Ok Tuhan Moliunungoy
3
Na pagga maꞌ niyon,
olo ma ok kobaisan malap nong mga Yahudi tidu song mga len bangsa?
Bu olo taꞌ ok kopologunahan nog islamon ilon?
2 Modakol ok kopologunahan nong mga Yahudi dun.
Muna-muna tokodoy kipongandolan ilon nok Tuhan nok Parmanin.
3 Na kiosunan ta nog ongon ong mga tow bangsa Yahudi nog diꞌ moliunungoy sok Tuhan.
Dadi pagga diꞌ ilon moliunungoy,
maana nin taꞌ nog diꞌ da sop moliunungoy ok Tuhan?
4 Ondiꞌ tokodoy!
Poꞌ ok Tuhan lolayunin unuton og janjiꞌ in bisan og lam nong manusiyaꞌ mokoloput bu diꞌ kopongandolan mamaꞌ nok tinaluꞌ sog diyalom Kitab,
“U Tuhan,
mattan nong mologdong og hukuman nu,
bu bilaꞌ ongon ok sumilaꞌ dinika,
motampal tokodoy nog ika ong mosobonnal.”ab
5 Na sunoy ongon ong mokotaluꞌ,
“Bilaꞌ ok kokulang nok kologdong nong manusiyaꞌ mokpotampal nok kologdong nok Tuhan,
mamaꞌ nok kanaꞌ dait nong mosugat ita nong mulkaꞌ in bilaꞌ mokodusa ita.”
Na mamaꞌ niyon nok taluꞌ tidu da sok pikilan nong manusiyaꞌ.
6 Tantu kanaꞌ motud koyon!
Poꞌ bilaꞌ ok Tuhan kanaꞌ da mologdong,
ponoy yanin mokoponghukum song mga manusiyaꞌ sog dunya?
7 Sugaid sunoy ongon pa og dumaawa,
taluꞌ in,
“Pasal sok kopogdugtulu nok saraꞌ nok Tuhan biyan sok kopogloput,
kitampalan ong mga tow nok kosobonnalanin,
bu pasal dun potason yanin.
Dadi manu hukumon ku pa ma nok Tuhan nog akon og baldusa?”
8 Sambatan nong mga tow nong meleg lumaat dinami,
pinaluꞌ nami nog golom pa monginang ita nong molaton bagun motampal ok kobaisan nok Tuhan.
Ong mga moktaluꞌ nong mamaꞌ niyon,
dait siksaon nok Tuhan.
Og Lam nong mga Tow Baldusa
9 Sunoy ongon ong mokpikil nok pilabi ita mga Yahudi tidu song mga len bangsa.
Na kanaꞌ koyon motud.
Pitampalu na song mga Yahudi bug mga len bangsa nog batuk ita kotanan pigbayaan nog dusa.
10 Mamaꞌ nong misulat sok Kitab,
“Daꞌdun bisan solokotow ong mologdong sok ponontong nok Tuhan.
11 Daꞌdun ong mikosabut pasal sok Tuhan,
bu daꞌdun ok tow nong migmuhut-muhut tokodoy mongongosun diyanin.
12 Tinumolikod og lam nilon sok Tuhan,
kibolongan ilon nok kopologunahan para sok Tuhan.
Daꞌdun bisan solokotow ong monginang nok kobaisan.c
13 Ok ponaluon nilon,
ilakad pokolaton,
mamaꞌ nog goduꞌ song mibungkal nok kubul.
Limbungan nilon og duma nilon,
miktogduꞌ-togduꞌ og bisa nong mamak sog dilaꞌ nilon.d
14 Og babaꞌ nilon miponuꞌ nok suknaꞌ bu mokosakit nok taluꞌ.e
15 Mikaꞌ-mikaan sabapan,
momunuꞌ ilon mogdayun.
16 Minsan ayin ilon angoy,
mogbagak ilon nok kolaatan bug kosusahan.
