Ok Kotubuꞌ nog Dumait song mga Moktotombaꞌ ni Isa Al-Masih
12
Dadi mga pigilugan ku,
pagga kilolatan amu nok Tuhan,
pongonihon ku tokodoy diniyu nok poglillaꞌ niyu ok kotubuꞌ niyu diyanin mamaꞌ nok kurban sutsi nong mokososuat sok Tuhan.
Yonin kini mamaꞌ nok poksombahayang niyu nok tabukonin.
2 Kanaꞌ amu mogdogiling song mga molaat nok tobiat nong mga tow kododunyahoy.
Sugaid posagadoy niyu nok poboguhon nok Tuhan ong mga pomikil niyu bagun kosunan niyu ok koleganin nong mobais,
jukup bu mokososuat diyanin.
3 Dadi biyan sok kolasa-kololat nog binogoy nok Tuhan dinakon,
taluon ku song monolokotow diniyu nong naꞌ niyu pikilon nong motas og ginawa-baran niyu.
Tibuwa pikil niyu ok tumolop song monolokotow diniyu mounut sok pongandol nog binogoy diniyu nok Tuhan.
4 Poꞌ ita mga moktotombaꞌ mamaꞌ nok solobuk lawas nong modakol og langkapin.
Ong mga langkapin sop koyon,
ondaꞌ pogbatuk ong mga ginangin.
5 Bu bisan modakol ita niyu,
solobuk ita niyu da mga moktotombaꞌ mamaꞌ nog lawas nog Al-Masih.
Dadi og lam ta niyu og langkapin,
bu misukpat ita niyu biyan diyanin.
6 Pagga kokoniya dinita niyu,
ondaꞌ pogbatuk og binogoy nok Tuhan nok kopandoyan biyan sok kolasa-kololatin,
sumboy gamiton ta na.
Na bilaꞌ ika ok tinogama nok poponogan nok Parman nok Tuhan,
sumboy nu posampoyon mounut sok kotombaꞌ nog binogoy dinika.
7 Bilaꞌ ika ok kibogoyan nog ginang nong monabang,
na inang nu.
Bilaꞌ sop ong moktonduꞌ ong misukuꞌ dinika,
na sumboy da sop moktonduꞌ a.
8 Bilaꞌ ok kopandoyan nu sop,
mokpolasig nok kotombaꞌ nong mga duma nu,
na inang nu.
Bilaꞌ binogoyan ka nok kopandoyan momogoy,
sumboy motawala.
Bilaꞌ binogoyan ka nok kopandoyan moglokounutan,
inang nu mahatul.
Bu bilaꞌ ok tinogama dinika,
moimunga molilolatoy,
inang nu dunut loliyag.
9 Sumboy ikhlas ok poglasa ta niyu.
Hallian ta niyu ong mga molaat bu potattapon ta ok kobaisan.
10 Inangon ta niyu ong moglinasahoy nong mamaꞌ tokodoy koyon nong mogilug,
bu moginunahoy ita niyu mogaddat song monolokotow dinita niyu.
11 Pokpotugos amu bu diꞌ amu moglolaꞌ-lolaꞌ sog ginang niyu.
Tolagadoy niyu bu bologbogoy niyu ok Panghuꞌ Isa nog ikhlas sok pongatoyan niyu.
12 Pogloliyag amu lolayun pasal sok pogdodama niyu sog janjiꞌ nok Tuhan nong matong diniyu,
sabaroy niyu ok kobinsanaan,
bu pongoni-ngoni amu lolayun sok Tuhan.
13 Poktabangoy niyu ong mga sukuꞌ nog Al-Masih sog diyalom nok kosigpitan nilon,
bu hurmat niyu pahatul ong mga tow nong mangoy diyon diniyu.
14 Pasal song mga tow nong mominsanaꞌ diniyu,
pongoni-ngonihoy niyu ilon nog barakatan ilon nok Tuhan.
Naꞌ niyu ilon suknaan!
15 Pogloliyag amu sog duma niyu bilaꞌ mogloliyag ilon.
Bilaꞌ sop mosusa ilon,
mosusa amu da sop.
16 Poksulut-sulut amu bug mga duma niyu.
Naꞌ amu mokpotas nog ginawa-baran niyu.
Diꞌ amu mongalang-alang mongampuan song mga tow nong mobabaꞌ kobotang-botang nilon.
Naꞌ amu mokpikil nog labi amu mokosun tidu dinilon.
17 Bilaꞌ ininangan amu nong molaton,
naꞌ niyu sulian nog ginang molaton,
sugaid pokpotubud amu moginang nong mobais sok ponontong nog lam nok tow.
18 Bilaꞌ mogdadi pogmuhut-muhutoy niyu tokodoy nong moksulut amu bug mga duma niyu.
19 Dadi mga kolasahan ku,
diꞌ amu tokodoy sumuliꞌ!
Pobayaꞌ niyu na sok pogmulkaꞌ nok Tuhan,
poꞌ misulat sog diyalom nok Kitab,
“Akon ok sumuliꞌ,
akon da ok tumungbas sok kolaatan nilon.”a
20 Unut niyu tibuwa ok sinulat kini sog diyalom Kitab,
“Bilaꞌ ginutom og banta niyu,
pokan niyu yanin,
bu bilaꞌ kinuwow,
na pinum niyu yanin.
Poꞌ bilaꞌ inangon niyu koyon,
mamaꞌ nok kitopukan og gulu nog banta niyu nog baga nog gapuy.”b
21 Naꞌ amu meleg dagon sog ginang nong molaat,
sugaid dagon niyu ok kolaatan biyan sok kobaisan.