Og Ikoduwaꞌ Sulat tidu ni
YAHIYA
1
1-2 Salam dinika libun pigaddatana,
ong mipiliꞌ nok Tuhan,
sampoy song mga gumbataꞌ nu nok kolasahan ku tokodoy.
Bu kanaꞌ tibuwa akon ong molasa diniyu,
sugaid sampoy na ok kotanan nong mikokosun sok kosobonnalan.
Poꞌ ok kosobonnalan dini sok pongatoyan ta niyu sampoy na soummulan.
Akon kini ok solokotow migmokogulang song mga moktotombaꞌ.
3 Na bung mayan modiyon dinita ok tabang,
kolasa-kololat bug kosannangan nok Tuhan,
og Gommaꞌ ta bug Bataꞌ in nok si Isa Al-Masih.
Yonin kini ok sukuꞌ ta soliyan ta moglokotubuꞌ mounut sok kosobonnalan bu poglasa-linasahoy.
Ok Kosobonnalan bu ok Poglasa
4 Miglabi-labi og loliyagu dangan kiosunan ku nog ongon ong mga duma nog gumbataꞌ nu nong migunut sok kosobonnalan mamaꞌ na nok sinuguꞌ dinita nok Tuhan,
og Gommaꞌ ta sok surgaꞌ.
5 Dadi ningkomun pingoni u tokodoy nong moglinasahoy ita niyu kotanan.
Ok sinulatu kini dinika kanaꞌ og bogu suguan,
sugaid ok suguan nong midongog ta tidu pa sok tolipunan nok tinumombaꞌ ita niyu ni Isa Al-Masih.
6 Ok poglasa motongow dinita bilaꞌ unuton ta ong mga suguan nok Tuhan.
Bu ok suguanin nong midongog niyu tidu pa sok ponognaan,
yonin na nok sumboy moglasa-linasahoy ita.
7 Na modakol mga polongakkal nong miktonduꞌ ayin-ayin dini sog dunya.
Mga towanan kini ondaꞌ tombaꞌ nong miglawas manusiyaꞌ si Isa Al-Masih.
Ilon koyon ong mga polongakkal bu mononaggaꞌ sog Al-Masih.
8 Saan na pokpotubud amu song molikoꞌ nok pononduꞌ nilon bagun diꞌ mogasta ok poktiksaꞌ nami moktonduꞌ diniyu,
sugaid motolimaꞌ niyu og lam nok tumbas nok pidinsamaꞌ diniyu nok Tuhan.
9 Na sima-sima ok sumimoy sok tintuluan ni Isa Al-Masih bu diꞌ mokpotattap dun,
ondaꞌ diyon diyanin ok Tuhan.
Sugaid sima-sima ok tow nong mokpotattap sok tintuluan ni Isa Al-Masih,
na diyon diyanin ok Tuhan,
og Gommaꞌ ta bu og Bataꞌ in.
10 Dadi bilaꞌ ongon ong mga tow mangoy diyon sok tumpukan niyu moktotombaꞌ sokaliꞌ kanaꞌ ok kosobonnalan ok tonduon nilon pasal ni Isa Al-Masih,
sumboy diꞌ niyu onggaton sumolod sog baloy niyu,
bu diꞌ niyu ilon tolimaon.
11 Poꞌ sima-sima ong monolimaꞌ dinilon,
ampuꞌ ilon sog ginang molaat nong mga tow kituꞌ.
Pomilin-milin
12 Modakol pa bosiya ok suksugon ku diniyu,
sugaid diꞌ u na hadja sulaton.
Poꞌ bung mayan mokangoyu da diyon diniyu bagun mokopogabit-abit ita mahatul bu jukup og loliyag ta niyu.
13 Na miksalam-duwaa diniyu ong mga gumbataꞌ nog gilug nu nog libunb dini nong mipiliꞌ da sop nok Tuhan.
Wassalam