17 Ondaꞌ nilon kosunoy og dalan sok poksulut-sulut.f
18 Bu daꞌdun og gondok nilon sok Tuhan.”g
19 Kiosunan ta nok kotanan nong misulat sok saraꞌ tinaluꞌ song mga Yahudi,
poꞌ sog diyalom ita nok saraꞌ.
Dadi daꞌdun ong mokotaluꞌ nog ondiꞌ ilon siksaon.
Ok kotanan ta niyu manusiyaꞌ madap sok Tuhan pasal song mga dusa ta.
20 Poꞌ daꞌdun tokodoy ok tow nong moitung mologdong sok ponontong nok Tuhan biyan sok saraꞌ ni Nabi Musa,
poꞌ ondiꞌ ta niyu da mounut ok kotanan.
Sugaid ok saraꞌ kini piponog nok Tuhan song mga manusiyaꞌ,
bu biyan dun kosunan ta ong mga dusa ta.
Moimung Mologdong ok Tow biyan sok Kopongandol
21 Sugaid ningkomun pisabut nok Tuhan og dalan bagun moimung mologdong ong mga manusiyaꞌ nok kanaꞌ pobiyan sok saraꞌ.
Kisaksian koyon sok Parman nok Tuhan nok sinulat sok Kitab Tawrat bu song mga konabi-nabihanh.
22 Og lam nong mongandol ni Isa Al-Masih,
imungon ilon nok Tuhan nong mologdong.
Poꞌ daꞌdun ok pilabi nin,
23 pasal og lam ta manusiyaꞌ mikodusa bu molayuꞌ ita niyu sok Tuhan.
Kanaꞌ ita dumait mosunuꞌ sok kotasin.
24 Tibuwa tidu sok kolasa-kololat nog bogoyon nok Tuhan song mga manusiyaꞌ,
moimung ita mologdong biyan ni Isa Al-Masih nong mokopuwas dinita song mga dusa ta.
25 Piangoy yanin nok Tuhan dini sog dunya bagun moimung nok kurban biyan sok kopoglillaꞌ in nog duguꞌ-nyawa nin bagun moampun ong mga dusa nok sima-sima ong mongandol diyanin.
Poꞌ biyan dun pitongow nok Tuhan ok kologdongin,
poꞌ kobalan sok kosabarin,
ondaꞌ in pa hukumoy ong mga dusa nong mga manusiyaꞌ sok tagnaꞌ kituꞌ.
26 Sugaid sog waktu kini pitongow nok Tuhan nong mologdong yanin,
bu ampunonin bu imungonin mologdong ok sima-sima towoy nong mongandol ni Isa Al-Masih.
27 Dadi pagga og lam niyon koyon og ginang nok Tuhan,
daꞌdun da ong mopongabbu ta.
Poꞌ miimung ita mologdong,
kanaꞌ biyan sok kopogunut ta sok saraꞌ kituꞌ,
sugaid biyan sok kopongandol ta ni Isa Al-Masih.
28 Dadi tinumombaꞌ ita nog imungon nok Tuhan ok tow mologdong biyan sok pongandolin bu kanaꞌ biyan sok pogunutin sok saraꞌ.
29 Bu ok Tuhan,
ok Tuhan nog lam nog bangsa.
Kanaꞌ tibuwa yanin ok Tuhan nong mga Yahudi,
sugaid ok Tuhan da sop yanin nong mga len bangsa,
30 poꞌ solobuk da ok Tuhan.
Dadi solobuk da og biyanan nok Tuhan bug ponoy imungonin ilon nong mologdong.
Saan na bisan inislam ong mga tow atawa ondaꞌ,
itungonin ilon nong mologdong pobiyan sok kopongandol nilon diyon ni Isa Al-Masih.
31 Kanaꞌ tokodoy ong maana nin nog daꞌdun na ok kopologunahan nok saraꞌ nok piponog nok Tuhan diyon ni Nabi Musa sowkat nog ita niyu mingandol ni Isa Al-Masih.
Tantu kanaꞌ,
poꞌ biyan sok kopongandol ta,
labi ta pa tanan unuton ok saraꞌ in kituꞌ.