Rum 4

Initung Mologdong si Nabi pasal sok Pongandolin

Na ningkomun, labiton ku diniyu pasal sok pongandol ni Nabi Ibrahim, ok pingapuꞌ ta nog bangsa Yahudi. 2 Bilaꞌ initung si Nabi Ibrahim nong mologdong pasal song mobais nog ginangin, mokopogabbu bosiya yanin. Sugaid ong motudin, daꞌdun og ikoabbu nin sok ponontong nok Tuhan. 3 Poꞌ tinaluꞌ sok Kitab, “Mingandol si Ibrahim sok tinaluꞌ nok Tuhan, dadi pasal niyon miitung yanin nong mologdong.”

4 Na soupama ong mga tow nong miginang, tindanan ilon, sugaid kanaꞌ na motaluꞌ nok pogbogoy da ok tindan nilon, poꞌ piktiksaan nilon ma koyon. 5 Tibuwa ong mga tow nog ondiꞌ mongandol song mga mobais nog ginang nilon, sugaid mongandol sok Tuhan nong mongampun song mga , ilon koyon og itungon nok Tuhan mologdong.

6 Tinaluꞌ da sop ni Nabi Daud ok pasal sog barakat nok tow nok pilogdong nok Tuhan nok kanaꞌ biyan sog ginangin, ok taluꞌ in,

7 Ilakad og barakat nong mga tow nog inampun nok Tuhan ok kolaatan nilon,

ong mga tow nok pinapas na ong mga nilon.

8 Ilakad og barakat nok sosuku nok tow nog diꞌ na bistahon nok Tuhan ong mga dusa nilon.

9 Og barakat nok pongampun kini, kanaꞌ tibuwa ami mga nong mokpoislam ok kobogoyan dun, sugaid misunuꞌ da sop ong mga len bangsa nog daꞌ koislam. Tinaluꞌ nami na ong misulat sok Kitab nong miitung si Nabi Ibrahim nong mologdong pasal sok kopongandolin. 10 Konanu initung nok Tuhan si Nabi Ibrahim nong mologdong yanin? Sog daꞌ pa yanin koislam atawa dangan inislam na? Sog daꞌ pa yanin koislam, miitung na yanin nong mologdong. 11 Tinabukin ok kopogislam, og gindanan nok sog daꞌ pa yanin koislam, miitung yanin nong mologdong sok ponontong nok Tuhan biyan sok kopongandolin. Miinang kini bagun moimung yanin nog gommaꞌ sog lam nog daꞌ koislam, sugaid mongandol sok Tuhan nong mogitung dinilon mologdong. 12 Yanin da sop og gommaꞌ nok sosuku nong mga miislam, kanaꞌ pasal hadja sok kopogislam dinilon, sugaid pasal da sop sok kopongandol nilon nog batuk sok kopongandol ni Nabi Ibrahim sog daꞌ pa yanin koislam.

Og Janjiꞌ nok Tuhan song mga Mingandol diyanin

13 Jinanjian nok Tuhan si Nabi nok pusakaon diyanin bug mga ponupuꞌ in og dunya. Miongon og janjiꞌ kini kanaꞌ pasalan sok kopogunut ni Nabi Ibrahim sok saraꞌ, sugaid mitabukin koyon poꞌ initung yanin nok Tuhan nong mologdong pasal sok pongandolin. 14 Poꞌ bilaꞌ soupama og janjiꞌ nok Tuhan koyon bogoyonin dituꞌ song mga tow nong migunut sok saraꞌ, daꞌdun da bosiya ok kopologunahan nok pongandol, bu daꞌdun da sop bosiya og jatu nog janjiꞌ nok Tuhan. 15 Pondom niyu, sok saraꞌ kini, ongon ong mulkaꞌ song mga tow nog dinumugtul dun. Tibuwa bilaꞌ daꞌdun ok saraꞌ, daꞌdun sop og dugtulon.

16 Dadi og janjiꞌ motabuk pibiyan sok pongandol bagun tidu sok nok Tuhan moalap nog lam nong mga ponupuꞌ ni Nabi Ibrahim. Og janjiꞌ kini kanaꞌ tibuwa sog lam nok salu-bangsa ni Nabi Ibrahim nong misakup sok saraꞌ, sugaid sampoy da sop song mga len bangsa nong mongandol da sop mamaꞌ diyanin. Dadi pasal sok pokpongandol, yanin og gommaꞌ ta. 17 Poꞌ mamaꞌ nini ok sinulat sok Kitab pasal ni Nabi Ibrahim, taluꞌ nok Tuhan, “Imungon ku ika nog gommaꞌ nong modakol nog bangsa.” Miunut kini poꞌ mingandol si Nabi Ibrahim sok Tuhan, ong mokpotubuꞌ mokpuliꞌ song mga minatoy bu mokpoongon sododuun nong mga olo-olo biyan hadja sok Parmanin. 18 Dadi bisan daꞌdun na ok pogdodamahan nong mokobataꞌ og libunin nok si , migdodama da si Nabi Ibrahim nong moimung yanin nog gommaꞌ nong modakol nog bangsa. Poꞌ mingandol yanin sok Tuhan nog bologboganin og jinanjiꞌ diyanin, “Ong mga ponupuꞌ nu mamaꞌ kodakol nong mga bitun.” 19 Ondaꞌ da kawaꞌ ok kopongandol ni Nabi Ibrahim sok Tuhan bisan kiosunanin nong mogulang na yanin, poꞌ lam-lam na sogatus tahun og gumulin. Bu si Sarah, og libunin, diꞌ mokopogbataꞌ poꞌ baug yanin. 20 Ondaꞌ tokodoy pogduwaꞌ-duwaꞌ si Nabi Ibrahim sog jinanjiꞌ nok Tuhan diyanin, tibuwa miksipagas tanan ok kopongandolin, bu mikpudji yanin sok Tuhan. 21 Poꞌ mitantu ni Nabi Ibrahim nog ongon ok kowasa nok Tuhan momologbog sog jinanjiꞌ in. 22 Dadi mamaꞌ nok sinulat sok Kitab, “Pasal sok kopongandolin miitung yanin nong mologdong.” 23 Sugaid ok pigbinaan sok taluꞌ kini sok Kitab nog initung nong mologdong ok tow pasal sok kopongandolin, kanaꞌ hadja si Nabi Ibrahim. 24 Misunuꞌ ita da sop song mga initung nok Tuhan nong mologdong. Poꞌ sima-sima ong mongandol sok Tuhan nok pitubuꞌ puliꞌ si ok ta tidu sok kopatoy, itungon yanin mologdong. 25 Winakil si Panghuꞌ Isa bagun patoyon pasal song mga ta, bu pitubuꞌ da yanin mokpuliꞌ bagun moimung ita nong mologdong sok ponontong nok Tuhan.