Og Gaddat nong mga Tow bilaꞌ Posunguꞌ na ok Kodoksuan nog Dunya
3
Sumboy kosunan nu Timuti,
nong mosigpit tokodoy ok kopogonong nong mga tow bilaꞌ posunguꞌ na ok kodoksuan nog dunya.
2 Poꞌ sog waktu koyon mogapas tibuwa ong mga tow sog leg nog ginawa-baran nilon,
bu gibogon ilon sok sin.
Moabbu ilon bu mokpotas-potas,
monaluꞌ-naluꞌ ilon,
bu mongatu ilon sop song mokogulang nilon.
Ondiꞌ ilon da sop mokosun moksukul,
bu daꞌdun gondok nilon sok Tuhan.
3 Daꞌdun na og lasa nilon sok pokasi nilon manusiyaꞌ,
bu diꞌ ilon meleg moksulut.
Laaton nilon og dongog nok pokasi nilon,
diꞌ nilon kosandalan ong napsu nilon,
mobingis ilon,
bu molingit ilon sog ginang mobais.
4 Monipu ilon,
bololokowon,
landuꞌ na kotas og goyitan nilon,
bu polabihon nilon ok kokayaan sog dunya gabaꞌ nog lumasa sok Tuhan.
5 Baluꞌ-baluꞌ ilon moammal,
sugaid song motudin,
daꞌ nilon tabukoy ok kowasa nok Tuhan sok kotubuꞌ nilon.
Na sumboy mokpolayuꞌ a song mga tow nong mamaꞌ niyon koyon.
6 Og duma dinilon mogdakow-dakow moglunsulan sog gumbaloyan bagun mongakkal nok kolibunan nong molomu koyit sok ponintuluꞌ nilon.
Ong mga kolibunan koyon kobogatan nog dusa,
bu pigbayaan ilon nog ginis-ginisan nok konapsuhan.
7 Pigmuhut-muhutan nilon poganadan ong miglologinis nok pononduꞌ,
sugaid ok kosobonnalan diꞌ nilon moangkon.
8 Mamaꞌ niloꞌ Yannes bu Yambes nong mingatu ni Nabi Musa song masa nituꞌ,
mingatu sop ong mga mongakkal nong moktotonduꞌ koyon sok kosobonnalan.
Limikoꞌ ok pomikil nilon,
bu daꞌ kosugat ok kotombaꞌ nilon sok kosobonnalan.
9 Sugaid diꞌ da mogobon ok ponginangon nilon koyon,
poꞌ kobuyaan da bug ponoy ok kodupang nilon,
mamaꞌ nong mikobiyan niloꞌ Yannes bu Yambes.
Ok Pituwa ni Pol diyon ni Timuti
10 Tibuwa ika,
Timuti,
tinulikan nu ok tintuluan ku,
gaddatu bug gawoyu sok kotubuꞌ-tubuꞌ u.
Inunut nu ok kotombaꞌ u,
kosabar,
lasa bug poktiggolu.
11 Kiosunan nu da sop nong mibinsanaꞌ bu kilogonan ku dituꞌ sog bonuwa Antiyok,
Ikoniyum bu sog Listraa.
Tibuwa sog lam niyon,
tinabangan ku nok Panghuꞌ ta.
12 Poꞌ og lam nong meleg moglokotubuꞌ mounut sok kolegan nok Tuhan sok poksolobuk nilon ni Isa Al-Masih,
mokobiyan na dodaꞌ nok kobinsanaan.
13 Sugaid ong mga tow nong molaat bu molimbung,
mogdungag pa ok kolaatan nilon.
Bu kanaꞌ tibuwa og duma nilon kolimbungan dun,
tibuwa mismu og ginawa-baran nilon.
14 Dadi ika Timuti,
pokpotattapa sok kosobonnalan nong mitintuluꞌ dinika,
poꞌ kiosunan nu nok kopongandolan ong mga miktintuluꞌ nini.
15 Tidu pa sok kobikaan nu,
kitintuluan ka na nok Kitab Sutsi nog yonin na og dalanan nong mibalak nu ok pogawon biyan sok kotombaꞌ diyon ni Isa Al-Masih.
16 Poꞌ og lam nong misulat sok Kitab Sutsi,
tidu sok Tuhan bu mokkogunahan sok ponintuluꞌ,
pogbinaꞌ,
pokpologdong bu pokpotontul posunguꞌ sog gaddat mologdong.
17 Dadi bilaꞌ ok piktowan nok Tuhan mogunut song misulat sok Kitab,
jumukup ok kopandoyan nilon sog lam nog ginang mobais.