Ok Kopomondag biyan sok Kopongandol
5
Sima-sima ong mingandol nok si Isa og Al-Masih,
ok piniliꞌ nok Tuhan,
inimung nok Tuhan nog bataꞌ in.
Bu sima-sima og lumasa sok Tuhan og Gommaꞌ nong mipobogu ok kotubuꞌ in,
sumboy lumasa da sop sok sosukuꞌ nog bataꞌ in.
2 Kiosunan ta nok kolasahan ta ong mga gumbataꞌ nok Tuhan,
bilaꞌ kolasahan ta ok Tuhan bu unuton ta ong mga suguanin.
3 Poꞌ og gindanan nok kolasahan ta ok Tuhan,
yonin na bilaꞌ mogunut ita song mga suguanin,
bu ong mga suguanin kanaꞌ da mologon unuton.
4 Poꞌ sosuku miimung bataꞌ nok Tuhan,
dagonin ong mga sassat sog dunya.
Na ong mokopomondag nok sassat,
yonin na ok pongandol ta.
5 Daꞌdun ong mokopomondag nong mga sassat sog dunya luwal dona ong mga tow nong mingandol nok si Isa og Bataꞌ nok Tuhan.
Ok Saksiꞌ pasal ni Isa Al-Masih
6 Og Al-Masih yonin na og Bataꞌ nok Tuhan nong minatong dini sog dunya.
Kiosunan ta kini biyan sok pokpoliguꞌ diyanin sok tubig bu sok kobuyus nog duguꞌ in dangan minatoy yanin sok kayu.
Dadi kanaꞌ hadja ok tubig ong mikposobonnal nog yanin og Bataꞌ nok Tuhan,
sugaid sampoy og duguꞌ in.
Mikposobonnal da sop dun og Ruh nok Tuhan,
poꞌ yanin ok kosobonnalana.
7 Dadi ongon tolu buk sumaksiꞌ pasal dun,
8 og Ruh nok Tuhan,
ok tubig bug duguꞌ,
bu ok tolu buk kini migbatuk ok taluꞌ nilon.
9 Bilaꞌ mongandol ita sok poksaksiꞌ nong manusiyaꞌ,
labi na sumboy pongandolan ta ok poksaksiꞌ nok Tuhan,
poꞌ yanin tokodoy ong mikposobonnal nok pasal sog Bataꞌ in.b
10 Sima-sima ong mongandol sog Bataꞌ nok Tuhan,
kiosunan ok pongatoyanin nong motud ok poksaksiꞌ nok Tuhan kini.
Sugaid og daꞌ pongandol dun,
pinginloputin ok Tuhan,
poꞌ daꞌ yanin pongandol sok sinaksian nok Tuhan pasal sog Bataꞌ in.
11 Yonin kini ok sinaksian nok Tuhan,
nog binogoyanin ita nong mosannang nok kotubuꞌ solama-lama,
bu motabuk ta ok kotubuꞌ kini biyan sog Bataꞌ in.
12 Dadi sima-sima ong miksolobuk sog Bataꞌ nok Tuhan,
taga mosannang nok kotubuꞌ solama-lama.
Sugaid sima-sima og diꞌ moksolobuk sog Bataꞌ nok Tuhan,
diꞌ yanin mokohampit nok kotubuꞌ kini.
Ong Mosannang nok Kotubuꞌ nog Daꞌdun Kodoksuanin
13 Sinulatu kini diniyu sosuku nong mongandol song ngalan nog Bataꞌ nok Tuhan bagun motantu niyu nok kiongonan amu nok kotubuꞌ solama-lama.
14 Dadi motowakkal ita nog bilaꞌ ongon ok pongoni-ngonihon ta mounut sok koleganin,
inongoganin da ita.
15 Bu bilaꞌ kiosunan ta nong minginongog yanin sog olo-olo nok pingoni-ngoni ta,
na motantu ta nog binogoyin na dinita ok sosuku nok pingoni ta.
16 Bilaꞌ motongow niyu og gilug niyu sok kotombaꞌ sog Al-Masih mikodusa nok kanaꞌ yanin monarkaꞌ dun,
na sumboy pongoni-ngonihan niyu sok Tuhan bagun moampun yanin,
bu bogoyan yanin nok Tuhan puliꞌ nok kotubuꞌ.
Sugaid ongon og dusa nog bayadin ok siksaꞌ solama-lama,
diꞌ u sop moktaluꞌ nok pongoni-ngonihan niyu sok Tuhan ok tow nong maꞌ niyon og dusa nin.
17 Ok kotanan nog ginang nong molaat,
og dusa.
Tibuwa mopapas da og dusa basta kanaꞌ og dusa nog bayadin ok siksaꞌ solama-lama.
18 Kiosunan ta nok sima-sima og binataꞌ puliꞌ biyan sok kowasa nok Tuhan,
diꞌ monginang nok kodusahan,
poꞌ tamingan yanin nog Bataꞌ nok Tuhan,
bu diꞌ na yanin moyit sok sassat nog Iblis.
19 Kiosunan ta nok sukuꞌ ita nok Tuhan,
sugaid ok tibuk dunya diyon sok pogbayaꞌ nog Iblis.
20 Bu kiosunan ta nong minatong og Bataꞌ nok Tuhan dini sog dunya bangka nin ita bogoyoy nok ponabut bagun kolilahan ta ong mosobonnal nok Tuhan.
Dadi misolobuk ita na song mosobonnal nok Tuhan biyan sog Bataꞌ in nok si Isa Al-Masih.
Yanin ong mosobonnal nok Tuhan bu ok tubud nong mosannang nok kotubuꞌ solama-lama.
21 Dadi mga piglogumbataan ku,
pokpotubud amu nog daꞌdun ok sumbahon niyu luwal da ok Tuhan.
Wassalam