Ok Sulat ni Pol para song mga Moktotombaꞌ sog
RUM
Salam-duwaa
1
1-3 Salam-duwaa diyon diniyu mga pigilugan ku sok siyudad nog Rum.
Akon kini si Pol ong miksulat diniyu.
Solobuku gulipon ni Isa Al-Masih.
Piniliꞌ bu kiwakilan ku nok Tuhan mokpoposampoy nong Mobais nok Suksugan pasal sok pogawon biyan sog Bataꞌ in nok si Isa Al-Masih.
Yonin na ok pidinsamaꞌ jumanjiꞌ nok Tuhan song mga manusiyaꞌ pibiyan song mga konabihanin mamaꞌ nok sinulat sog diyalom nok Kitab Sutsi.
Dadi piangoy nok Tuhan og Bataꞌ in dini sog dunya moimung nong manusiyaꞌ.
Na pasal sok kobataꞌ in,
miktidu yanin sok pangkatan ni Sultan Daud.
4 Bu mikposobonnal og Ruh Mahasutsi nog yanin ong mokowasa nog Bataꞌ nok Tuhan biyan sok pokpotubuꞌ in puliꞌ tidu sok kopatoy.
Yonin kini si Isa Al-Masih,
ok Panghuꞌ ta.
5 Na biyan ni Isa Al-Masih mikotabuk ami nong mga kodumahan ku nok kolasa-kololat nok Tuhan,
bu kiwakilan ami moimung nong mokpoposampoy sog lam nok kobangsa-bangsahan pasal dun.
Mikposampoy ami bagun ilon mongandol bu tumombaꞌ ni Isa Al-Masih,
bu biyan dun mopotas ong ngalanin.
6 Dadi amu sooy koyon,
inonggat amu na moimung nok sukuꞌ ni Isa Al-Masih.
7 Na amu koyon diyon sok siyudad nog Rum,
ong mga kolasahan nok Tuhan nog inonggatin moimung nong mosutsi nok sukuꞌ in,
bung mayan modiyon da diniyu ok kolasa-kololat bug kosannangan tidu sok Tuhan og Gommaꞌa taꞌ niyu bu ni Panghuꞌ Isa Al-Masih.
Kolegan ni Pol Tumibow sok Siyudad nog Rum
8 Muna-muna moksarang-sukulu sok Tuhan biyan ni Isa Al-Masih pasal sog lam niyu.
Moksukulu poꞌ ok pongandol niyu diyanin mikanat na og dongoganin song mga kobonuwahan.
9 Ok Tuhan ok saksiꞌ u nog lolayun ku amu pongoni-ngonihan.
Yanin ok tolagadan ku nog ikhlas biyan sok pokposampoyu nong Mobais nok Suksugan pasal sog Bataꞌ in.
10 Lolayun ku mongoni-ngoni sok Tuhan nog bung mayan tidu sok koleganin,
duhulonin dinakon nong mokotibowu diyon diniyu.
11 Poꞌ mosolag og legu nong motongowu amu bagun amu kobarakatan nok kopandoyan tidu sog Ruh nok Tuhan,
bu bagun tidu diyon moksipagon ok kopongandol niyu.
12 Dadi logdongon ku ok taluꞌ u kini,
melegu mangoy diyon diniyu bagun moksipagas ok pongandol nong monolokotow dinita niyu.
13 Mga pigilugan ku,
kolegan ku nok kosunan niyu nong mologodu na mokpikilan tumibow diniyu,
tibuwa kisaggaan ku sampoy ningkomun.
Saan na melegu tumibow diniyu bagun ongon da sop ong mooyitu tumombaꞌ ni Isa Al-Masih mamaꞌ nog ininangu sog duma nog bangsa nok kanaꞌ Yahudi.
14 Poꞌ wajib dinakon mokposampoy sog bisan olo bangsahoy,
song mga tow Grik atawa mga tow tidu sog len bangsa,
song mga modalom ok kokosun nilon atawa song mga daꞌdun.
15 Dadi ilakad og legu mangoy diniyu bagun ku moposampoy da sop ong Mobais nok Suksugan pasal ni Isa Al-Masih diyon sok siyudad nog Rum.
16 Ondiꞌ u tokodoy mosipog mokposampoy nong Mobais nok Suksugan kini,
poꞌ biyan dun motampal ok kowasa nok Tuhan mogawon sok sima-sima nong mongandol ni Isa Al-Masih,
tagnaan song mga Yahudi mangoy song mga len bangsa.
