Ok Pogaddat song mga Momorinta
13
Sumboy ong monolokotow diniyu mogunut song mga mimorinta sog bonuwa niyu pasal daꞌdun ok tow kibogoyan nok kowasa momorinta nok kanaꞌ tidu sok pogbayaꞌ nok Tuhan.
Ok Tuhan ong mikpoingkud dinilon bisan ayin bonuwahoy.
2 Dadi sima-sima ong mongatu sok parinta,
ong maana nin mingatu yanin sok piingkud nok Tuhan momorinta.
Dadi mosugat yanin nog hukuman dun.
3 Daꞌdun ok patut kondokan song mga sosuku nong mimorinta dinita,
liyu dona bilaꞌ minginang ita nok kolaatan.
Saan na bagun ondiꞌ ita mondok sok sosuku nong mimorinta dinita,
inangon ta ong mobais bagun kosuatan ilon.
4 Inimung ilon nok Tuhan nong mga sosuguonin para sok kobaisan ta.
Sugaid bilaꞌ moginang ita nok kolaatan,
dait dodaꞌ nong mondok ita,
poꞌ binogoyan ilon nok Tuhan nok kopatut sumiksaꞌ song mga tow nong monginang nong molaat.
5 Dadi sumboy tokodoy tumombaꞌ ita niyu sok parinta,
kanaꞌ hadja pasal ongon ok kondokan ta nok poksiksaꞌ tidu sok Tuhan,
sugaid bagun diꞌ sop mobogat ok pongatoyan ta.
6 Saan na sumboy mogbayad amu sop nog buwis,
poꞌ ong mga mogoginang sok parinta inangon nilon og winakil nok Tuhan dinilon.
7 Saan na bayadoy niyu ok patut bayadan bisan olo buwisoy dun,
bu pogaddatoy bu potas niyu ok sosuku nok tow nog dait pogaddatan.
Ok Poglasa song mga Duma ta Sumboy daꞌdun ok Kodoksuanin
8 Mga pigilugan,
bilaꞌ ongon og gutang ta,
diꞌ ta pobonon mogbayad,
sugaid ok poglasa ta sog duma ta,
sumboy daꞌdun ok kodoksuanin.
Poꞌ ok sosuku nok tow nong molasa sog duma nin manusiyaꞌ,
miunutin ok saraꞌ nok Tuhan.
9 Poꞌ og lam nong mga suguan nok Tuhan mamaꞌ nog,
“Diꞌ amu mogjina,
diꞌ amu momunuꞌ,
diꞌ amu monakow,
diꞌ amu monapsu,”a
bug mga duma pa,
misolobuk sok suguan nog,
“Kolasahoy niyu ok kodumahan niyu,
mamaꞌ nok poglasa niyu sog ginawa-baran niyu.”b
10 Ong mga manusiyaꞌ nog lumasa sog duma nilon,
diꞌ mokoinang nong molaat dinilon,
saan na bilaꞌ lumasa ita,
posabut dun mounut ta og lam nok suguan nok Tuhan.
11 Sumboy na dodaꞌ inangon niyu ong mamaꞌ nini,
pasal kiosunan niyu na nong minatong na og waktu nok sumboy motanud amu tidu sok poktulug niyu.
Poꞌ molani na ningkomun ok pogawon dinita posunguꞌ sok surgaꞌ tidu sog waktu nog ugat ita niyu pa tombaꞌ sog Al-Masih.
12 Mamaꞌ nong miyan og gobi,
bu posunguꞌ na sumilak og gondow.
Saan na bolongon ta niyu na ong mga ginang nok kolaatan nong misukuꞌ sok kodoloman,
bu inangon ta niyu og ginang nong mobais nong misukuꞌ sok kodolagan.
Poꞌ yonin koyon ok pononding bu pongatu ta sok kolaatan.
13 Pagga diyon ita na sok kodolagan,
sumboy mogusoy-usoy ok kotubuꞌ ta.
Diꞌ ita moglangu-langu bu moglami-lami monginang nong mokutaꞌ-utaꞌ.
Diꞌ ita mogjina atawa monginang nog olo-olo nong mokoliksok.
Diꞌ ita da sop monuwal atawa moima.
14 Sumboy diꞌ ita tokodoy mokpoduhul song napsu ta niyu,
sugaid kumboyon ta ok Panghuꞌ ta niyu Isa Al-Masih ong mononding dinita sok kolaatan.