Rum 5

Pilogdong nok Tuhan ong Manusiyaꞌ pasal sok Pongandol sog Al-Masih

Na pagga mingandol ita na ni Al-Masih, inampun ong mga ta bu inimung ita na nong mologdong sok ponontong nok Tuhan. Dadi mosannang na ok kobotang-botang ta sok Tuhan biyan ni Isa Al-Masih, ok Panghuꞌ ta. 2 Biyan diyanin tinabuk ta ok nok Tuhan nok kanaꞌ ita bosiya dait bogoyan dun. Bu migloliyag ita sok pongandol bu pogdodama ta nong mokampuꞌ ita sok kotas nok Tuhan. 3 Mogloliyag ita bisan kodatongan ita nong mga kosusahan bug poksuloy, poꞌ kiosunan ta ok poktiggol nog logon, mokopoongon nok sabar dinita. 4 Bu ok kosabar ta, mokopoongon nong mobais nok pongaddatan, bu ong mobais nok pongaddatan, mokopoongon nok pogdodama ta sok Tuhan nong mobais og lomaꞌ-dinglag ta. 5 Bu ok pogdodama ta kituꞌ, tantu mounut poꞌ pilabi nok Tuhan dinita og lasa nin sog diyalom nok pongatoyan ta biyan sog nog binogoyin dinita.

6 Pagga daꞌdun ok pagas ta moginang nok kolegan nok Tuhan, piponogin si Isa Al-Masih dini sog dunya sog waktu nog ginantaꞌ in. Dadi piglillaꞌ nog Al-Masih ong nyawa nin para dinita niyu mga . 7 Moliyang bayuꞌ ong meleg moglillaꞌ nong nyawa nin bisan pa para sok solokotow nong mologdong. Tibuwa sunoy ongon da ong moglillaꞌ nong nyawa nin para sog duma nin tow nong mahatul. 8 Sugaid ok Tuhan, pitongowin ok solag nog lasa nin dinita niyu, poꞌ bisan mga baldusa ita sog waktu koyon, miglillaꞌ si Isa Al-Masih nong nyawa nin para dinita. 9 Pasal sok kobuyus nog duguꞌ ni Isa sok kopatoyin, initung ita nok Tuhan ningkomun nong mologdong, na tantu tokodoy awonon ita biyan diyanin tidu song mulkaꞌ nok Tuhan. 10 Poꞌ sog waktu nok sinumaggaꞌ ita pa sok Tuhan, sinulutin ita biyan sok kopatoy nog Bataꞌ in, na tantu tokodoy mosurgaꞌ ita biyan sok kotubuꞌ mokpuliꞌ nog Bataꞌ in. 11 Bu kanaꞌ tibuwa koyon. Mokopogloliyag ita da sop sok Tuhan poꞌ biyan sog ininang nok Panghuꞌ ta Isa Al-Masih sinumulut ita na sok Tuhan.

Ok Pogbiddaan nog Ininang ni Apuꞌ bu ni  Al-Masih

12 Og nong mga manusiyaꞌ miktagnaꞌ dangan dinugtul ni Apuꞌ Adam ok suguan nok Tuhan, bu pasal sog dusa nin miongon ok kopatoy. Dadi kidatongan og lam nong manusiyaꞌ nok kopatoy, poꞌ mikodusa og lam nilon. 13 Sog daꞌ pa piponog ok saraꞌ biyan ni Nabi Musa, ongon na og dusa, sugaid og dusa diꞌ itungon bilaꞌ daꞌdun pa ok saraꞌ. 14 Minsan pa mamaꞌ niyon, kadal na dodaꞌ nong mga manusiyaꞌ matoy tidu song masa ni Apuꞌ Adam sampoy na song masa ni Nabi Musa, minsan kanaꞌ batuk og dusa nilon ni Apuꞌ Adam. Na si Apuꞌ Adam bu si Isa Al-Masih, mamaꞌ nog ongon ok pigbatukan nilon poꞌ moposunguꞌ song mga manusiyaꞌ ong mga ginang nilon. 15 Tibuwa og ginang nog duwaꞌ kotow kini, ondaꞌ pogbatuk, poꞌ ok kodoksuan nog dusa ni Apuꞌ Adam, miongon ok kopatoy sog lam nong manusiyaꞌ. Sugaid ok kodoksuan nog ininang nok solokotow nok si Isa Al-Masih mobais tokodoy. Poꞌ pasal diyanin motabuk nong modakol manusiyaꞌ og labi-labi nok nok Tuhan. 16 Bu ok kolasa-kololat nog binogoy nok Tuhan, migbiddaꞌ sog dusa ni Apuꞌ Adam. Poꞌ ok kodoksuan nog dusa nin, hukuman sok kosiksaan. Tibuwa ok kodoksuan nog ininang ni Isa Al-Masih, miimung ita mologdong, bisan modakol og ininang ta nong mga dusa. 17 Poꞌ sabap sog dusa nok solokotow, pigbayaan ong mga manusiyaꞌ nok kopatoy. Tibuwa miglabi-labi ok kolasa-kololat bu kologdongan nok pomogoy nok Tuhan. Poꞌ koongonan ong mga manusiyaꞌ nok tumabuk dun nong mosannang nok kotubuꞌ, bu biyan ni Isa Al-Masih mokopogbayaꞌ ilon dunut diyanin.

18 Dadi tidu sok solobuk pogdugtul ni Apuꞌ Adam, hinukuman nok siksaꞌ og lam nong manusiyaꞌ, sugaid pasal sok solobuk nong mologdong nog ginang ni Isa Al-Masih, moitung og lam nong manusiyaꞌ nong mologdong bu kobogoyan nong mosannang nok kotubuꞌ. 19 Ong maana nin, tidu sok pogdugtul nok solokotow sok suguan nok Tuhan, miimung og lam nong manusiyaꞌ. Mamaꞌ niyon da sop, pasal sok poktombaꞌ nok solokotow mologdong kituꞌ, itungon mologdong ong modakol nong manusiyaꞌ mamaꞌ nog daꞌdun og dusa nilon.

20 Na populion ta sok saraꞌ. Piponog nok Tuhan ok saraꞌ kituꞌ bagun mosabut nong mga tow nong modakol na ong mga dusa nilon. Tibuwa dangan miksidakol og dusa nong mga tow, miglabi-labi pa ok kolasa-kololat nok Tuhan dinilon. 21 Bilaꞌ pigbayaan ong mga manusiyaꞌ nog dusa, ok posunguanin ok kopatoy, sugaid bilaꞌ pigbayaan ilon nok kolasa-kololat nog binogoy dinilon nok Tuhan, ok posunguan nilon ok sok . Poꞌ pasal sog ininang ni Isa Al-Masih ok Panghuꞌ ta, imungonin mologdong og lam nong mongandol diyanin.