Rum 10

Og Dalan sok Kologdongan

Dadi mga pigilugan, mosolag og legu nog awonon da nok Tuhan ong mga salu-bangsa u Yahudi, bu yonin tokodoy ok pingoni-ngoni u. 2 Kisaksian ku nog binologbogan nilon tokodoy ok Tuhan, sugaid daꞌ poksugat ok pomologbog nilon. 3 Sok koawam nilon, diꞌ ilon tumabuk nok pobiyan nok Tuhan bug ponoy ong manusiyaꞌ koampun bagun moimung mologdong. Migmuhut-muhut ilon mogunut sok saraꞌ bagun biyan dun moimung ilon mologdong. Tibuwa ondiꞌ ilon meleg mokpobabaꞌ sok Tuhan bangka tabukoy nok kologdong nog bogoyonin bosiya dinilon. 4 Og miunutin ok kotanan nok saraꞌ para sog lam nok tow, bagun sima-sima ong mongandol diyanin moimung mologdong sok ponontong nok Tuhan.

Ok Pogawon para sog Lam nong mga Mongandol ni  Al-Masih

5 Poꞌ yonin kini ok tinaluꞌ ni Nabi Musa pasal sok koimung nong manusiyaꞌ mologdong biyan sok saraꞌ, “Sima-sima ok tumombaꞌ sog lam nong mga suguan nok saraꞌ, motubuꞌ yanin solama-lama.” 6 Sugaid diꞌ ita na kologonan dun poꞌ tinumombaꞌ ita nong moitung nok Tuhan ong manusiyaꞌ mologdong biyan sok kopongandol ni Isa Al-Masih. Dadi pagga minonog na asal si Isa Al-Masih bagun moawon ong mga manusiyaꞌ, sumboy diꞌ amu mokpikil nong mangoy amu sok bagun poponogon niyu yanin sog dunya. 7 Bu pagga mitubuꞌ na og Al-Masih mokpuliꞌ, sumboy diꞌ amu da sop mokpikil nong mangoy amu sok poglihanan nong mga minatoy bagun potubuon niyu yanin tidu sok kopatoy. 8 Na kanaꞌ, poꞌ tinaluꞌ sok Kitab,

“Ok Parman nok Tuhan molani na diniyu

poꞌ diyon sog babaꞌ niyu bu sog diyalom pongatoyan niyu.”

Yonin da sop koyon ok pononduꞌ nok pikposampoy nami pasal bug ponoy moitung mologdong ong manusiyaꞌ biyan sok pongandolin.

9 Poꞌ moawon amu bilaꞌ angkonon niyu biyan sok taluꞌ niyu nok si Isa ok Panghuꞌ niyu, bu tombaan nok pongatoyan niyu nok pitubuꞌ yanin nok Tuhan tidu sok kopatoy. 10 Poꞌ sima-sima ok tumombaꞌ sog Al-Masih sog diyalom pongatoyanin bu mangkon nog yanin ok Panghuꞌ, miampun na yanin bu miitung mologdong bangka koawon. 11 Mamaꞌ na nong misulat sog diyalom nok Kitab, “Daꞌdun dodaꞌ ong mongandol diyanin nok kosipogan.” 12 Pasal daꞌdun ok pigbiddaan nong mga bug mga len bangsa, solobuk da ok Tuhan nong mogbayaꞌ sok kotanan ta niyu, bu miglabi-labi ok kobais nog bogoyonin sok sosuku nok sumabbut diyanin. 13 Poꞌ tinaluꞌ sok Kitab nok sima-sima ong mokitabang song ngalan nok Panghuꞌ, moawon.

14 Sugaid ponoy ilon mokitabang sok Panghuꞌ bilaꞌ daꞌ ilon pa ma tombaꞌ diyanin? Bu ponoy ilon da sop mokotombaꞌ diyanin bilaꞌ daꞌ ilon pa sibon pokodongog dun? Bu ponoy sop ilon mokodongog nok pasal sok Panghuꞌ bilaꞌ daꞌ ilon pa ma koposampoyoy dun? 15 Bu ponoy sop ilon mokopokposampoy bilaꞌ daꞌdun pa ma ok sinuguꞌ? Sugaid ongon da ong mga sinuguꞌ nok Tuhan mokposampoy, mamaꞌ nok sinulat sok Kitab, “Kololiyag tontongon ok tinumukad mokposampoy nong mobais nok suksugan.” 16 Sugaid kanaꞌ da lam nilon ok tumombaꞌ song kini, mamaꞌ nong mitaluꞌ ni Nabi ,

“U Tuhan, manu mikaan da ma ok tinumombaꞌ sok pokposampoy nami?”

17 Dadi ok pongandol miktidu sok koponginongog nong mga tow nok pononduꞌ, bu ok pononduꞌ tidu sok taluꞌ ni Isa Al-Masih. 18 Sugaid sakan ku amu: Manu, ondaꞌ taꞌ poginongog ong mga tow nong Mobais nok Suksugan? Tantu miginongog da ilon poꞌ misulat sog diyalom nok Kitab,

“Midongog ok tingog nong mga mokpoposampoy nok Parman nok Tuhan sog bisan ayin dapit,

bu ong mga taluꞌ nilon milatag sok kotilingkal dunya.”

19 Dadi sakan ku amu, Ondaꞌ taꞌ buwan kosabut nong mga Israel? Tantu misabut nilon, poꞌ tinaluꞌ nok Tuhan dinilon biyan ni Nabi Musa,

“Potiyangan ku amu moima sog len nog bangsa,

boyaan nong molingit amu,

poꞌ potongowon ku ok kololatu song mga tow nog awam pasal dinakon.”

20 Tubus si Nabi Isaya sooy motowakkal mokposampoy nok Parman nok Tuhan, taluꞌ in,

“Mibalaku nong mga kobangsahan

nog daꞌ ponontong dinakon,

mikpotongowu song mga tow

nog daꞌ poksak pasal dinakon.”

21 Sugaid pasal song mga tow Israel, ok taluꞌ nok Tuhan,

“Gondow-gobi binokladu ok komotu mogbagad nong mokpolani ilon dinakon,

sugaid sinumaggaꞌ ilon bu dinumugtul ilon dinakon.”