17 Pitongow nong Mobais nok Suksugan kini ponoy miitung nok Tuhan ong manusiyaꞌ mologdong biyan sok kopongandol.
Poꞌ tinaluꞌ sok Kitab,
“Ok tow nong miimung mologdong biyan sok kopongandolin,
motubuꞌ nog daꞌdun ok kodoksuanin.”b
Pogmulkaan nok Tuhan og Lam nok Kolaatan
18 Pitongow nok Tuhan ong mulkaꞌ in tidu sok surgaꞌ sog lam nok kolaatan nong mga manusiyaꞌ nog daꞌdun og gondok nilon diyanin.
Mogbuni ilon saan nok kosobonnalan pasal sok Tuhan biyan song molikoꞌ nok kohinangan nilon.
19 Poꞌ ok kosobonnalan pasal sok Tuhan,
motampal na song manusiyaꞌ poꞌ pitongow nok Tuhan dinilon.
20 Poꞌ bisan ok Tuhan diꞌ motongow nong manusiyaꞌ,
motongow nilon ok pongaddatan nok Tuhan bug kowasa nin nog daꞌdun ok kodoksuanin biyan sog lam nok piongonin tidu sok pokpoongonin nog dunya.
Dadi ondiꞌ mokodaawa ong mga manusiyaꞌ nong miawam ilon sok Tuhan.c
21 Poꞌ bisan ongon ok kokosun nilon pasal sok Tuhan,
ondaꞌ nilon da potasoy atawa poksarang-sukuloy nog dait para sok Tuhan.
Daꞌdun ok kopologunahan nok pomikil nilon.
Mamaꞌ ilon nok tow mongikap sok kodoloman poꞌ diꞌ nilon mosabut ok kosobonnalan.
22 Tinaluꞌ nilon nong modalom ok kokosun nilon,
sugaid ong motudin,
dupangon ilon.
23 Ok piksumba nilon,
ong mga tuhan-tuhan nok kobayuꞌ-bayuꞌ nong manusiyaꞌ,
manuk-manuk bug binatang nong mopapas da,
gabaꞌ sok poksumba nilon sok Tuhan nong motas bu daꞌdun ok kodoksuanin.
24 Saan na pitiyangan ilon nok Tuhan song mga konapsuhan nok pongatoyan nilon,
bu miksinammaloy ilon nog lawas nok kodumahan nilon manusiyaꞌ biyan sog ginang nong mokosipog-sipog.
25 Piksoliyu nilon sog loput ok kosobonnalan pasal sok Tuhan.
Dadi ok piksumba bu piktolagadan nilon,
ong mga piongon nok Tuhan,
kanaꞌ ong Mikpoongon,
sugaid yanin dodaꞌ ok patut pudjihon solama-lama.
Amin.
26 Saan na pitiyangan ilon nok Tuhan monginang nong mga mokosipog-sipog nok konapsuhan.
Bisan ong mga kolibunan nilon,
daꞌ na unutoy ok pokkolibun nilon,
sugaid mosolag ong napsu nilon sok pogkahi nilon libun.
27 Ong mga kolakihan sooy,
binolong nilon da sop ok pokkolaki nilon nog dait bosiya ilon meleg sok kolibunan.
Mosolag tokodoy ong napsu nilon sok pogkahi nilon laki monginang nong mokosipog-sipog.
Saan na ok tumbas nilon,
siksaon ilon nok Tuhan nog dait sog dusa nilon.
28 Pagga tinolikudan nilon ok kokosun pasal sok Tuhan,
na pitiyangan na nok Tuhan nong molikoꞌ ok pikilan nilon,
bu monginang ilon nog daꞌ poksugat.
29 Miponuꞌ ilon nog ginisan nok kolaatan,
kojongki,
konapsu sog olo-olo bug koima.
Kolegan nilon tokodoy mokponuwal,
momunuꞌ,
monglimbung bu monglibak sog duma nilon.
30 Monglaat ilon nog dongog nok kodumahan nilon,
molingit ilon sok Tuhan,
bu babaꞌ-babaon nilon ong mga pokasi nilon,
moabbu bu mogbantug ilon.
Ilakad ilon kopandoy momikil monginang nok kolaatan,
bu diꞌ ilon tumombaꞌ song mga mokogulang nilon.
31 Ilon ong mga tow dupang,
ondiꞌ ilon kopongandolan,
bu daꞌdun og lasa bug lolat nilon sog duma nilon.
32 Kiosunan nok towanan koyon nok patut siksaon nok Tuhan sok kopatoy ok sosuku nog dinumugtul song mga mologdong nok suguanin koyon.
Sugaid bisan maꞌ nituꞌ,
ininang nilon da tokodoy.
Bu linoliyag ilon da sop sok sosuku nok tow nong monginang nong mamaꞌ niyon.