk nok tabang tidu song mga tow nog daꞌ tombaꞌ.
8 Saan na ita mga moktotombaꞌ sog Al-Masih,
sumboy tumabang ita dinilon bagun ongon og gampuꞌ ta sog ginang nilon mokposampoy nok kosobonnalan.
Diyotrepes bug Dimetri
9 Sinulatan ku na og jomaa nong mga moktotombaꞌ sog Al-Masih diyon diniyu,
sugaid si Diyotrepes nong meleg moimung nok kounutan niyu,
ondiꞌ in tolimaon ok pogbayaꞌ nami.
10 Dadi bilaꞌ matongu diyon diniyu,
posunon ku ong mga ininangin.
Pongimung-imunganin ami nok taluꞌ molaat.
Bu kanaꞌ tibuwa koyon,
ondiꞌ in da sop tolimaon ong mga koilugan ta sok kotombaꞌ nong matong diyon.
Pogondianin tanan sima-sima ong meleg tumolimaꞌ dinilon,
bu bilaꞌ diꞌ ilon tumombaꞌ diyanin,
pawaonin ilon sog jomaa nong mga moktotombaꞌ.
11 Dadi kolasahan ku Gayus,
diꞌ nu dogilingan ok kolaatan,
sugaid ok kobaisan.
Poꞌ sima-sima ong monginang nok kobaisan,
sukuꞌ nok Tuhan.
Sugaid sima-sima ong monginang nok kolaatan,
daꞌ in kolilahoy ok Tuhan.
12 Na pasal ni Dimetri,
mobais og dongoganin song mga moktotombaꞌ sog Al-Masih bu mounut da sop ok pongaddatanin sok kosobonnalan.
Ami da sop kini ong mga saksiꞌ sok kohatulin,
bu kosunan nu da sop nong motud ok pinaluꞌ nami.
13 Modakol pa bosiya ok suksugon ku dinika,
sugaid diꞌ u na hadja sulaton.
14 Poꞌ bung mayan mogbalak ita da bosiya nong mosompun bagun mokopogabit-abit ita nong mahatul.
15 Ong mga kosupalihan ta dini simalam-duwaa dinika.
Posampoy nu sop ok salam-duwaa u song monolokotow supali ta diyon.
Bung mayan ok kosannangan diyon dinika!
Wassalam