Rum 7

Ong mga Moktotombaꞌ ni ondaꞌ na sog diyaloman nok Saraꞌ

Mga pigilugan, diꞌ amu moawam sok saraꞌ, dadi mosabut niyu bayuꞌ ok posunguꞌ u taluon kini. Migbayaꞌ ok saraꞌ song mga tow sog bon nok totubuꞌ pa ilon, sugaid bilaꞌ minatoy na ilon, mipuwas na ilon dun. 2 Na soupama, mounut sok saraꞌ, ondiꞌ mokopoglaki puliꞌ og libun nok taga laki sog bon nok totubuꞌ pa og laki nin. Sugaid bilaꞌ matoy na og laki nin, mopuwas na yanin tidu sok saraꞌ koyon. 3 Dadi bilaꞌ sumolobuk yanin sog len laki sokaliꞌ totubuꞌ pa og laki nin, motawag yanin nok polojina. Tibuwa bilaꞌ minatoy na og laki nin, mipuwas na yanin bisan pa moglaki yanin sog len, bu diꞌ na motaluꞌ nog jina.

4 Dadi mga pigilugan, mipuwas ita da sop, bu ondaꞌ ita na kosakup sok saraꞌ, poꞌ mamaꞌ nong minatoy ita dunut ni Isa. Dadi ningkomun misakup ita na diyanin nok pitubuꞌ mokpuliꞌ bagun mokopoginang ita nong mopotas ok Tuhan dun. Mamaꞌ ita nok pun kayu nok tagnaꞌ daꞌdun og guna nin, sugaid ningkomun mosongkuꞌ na og bunga nin. 5 Sog waktu tagnaꞌ pigbayaan ita nong napsu ta mogdusa, bu migdungag pa ok pogdugtul ta sok Tuhan poꞌ kiosunan ta nok pigondiꞌ sok saraꞌ. Dadi ok koposunguan bosiya nok konapsuhan ta ok kosiksaan solama-lama. 6 Sugaid pagga misunuꞌ ita na sok kopatoy ni Isa , mipuwas ita na sok kowasa nok saraꞌ nong migbayaꞌ dinita tagnaꞌ.

Dadi mokopoktolagad ita na sok Tuhan, kanaꞌ na pibiyan sog dan nok sinulat sok saraꞌ kituꞌ, sugaid mounut sog bogu kotubuꞌ nog binogoy dinita biyan sog nog diyon sok pongatoyan ta.

Ok Saraꞌ bu og Dusa

7 Na olo na ong motaluꞌ ta? Ok saraꞌ taꞌ ong mokpoyit nong mga manusiyaꞌ sok kodusahan? Tantu kanaꞌ! Sugaid bilaꞌ daꞌdun ok saraꞌ, diꞌ u kosunan nog ongon og dusa u. Soupama ondiꞌ u kosunan nong monapsu og dusa bilaꞌ daꞌ kotaluꞌ sok saraꞌ nog diꞌ amu monapsu. 8 Tibuwa dangan kiosunan ku ong monapsu kini og dusa, uy na, migdungag pa tanan ong napsu u mogdugtul dun. Bilaꞌ daꞌdun ok saraꞌ, daꞌdun ok sene-sabut ta bug olo og dusa ta. 9 Ongon og waktu tagnaꞌ nong miawamu sok saraꞌ, bu ok pikilan ku mobais u nok tow bu daꞌdun og dusa u. Sugaid dangan kiosunan ku ok saraꞌ, tinumampal na nong mikodusa u, 10 bu og hukuman dinakon ok kopatoy, ong maana nin ok kosiksaan sog binayaꞌ gondow. Ong maksud bosiya nok saraꞌ, mogbogoy dinakon nong mosannang nok . Tibuwa ok pogdugtulu nok saraꞌ mogoyit dinakon sok kopatoy, 11 poꞌ og dusa sok pongatoyan ku ok sabapan saan na mooyitu, bu dugtulon ku ok saraꞌ. Balu u dun mokopogunutu sok saraꞌ, sugaid kiakkalan ku, poꞌ ondaꞌ u tokodoy kounut. Dadi dait dinakon nok siksaon ku sog binayaꞌ gondow. 12 Sugaid ok saraꞌ sutsi, bu ong mga suguanin sutsi, mobais bu mologdong.

13 Dadi ok saraꞌ taꞌ nong mobais koyon ong mokosuwoy dinita sok Tuhan? Tantu kanaꞌ motud! Sugaid og dusa ong mokosuwoy dinita sok Tuhan bu mogoyit dinita sok kosiksaan biyan sok saraꞌ. Dadi biyan sok saraꞌ nong mobais koyon, tumampal na tokodoy dinita bug ponoy ok kolaat nog dusa.

Og Leg sok Kobaisan bu og Leg sok Kolaatan

14 Na kiosunan ta nong miktidu ok saraꞌ sok Tuhan, sugaid ong manusiyaꞌ u da, modaliꞌ u pokodusa, mamaꞌ u hantang nog gulipon nog . 15 Ondiꞌ u mosabut og ginawa-baran ku. Poꞌ ong mobais nok kolegan ku inangon, diꞌ u moinang. Sugaid ong molaat nong mopoku inangon, yonin na og inangon ku. 16 Dadi bilaꞌ mopoku nok ponginangon ku kituꞌ nong molaat, ong maana nin mikpomotudu nong mologdong ok tinaluꞌ sok saraꞌ. 17 Dadi kanaꞌ na akon ong meleg monginang nini, sugaid og dusa nog dini dinakon. 18 Kiosunan ku nog daꞌdun ong mobais sok pongatoyan ku, poꞌ dinsamaꞌ dinakon ok pongaddatan nok kanaꞌ mokososuat. Poꞌ kolegan ku moginang nong mobais, sugaid sok kopagas nog ginawa-baran ku, ondaꞌ u koinang. 19 Poꞌ ok kobaisan nok kolegan ku inangon, daꞌ u da inangoy. Sugaid ong molaat nog ginang nog diꞌ u meleg inangon, koyon og ininangu. 20 Na bilaꞌ miginangu nog diꞌ u meleg inangon, ong maana nin kanaꞌ tidu sok kolegan ku, sugaid mioyitu nong napsu sog dusa nog dini dinakon. 21 Dadi ong minanamu yonin na nog bisan melegu monginang nong mobais, mosassatu da moginang nok kolaatan. 22 Migloliyagu sok saraꞌ nok Tuhan sog diyalom pongatoyan ku, 23 sugaid lolayun sumaggaꞌ ong napsu nog ginawa-baran ku sok saraꞌ kituꞌ, misaggowu nog dusa nog dini sok pongatoyan ku.

24 Kololat-lolatu tokodoy! Sima na taꞌ ong mokopuwas nog ginawa-baran ku bagun diꞌ u mokangoy sok kosiksaan? 25 Poꞌ ongon ok kolegan nok pongatoyan ku mogunut sok saraꞌ nok Tuhan, sugaid migunut og lawasu sok kodusahan. Na, ilakad ok poksarang-sukulu sok Tuhan, poꞌ yanin ok tinumabang dinakon biyan sok Panghuꞌ ta .