Diꞌ Monallaꞌ sog Duma
14
Na pasal sok pigilugan niyu sok kotombaꞌ nong molamma ok kopongandol nilon,
tolimaꞌ niyu ilon.
Bu bilaꞌ ongon sok pikilan nilon nog ondaꞌ pokosugat sok pikilan niyu,
naꞌ niyu ilon lugaton.
2 Ongon ong mga mogogunut sog Al-Masih nok tinumombaꞌ nong mokokan ilon bisan olo,
sugaid ong mga mokolamma,
sok pikilan nilon sunoy haram ok ponumbalion kituꞌ.
Dadi gutan da ok kanon nilon.
3 Ong mga moktotombaꞌ nok kuman nong miglologinis nok kan,
sumboy ondiꞌ moksudiꞌ song mga moktotombaꞌ nok kuman polanan nog gutan.
Domikkiyan da sop song mga moktotombaꞌ kituꞌ nog gutan da ok pongonganon nilon,
sumboy ondiꞌ da sop ilon monallaꞌ song mga moktotombaꞌ kituꞌ nok kuman nong miglologinis nok kan,
pasal batuk da ilon tinolimaꞌ nok Tuhan.
4 Ong mga kodumahan ta kituꞌ,
ong mga gulipon da sop nok Panghuꞌ.
Dadi daꞌdun ok kopatut ta monallaꞌ dinilon.
Ok Panghuꞌ da ong mokosun bilaꞌ mosugat taꞌ ong mga guliponin nog hukuman atawa ondiꞌ,
sugaid diꞌ ilon da mosugat poꞌ ok Panghuꞌ ok taga kowasa mogitung dinilon mologdong.
5 Ongon koyon ok tow pilabi nin ok solobuk nog gondow tidu sog duma nog gondow,
og duma sop pibatukin og lam nog gondow.
Dadi sosuku nok tow sumboy unutonin ok kotombaꞌ in nog daꞌ pogduwaꞌ-duwaꞌ pasal dun.
6 Sima-sima moktulik nog gondow,
tulikanin bagun mopotas ok Tuhan.
Na ok kuman bu og ondiꞌ kuman nok ponumbalion domikkiyan da sop,
inangon nilon bagun mopotas ok Tuhan dun,
bu batuk ilon koyon moksarang-sukul sok Tuhan.
7 Poꞌ ok kotubuꞌ ta,
ok Tuhan og gapuꞌ in.
Dadi sok kotubuꞌ bu sok kopatoy sumboy inangon ta ong mokososuat diyanin,
kanaꞌ dinita.
8 Poꞌ bilaꞌ totubuꞌ ita,
motubuꞌ ita para sok Panghuꞌ,
bu bilaꞌ matoy ita,
matoy ita para sok Panghuꞌ.
Dadi bisan motubuꞌ ita atawa matoy,
sukuꞌ ita nok Panghuꞌ.
9 Pasal niyon minatoy si Isa,
bu mitubuꞌ yanin mokpuliꞌ,
bagun moimung yanin nok Panghuꞌ nong mogbayaꞌ song mga minatoy bu song mga totubuꞌ.
10 Dadi manu monallaꞌ amu ma sok pigilugan niyu nong misukuꞌ da sop sog Al-Masih?
Atawa manu babaꞌ-babaon niyu ma ilon?
Poꞌ ita kotanan madap da sok poghukuman nok Tuhan.
11 Poꞌ misulat sok Kitab,
Taluꞌ nok Tuhan,
ok solama-lama ongon,
“Tantu matong og waktu nok sumudjud dinakon og lam nong manusiyaꞌ
bu mangkon ilon monolokotow nog akon ok Tuhan.”a
12 Mattan nong madap ita niyu kini kotanan sok Tuhan mokpomotud pasal sog ginang ta sog dunya.
13 Dadi sumboy diꞌ ita na monallaꞌ.
Diꞌ ita moginang nog olo-olo nok sunoy mokoyit-oyit sog dusa nok pigilugan ta sok kotombaꞌ.
14 Na sabap sok poksolobuku ni Panghuꞌ Isa,
kiosunan bu mitantu u nog daꞌdun ok kan nog hinaram.
Sugaid sok ponontong nong mga tow nong mogharam dun,
pogliksokan nilon og lawas nilon bilaꞌ kuman ilon dun.
15 Dadi bilaꞌ moyit niyu ok pigilugan niyu sog olo-olo nog hinaram nilon,
na daꞌdun na og lasa niyu dinilon.
Pondom niyu nong minatoy da sop og Al-Masih para dinilon,
saan ondiꞌ niyu ladakon ok kotombaꞌ nilon pasal tibuwa sok kokan niyu.
16 Kanaꞌ amu moginang nok silaon amu dun nog duma nok tow bisan pa sok pomikilan niyu mobais.
17 Poꞌ ok Pomarinta nok Tuhan kanaꞌ pasal sok kokan bug kinum,
sugaid ong mohalgaꞌ diyanin ok kologdongan,
kosannangan bug kololiyag nok tidu sog Ruh Mahasutsi.
18 Dadi bilaꞌ mamaꞌ niyon ok kopogunut niyu ni Isa Al-Masih,
kosuatan diniyu ok Tuhan,
bu pogaddatan amu nong mga tow.
19 Saan na pogmuhut-muhutan ta niyu ok poksulut bug pokpopagon nok kotombaꞌ nong monolokotow dinita niyu.
20 Ondiꞌ ta ladakon ok kobaisan nog ininang nok Tuhan sok pongatoyan nog duma ta pasal hadja sok pongonganon.
Motud nog halal og lam nok kan,
sugaid bilaꞌ moyit ta ok pigilugan ta kuman nog haram sok ponontongin,
miksallaꞌ ita.
21 Golom pa diꞌ na kuman nok ponumbalion atawa moginum nong mokolangu,
atawa olo-olo nong mokopoglaat sok kotombaꞌ nok pigilugan ta niyu.
22 Bisan olo ok kotombaꞌ niyu pasal song mga haram atawa kanaꞌ haram koyon,
toktob hadja dinika bug Tuhan.
Mosannang ok tow nog daꞌdun ok susunanin sog olo-olo og inangonin.
23 Sugaid bilaꞌ mogduwaꞌ-duwaꞌ ok tow pasal sok kokanin,
mogdusa yanin bilaꞌ kuman yanin dun.
Poꞌ bilaꞌ mogduwaꞌ-duwaꞌ ita bug mobais inangon,
sugaid ininang ta da,
moimung koyon nog dusa para dinita pasal ondaꞌ koinang biyan sok kopongandol.