Ok Kobaisan nog Binogoy nok Tuhan diyon song mga Tow Israel
9
1-3 Na ongon ong mosolag nok korukkaan ku,
bu daꞌdun og lotaꞌ nok kosusahan sok pongatoyan ku pasal song mga pigilugan ku salu-bangsa u,
poꞌ daꞌ ilon tombaꞌ sog Al-Masih.
Atasan ku nog akon ong mosugat nong mulkaꞌ moksoliyu dinilon bu mosuwoy sog Al-Masih,
basta ilon moawon.
Motud ok taluon ku kini poꞌ miksolobuku sog Al-Masih,
bu mikposobonnal sop og Ruh nok Tuhan nog diꞌ u mogloput.
4 Modakol ong mitabuk nong mga salu-bangsa u Israela kini nok kobaisan tidu sok Tuhan.
Initung ilon nong mga gumbataꞌ in,
bu pitongowin dinilon ok kotasin bug kowasa nin.
Binogoyanin ilon nong mga pogjanjian,
bu piponoganin ilon nong mga saraꞌ.
Tinonduan ilon nok Tuhan bug ponoy ok poksumba diyanin,
bu modakol og jinanjiꞌ in dinilon.
5 Ponupuꞌ ilon niloꞌ Ibrahim,
Isahak bug Yaꞌkub.
Na si Isa Al-Masih binataꞌ sop sog dunya kini nok solokotow ponupuꞌ nilon.
Yanin ok Tuhan,
ong mokopogbayaꞌ sog lam nituꞌ,
bu daitan yanin pudjihon solama-lama.
Amin.
6 Motud nok kanaꞌ kotanan nok tow Israel tumombaꞌ nok si Isa Al-Masih ok piangoy nok Tuhan sog dunya bagun mogawon.
Sugaid bisan maꞌ nituꞌ,
diꞌ na mopinda og janjiꞌ nok Tuhan poꞌ kanaꞌ og lam nok tow Israel nong motud nok sukuꞌ in.
7 Maꞌ nituꞌ da sop song mga gumbataꞌ ni Nabi Ibrahim,
solokotow da dinilon og binogoyan nog janjiꞌ,
kanaꞌ ilon kotanan.
Tinaluꞌ nok Tuhan diyon ni Nabi Ibrahim nog biyan ni Isahak koongonan yanin nong mga ponupuꞌ nong mogoyit nong ngalanin.
8 Saan na posabut dun,
kanaꞌ tantu ok kotanan nok ponupuꞌ ni Nabi Ibrahim ong miitung nog gumbataꞌ nok Tuhan,
sugaid ong mga binataꞌ tibuwa mounut sog janjiꞌ in.
9 Poꞌ maꞌ ninya og janjiꞌ nok Tuhan diyon ni Nabi Ibrahim,
taluꞌ in,
“Sok tahun puliꞌ nong mamaꞌ da sop nog waktu kini,
mokpuliꞌ u da,
bu ongon na og bataꞌ ni Sarah nog laki.”b
10 Bu kanaꞌ hadja niyon,
poꞌ og bataꞌ ni Sarah koyon,
yonin na ok pingapuꞌ ta niyu si Isahak.
Poksolagin migduma ilon ni Ribeka,
bu migbataꞌ ilon nok kambal.
11-12 Na sog waktu nong molani na mogbataꞌ si Ribeka,
mikparman ok Tuhan diyanin,
taluꞌ in,
“Og bataꞌ nu nog gulang bataꞌ pogbayaan nong mongudin.”c
Miktaluꞌ ok Tuhan mamaꞌ niyon sog daꞌ pa pokoinang nong molaat atawa nong mobais ok kambal koyon,
poꞌ daꞌ ilon pa bataoy.
Dadi biyan dun mopotongowin song mga tow ok pokpiliꞌ in kanaꞌ pasal sok kopoginang nong manusiyaꞌ,
sugaid mounut sok koleganin bug maksudin.
13 Mamaꞌ na nong misulat sog diyalom nok Kitab,
“Kolasahan ku si Yaꞌkub,
kanaꞌ si Esaw.”
14 Dadi olo ong motaluꞌ ta pasal dun?
Maana nin taꞌ nok kanaꞌ mologdong ok Tuhan?
Mologdong na dodaꞌ!
15 Poꞌ miktaluꞌ yanin dituꞌ ni Nabi Musa,
“Molasa bu mololatu sok sima-sima ok kolasahan bu kololatan ku.”
16 Dadi mosabut ta nok kanaꞌ pasal sok kolegan nong manusiyaꞌ,
atawa pogmuhut-muhut ta moginang nok kobaisan nok potongowan ita nok kololat nok Tuhan,
sugaid pasal sok koleganin.
