Ok Pomilin-milin
4
Na Timuti,
ongon ok suguon ku dinika.
Bu ok saksiꞌ u ok Tuhan bu si Isa Al-Masih,
ong monghukum nong mga totubuꞌ bu mimatoy bu ong mokpuliꞌ momarinta dini sog dunya.
2 Amoy-amoy dinika nong mognasihata nok Parman nok Tuhan.
Pogandama bisan mobais nog waktu atawa kanaꞌ.
Onggat bu oyit nu ong mga tow tumombaꞌ,
pituwahoy nu ilon sok kologdongan,
pogbinaoy nu ilon pasal song mga molikoꞌ nog ginang,
bu polasig nu ok pongatoyan nilon dunut sabar bug kohatul.
3 Poꞌ matong da og waktu mopok monginongog ok kodakolan nok tow nok ponintuluꞌ nong motud,
bu og unutan nilon og dinilon nok kolegan.
Monontong ilon nog guru modakol nong monintuluꞌ nok kosulutan ilon dun.
4 Sumuwoy ilon sok kosobonnalan,
bu unuton nilon ong mga suksugan nok kanaꞌ motud.
5 Sugaid ika,
Timuti,
sumboy mohantap ok pomikil nu bisan olo-olo pa matong dinika.
Poksandala nok kosigpitan,
pokposampoya nong Mobais nok Suksugan,
bu inang nu tokodoy og lam nok sinuguꞌ dinika nok Tuhan.
6 Poꞌ pasal dinakon,
posunguꞌ na og waktu nog ginantaꞌ dinakon.
Poglillaꞌ u na ong nyawa u sok Tuhan.
7 Mamaꞌ hantang nok pololumbaꞌ,
mimagasu tokodoy sampoy song misautu ok tamanan,
bu mikpotattapu sok kotombaꞌ ta.
8 Dadi sog gondow binayaꞌ ongon ok pidinsamaꞌ nok pimondagan,
yonin na iningalanan nok kuruna nok kologdongan,
nog bogoyon dinakon ni Panghuꞌ Isa Al-Masih,
ong mologdong nong moghuhukum.
Na kanaꞌ hadja akon ok tumbasan nok kobaisan koyon,
sugaid og lam nog linumasa diyanin bu migdodama nok pokpuliꞌ in sog dunya.
Ok Kobotang-botang niloꞌ Pol
9 Na ika Timuti,
pogapasa mangoy dini dinakon nong mosompun.
10 Poꞌ si Demas,
pilabi nin ok kododunyahoy,
dadi binagakin na akon bu minangoy sok Tesalonika.
Si Kresens minangoy dituꞌ sog Galatiya bu si Titus dituꞌ sog Dalmatiya.
11 Si Lukas dona og duma u dini.
Dadi podunut nu si Markus bilaꞌ mangoya dini poꞌ mosolag ong motabangin dinakon.
12 Pasal sop ni Tikikus,
piangoyu yanin dituꞌ sog Epesus.
13 Na bilaꞌ mangoya dini,
oyit nu og juba u nog binilin ku dituꞌ ni Karpus sog bonuwa Trowas.
Oyit nu sop ong mga kitabu bu labi na ong mga pinulat nog linulun kituꞌ.
14 Si Aleksander,
ok polononsal nok tumbaga,
mikopoglaat tokodoy dinakon,
sugaid Tuhan dona ok tumumbas sog ginangin.
15 Poghalliꞌ a sop tokodoy diyanin,
poꞌ sinumaggaꞌ yanin song mga ponintuluꞌ ta.
16 Sok ponognaan nok poghukum dinakon,
daꞌdun ok sinumugut dinakon.
Og lam nilon pisagadan nilon akon.
Bung mayan diꞌ da koyon motuntut dinilon.
17 Sugaid daꞌ u posagadoy ni Panghuꞌ Isa.
Binogoyanin akon nok pagas bagun moposampoyu og lam song Mobais nok Suksugan song mga tow nok kanaꞌ Yahudi.
Bu tinabanganin akon,
poꞌ daꞌ u hukumoy sok kopatoy.a
18 Tabangan ku da ni Panghuꞌ Isa tidu sog lam nok kolaatan,
bu oyitonin akon sok pomarintahanin sok surgaꞌ.
Patut yanin potason solama-lama.
Amin.
Ok Poksalam-duwaa song mga Moktotombaꞌ
19 Posampoy nu ok salam-duwaa u dituꞌ ni Prisila bu ni Akila bu song mga tow sog baloy ni Onesiporus.
20 Si Erastus dituꞌ pa mikpobagak sog bonuwa Kurintu,
bu si Tropimos binagaku sog bonuwa Miletus nong misaki.
21 Poktuyuꞌ a tokodoy mangoy dini sok kanaꞌ pa waktu ponigdow.
Minalam-duwaa da sop diniyu siloꞌ Yubulus,
Pudens,
Linus bu si Klawdia bug lam nong mga koilugan ta niyu sok kotombaꞌ sog Al-Masih dini.
22 Bung mayan modiyon dinika ok Panghuꞌ,
bu bung mayan lolayun niyu tabukon ok kolasa-kololatin.
Wassalam