Sumboy Mopagon ok Kopongandol ni Timuti
2
Dadi Toꞌ,
pokpopagon ka sok kolasa-kololat nog binogoy dinita biyan sok kosolobuk ta ni Isa Al-Masih.
2 Bu ok ponintuluꞌ kituꞌ nong midongog nu dinakon sok kodakolan nok tow,
wakil nu da sop song mga tow nok kopongandolan bagun mokpanad sop ilon sok kodumahan nilon.
3 Ampuꞌ a da sop moksandal nok kobinsanaan bagun mamaꞌ a nok kopongandolan nok sundalu nok pigbayaan ni Isa Al-Masih.
4 Poꞌ ok sundalu daꞌdun og labotin song mga ponginangon nong mga sibilyan.
Unutonin tibuwa ok suguan nok kounutanin bagun mosuat diyanin.
5 Mamaꞌ da nog hantang nok pololumbaꞌ,
diꞌ in motabuk ok pomondaganin bilaꞌ diꞌ in unuton ok saraꞌ nok poglumbaꞌ.
6 Domikkiyan da sop song motugos nong mogoguma,
yanin da ong mokuna humampit nog bunga nok pomula nin.
7 Saan na pomikil nu ok pinaluꞌ u kini,
poꞌ posabuton da nok Tuhan dinika og lam nituꞌ.
8 Pondom nu nok si Isa Al-Masih,
ok solobuk ponupuꞌ ni Sultan Daud,
mitubuꞌ mokpuliꞌ tidu sok kopatoy.
Yonin koyon ong Mobais nok Suksugan nok pisampoyu song mga tow,
9 bu pasal niyon,
mibinasa bu mipirisu u mamaꞌ nok tow molaat,
sugaid ok Parman nok Tuhan diꞌ mopirisu.
10 Saan na sinandalan ku og lam nok kobinsanaan bagun moawon ong mga mipiliꞌ nok Tuhan,
bu biyan ni Isa Al-Masih,
mokampuꞌ ilon sok sahaya bug kotasin solama-lama.
11 Yonin kini ong motud nok ponaluon nog
“Bilaꞌ minatoy ita dunut diyanin,a
na moglokotubuꞌ ita da sop dunut diyanin.
12 Bilaꞌ moksandal ita nok kobinsanaan pasal diyanin,
mogbayaꞌ ita da sop dunut diyanin.
Bilaꞌ sop sonsingan ta yanin,
sonsinganin da sop ita.
13 Tibuwa,
minsan sooy ondiꞌ ita kopongandolan,
kopongandolan da yanin.
Poꞌ diꞌ tokodoy yanin mogboluba.”
Ok Sosuguon nok Kosuatan ok Tuhan dun
14 Na popondom nu dona song mga tow moktotombaꞌ sog Al-Masih ok tinaluꞌ u koyon.
Podinsamaan nu sop ilon nog diꞌ ilon mogdaawa song mga taluꞌ nog daꞌdun og guna nin,
poꞌ mokopoglaat hadja koyon sok kotombaꞌ nong mga tow nong minginongog.
Ok Tuhan og imung nu nok saksiꞌ bilaꞌ monintuluꞌ a dinilon.
15 Dadi poktuyuan nu tokodoy moinang ong mga suguan dinika nok Tuhan bagun kosulutan yanin.
Sumboy mologdong ok poktonduꞌ nu nok Parmanin nog yonin ok kosobonnalan,
bagun daꞌdun og ikosipog nu.
16 Hallioy nu ok ponaluon nok kododunyahoy koyon nog daꞌdun og guna nin,
poꞌ yonin koyon ong mokosuwoy song mga tow sok pogammal.
17 Ong mamaꞌ niyon nok ponaluon kumanat hadja mamaꞌ nok saki kanser nong mokopoglaat nog lawas.
Og duma nong miktonduꞌ nong maꞌ niyon koyon,
yonin na siloꞌ Hemeneyus bu Piletus.
18 Ilon koyon simimoy na sok kosobonnalan.
Taluꞌ nilon nong mipuwas na ok kotubuꞌ mokpuliꞌ nong mga minatoy,
bu laaton nilon ok kotombaꞌ nog duma.
19 Tibuwa ong mosobonnal nok pononduꞌ nong miktidu sok Tuhan mopagon bu diꞌ mopinda,
mamaꞌ nong misulat,
“Kiosunan nok Tuhan bug sima ok sukuꞌ in,”b
bu “Sima-sima ong mangkon nok tinumombaꞌ yanin sok Pogbayaꞌ-bayaꞌ,
sumboy diꞌ monginang nok kolaatan.”
20 Mopononggiꞌ ok piktowan nok Tuhan song mga miglologinis nok panyap sog baloy nok sultan nog gamiton song miglologinis nog waktu.
Ongon og inimung tidu sog bulawan bug silber,
bu og duma sop inimung tidu sok kayu bug basak.
21 Dadi maꞌ nituꞌ da sop ong mga moktotombaꞌ,
bilaꞌ moghalliꞌ ok sosolokotow sog ginang molaat,
bu sutsihonin og diyalom pongatoyanin,
mamaꞌ yanin nong mopagon nok panyap nog gamiton nok Panghuꞌ sok kobaisan.
Ong maana nin,
milonuꞌ na yanin,
bu mopatut gamiton,
bu togama na moginang nok sosuku nong mobais.
22 Saan na Timuti,
pokpolayuꞌ a song mga ginang nong monapsu nok kolayaman inangon nong mga molimbataꞌ.
Poktuyuoy nu ok kologdongan,
kotombaꞌ,
lasa bug poksulut-sulut dunut nong mga tow nong mokitabang sok Panghuꞌ tidu sok kolonuꞌ nok pongatoyan.
23 Hallioy nu da sop og daꞌdun kopologunahan nok pogdodaawa nok kiosunan nu mokoposunguꞌ sok suwalan.
24 Poꞌ ita ong mga gulipon nok Tuhan sumboy diꞌ moksuwal-suwal.
Sugaid sumboy mobais ita monintuluꞌ,
molunuk ok pongatoyan ta sog lam nok tow,
bu mosabar ita dinilon.
25 Bilaꞌ momituwa ita sok tow nok sinumaggaꞌ dinita sumboy biyan sok kolunuk nok pongatoyan,
poꞌ kalu-kalu duhulan da ilon nok Tuhan nog waktu moktowbat bagun nilon angkonon ok kosobonnalan.
26 Dadi mokosayu na ilon bangka pa pokawaꞌ sog Iblis,
ong mikosaggow dinilon bagun pogbayaanin.