17 Mamaꞌ nok tinaluꞌ nok Tuhan diyon sok Pirꞌawn mounut song misulat sok Kitab,
“Ong maksudu nog inimungu ika nok sultan bagun biyan dinika potongowon ok kowasa u,
bu bagun motanyag ong ngalan ku ayin-ayin sog dunya.”d
18 Dadi tidu sog bayaꞌ nok Tuhan bug sima ok koleganin kololatan bu sima sop ok potogasonin ok pongatoyan.
Ong Mulkaꞌ bu og Lolat nok Tuhan song Manusiyaꞌ
19 Dadi sunoy mokopoktaluꞌ amu dinakon,
“Bilaꞌ maꞌ niyon,
manu tuntutan ma nok Tuhan ong manusiyaꞌ sog dusa nilon pagga daꞌdun ong mokosaggaꞌ sok koleganin?”
20 Sugaid sima a buwan manusiyaoy nog dumaawa a pa sok Tuhan?
Moksak pa taꞌ og inimung diyon song migimung diyanin,
“Manu inimung nu pa ma akon nong mamaꞌ nini?”
21 Daꞌdun taꞌ ok kopatut nong mogogimung nok kulon sog basak nok piggamitin?
Sog gabdun basak koyon mogdadi yanin mogimung nog duwaꞌ buk kulon,
solobuk polingkatonin para sok pokkoradjaan bu solobuk imungonin para usalon gondow-gondow.
22 Maꞌ niyon da sop ok Tuhan.
Ongon ok kopatutin mogmulkaꞌ bu mokpotongow nok kowasa nin.
Sugaid mosandal bu mosabar tokodoy yanin song mga manusiyaꞌ bisan pa daitan na ilon siksaon,
23 bagun potongowonin og ilakad nok kolasa-kololatin song mga tow nok kololatanin,
og ginantaꞌ in bahagian nok kotasin.
24 Ita sooy kini,
mionggat da sop moimung nok sukuꞌ in,
kanaꞌ hadja tidu song mga Yahudi,
sugaid sampoy da sop tidu song mga len bangsa.
25 Mamaꞌ nok Parman nok Tuhan nok piponog diyon ni Nabi Hoseya,
taluꞌ in,
“Ong mga tow nok kanaꞌ u piktowan tagnaꞌ,
tawagon ku na nok piktowan ku.
Og bangsa nok kanaꞌ u kolasahan tagnaꞌ,
tawagon ku na nok kolasahan ku.
26 Bu sog bonuwa nok tinaluan ilon tagnaꞌ nok kanaꞌ ilon piktowan ku,
dituꞌ na ilon ingalanoy nong mga gumbataꞌ nok Tuhan,
ok totubuꞌ solama-lama.”
27 Pasal da sop song mga tow Israel,
kini ok taluꞌ biyan ni Nabi Isaya,
“Bisan sooy ong mga tow Israel mamaꞌ kodakol nok pontad sog dagat,
mikaan da dinilon ong moawon
28 poꞌ botangon nok Tuhan og hukumanin dini sog dunya bu matong na dodaꞌ nog landuꞌ kosompun.”
29 Mamaꞌ nok pidinsamaꞌ tumaluꞌ biyan ni Nabi Isaya song masa tagnaꞌ,
“Bilaꞌ daꞌ ita bosiya kololatoy bangka samaoy nok Tuhan Mahatinggi nok ponupuꞌ ta,
koilingan ta bosiya mamaꞌ nong mga tow Sodom bug Gomorae nong mitipot pogmulkaan nok Tuhan.”
Ong mga Tow Israel bu ong Mobais nok Suksugan
30 Na olo na ong motaluꞌ taꞌ?
Ong mga kanaꞌ Yahudi mikobalak ilon nog dalan posunguꞌ sok kologdongan,
bisan daꞌ ilon ponontong dun.
Poꞌ initung ilon nok Tuhan mologdong pasal sok pongandol nilon ni Isa Al-Masih.
31 Sugaid ong mga tow Israel nong migmuhut-muhut moimung mologdong biyan sok pogunut nilon sok saraꞌ,
daꞌ nilon kobalak og dalan sok kologdongan poꞌ daꞌ nilon tokodoy kounut ok saraꞌ.
32 Dadi manu ondaꞌ nilon ma kobalak?
Pasal baluꞌ nilon moawon ilon nong mga ginang nilon.
Daꞌ ilon pongandol sog Al-Masih.
Mamaꞌ yanin nok solobuk batu nong mosipaꞌ bu mobuksak ong mga Yahudi dun pagga diꞌ ilon mongandol diyanin.
33 Ok pigbinaan ku,
ong misulat kini sog diyalom nok Kitab,
“Poginongog amu!
Ongon dituꞌ sog Jerusalemf og binotangu nog batu
nong mokobuksak song mga tow
nong mokosipaꞌ dun,
sugaid sima-sima ong mongandol diyaning,
ondiꞌ na dodaꞌ kosipogan.”