Og Ikoduwaꞌ Sulat ni Pol Posunguꞌ ni
TIMUTI
Salam-duwaa ni Pol diyon ni Timuti
1
1-2 Salam-duwaa dinika,
Timuti,
ok kolasahan ku nog initungu nog bataꞌ u sok kotombaꞌ.
Akon kini si Pol,
ong mokpoposampoy ni Isa Al-Masih biyan sok kolegan nok Tuhan.
Piangoyin akon mokposampoy song mga manusiyaꞌ pasal sog jinanjiꞌ in nong mosannang nok kotubuꞌ solama-lama.
Ok kotubuꞌ kini koongonan og lam nong misolobuk ni Isa Al-Masih.
Bung mayan modiyon dinika ok tabang,
kolasa-kololat,
bug kosannangan nok tidu sok Tuhan,
Gommaꞌ ta bu Panghuꞌ ta Isa Al-Masih.
Ok Poksukul bu ok Pokpolasig ni Pol diyon ni Timuti
3 Moksukulu sok Tuhan nog yonin na og inunutan ku dunut nok kolonuꞌ nok pomikilu,
mamaꞌ nok pogunut nong mga pingapuꞌ u.
Moksarang-sukulu gobi-gondow pokpondomon ku ika sok pongoni-ngoni u.
4 Gindowon ku tokodoy ika nong mipondomu nok timogduꞌ og luwaꞌ nu dangan miksuwoy ita.
Kolegan ku bosiya moktongow ita pa puliꞌ,
bagun ku loliyagon tokodoy.
5 Ondaꞌ u pa kolingowoy ok sobonnal nok kotombaꞌ nu ni Isa Al-Masih,
mamaꞌ nok kotombaꞌ nog gomboꞌ nu nog libun nok si Loyda bu ginaꞌ nu nok si Yunis.
Na mitantu u ok kotombaꞌ nu,
mamaꞌ da sop dinilon.
6 Saan na popondoman ku ika nok sumboy nu gamiton ok kopandoy nog binogoy dinika nok Tuhan sog waktu nog dinoponan ku ika bu pingoni-ngonihan.
7 Poꞌ binogoyan ita nok Tuhan nog Ruh nin,
kanaꞌ bagun tumalow ita,
sugaid bagun koongonan ita nok kopagas,
lasa bug poksaggaꞌ nog ginawa ta.
8 Dadi diꞌ a tokodoy mosipog mokposampoy pasal sok Panghuꞌ ta nok si Isa Al-Masih.
Bu diꞌ a sop mosipog sabap dinakon nong mipirisu u kobalan nok kopogunutu diyanin.
Tibuwa,
duma a moksandal sok kobinsanaan sabap sok pokposampoy nong Mobais nok Suksugan,
bu bogoyan ka da nok Tuhan nok kowasa bagun ka mokopoginang dun.
9 Poꞌ ok Tuhan ong minawon dinita,
bu inonggatin ita moimung nok sutsi nok piktowanin.
Inawonin ita kanaꞌ sabap sog ginang ta nong mobais,
sugaid pasal sok kolasa-kololatin,
poꞌ maꞌ nituꞌ na dodaꞌ ong maksudin sok pogawonin dinita.
Poꞌ sog daꞌ pa miongon og lam nituꞌ,
minaksud na nok Tuhan nok potongowonin dinita ok kolasa-kololatin biyan ni Isa Al-Masih.
10 Bu ningkomun pitongowin na dinita biyan sok poktuwaꞌ dini nong Mogogawon ta nok si Isa Al-Masih.
Dinagin ok kowasa nok kopatoy,
yonin na ok kosiksaan song narkaꞌ.
Dadi bilaꞌ tinumombaꞌ ita nong Mobais nok Suksugan pasal ni Isa Al-Masih,
koongonan ita nok kotubuꞌ solama-lama sok surgaꞌ.
11 Dadi kiwakilan ku nok Tuhan nong mokpoposampoyin,
bug moktotonduꞌ in,
bagun nasihaton ong Mobais nok Suksuganin kini.
12 Na pasal sok pokposampoyu,
mikonanamu nok kobinsanaan,
sugaid diꞌ u ikosipog poꞌ kosunan ku tokodoy sima ok tinombaan ku.
Bu mitantu u nog ipatonin da ok pingandolu kituꞌa diyanin toktob sumaut og gondow nok pokpuliꞌ in dini.
13 Ong mologdong nok tintuluan nok kiosunan nu tidu dinakon,
imung nu nok suntuan.
Potattap nu ok kotombaꞌ bug lasa nog diyon dinika pasal sok poksolobuk nu ni Isa Al-Masih.
14 Ong mohalgaꞌ nok tintuluan nok pingandol dinika,
bologbogan nu biyan sok tabang nog Ruh nok Tuhan nog dini dinita.
15 Na kiosunan nu na nong modakol ong mga koilugan ta nok tinumolikud dinakon sok probinsiya nog Bataꞌ-bataꞌ Asiya,b
mamaꞌ na ni Pigelus sampoy si Hermogenes.
16 Tibuwa mura-murahan kololatan da nok Tuhan ok salu baloy ni Onesiporus poꞌ sigi-sigi nin akon polasigon,
bu diꞌ in akon ikosipog bisan dini u sok pirisuhan.
17 Dangan minangoy yanin dini sok siyudad nog Rum,
pinontongin akon bisan ayin-ayin sampoy song mibalakin akon.
18 Dadi bung mayan kololatan da yanin nok Tuhan sog waktu nong mokpuliꞌ na si Isa Al-Masih.
Kiosunan nu tokodoy bug ponoy kosolag nok tabangin dinakon nog dituꞌ u pa sog bonuwa Epesus.