Ok Pitu Kotow nok Kiwakilan Moktabang song mga Mokpoposampoy
6
Song mga waktu koyon,
migdodungag og dakol nong mga mogogunut ni Isa.
Na migdang ong mga Yahudi nog bahasa nilon Grik song mga Yahudi nog bahasa nilon Ibrani,
poꞌ ong mga duma nilon nog balu libun,
kiliyusan bogoyan nok tabang nok pomogoyon gondow-gondow.
2 Dadi tinawag nok sopuluꞌ bu duwaꞌ mokpoposampoy og lam nong mulid,
bangka nilon taluoy,
“Kanaꞌ mobais nok posagadan nami ok pongnasihat nok Parman nok Tuhan bagun hadja moadap ok pogbahagiꞌ nok tabang.
3 Saan na mga koilugan,
pomiliꞌ amu tidu sok kodumahan niyu pitu kotow laki nong mobais og dongogan nilon.
Sumboy pigbayaan ilon nog Ruh nok Tuhan bu taga kokosun.
Ilon da og wakilan nami nog ginang koyon.
4 Sugaid ami,
monamal ami mongoni-ngoni bu mokposampoy nok Parman.”
5 Na kisulutan og lam sok tumpukan koyon sok tinaluꞌ nong mga mokpoposampoy.
Piniliꞌ nilon si Istepan,
ok tow nong mopagon ok pongandolin bu diyon diyanin og Ruh nok Tuhan,
doksuꞌ si Pilip,
Prokoros,
Nikanor,
Timon,
Parmenas,
bu si Nikolas ok tow Antiyok nong minuliꞌ sog agama Yahudi.
6 Tubus inoyit nilon ok pitu kotow koyon dituꞌ song mga mokpoposampoy.
Dadi dinoponan nilon bu pingoni-ngonihan nilon.
7 Dadi ok Parman nok Tuhan,
mikanat,
bu miksidakol tokodoy ong mga tow nok tinumombaꞌ ni Isa dituꞌ sog Jerusalem sampoy na modakol sop nong mga koimaman migunut sok kotombaꞌ koyon.
Sinaggow si Istepan
8 Si Istepan kini,
miponuꞌ nok kolasa-kololat bug kowasa nok Tuhan,
bu modakol ong miinangin nong mga mokosobuꞌ-sobuꞌ sog gadapan nong mga tow.
9 Tibuwa ongon ok tumpukan nog Yahudi nok sinumaggaꞌ ni Istepan tidu sok solobuk poksumbahan Yahudi nok pogingalanan nong Mga Miawaꞌ sok Koulipon.
Ilon kini ong mga bangsa Yahudi nong miktidu sog bonuwa Kirene,
Aleksandriya,
Silisiya bug Bataꞌ-bataꞌ Asiya.
Dimaawa ong mga tow kini ni Istepan.
10 Sugaid diꞌ ilon mokatu sok kokosun ni Istepan bu sog Ruh nok Tuhan nok piktiduhan nok pinaluꞌ in.
11 Doksuꞌ miktindan ilon nong mga tow bagun moktaluꞌ nog loput,
long nilon,
“Midongog nami si Istepan moktaluꞌ nong molaat diyon ni Nabi Musa bu sok Tuhan.”
12 Dadi sabap sok kopongimung-ngimung nilon koyon diyon ni Istepan,
kitungihan dun ong mga tow bug mga migmokogulang bug mga guru agama.
Saan na sinaggow nilon yanin bangka nilon oyitoy sok Poghukuman nilon.
13 Tubus minalap ilon nong mga sumaksiꞌ nog loput,
taluꞌ nilon,
“Ok tow kini,
ondaꞌ lotaꞌ moktaluꞌ nong molaat sog Baloy Sutsi kini bu sok saraꞌ ta.
14 Midongog nami yanin moktaluꞌ nog ladakon ni Isa nok tow Nasaret,
og Baloy nok Tuhan kini,
bu gantianin ong mga gaddat nok pisampoy dinita ni Nabi Musa.”
15 Na piglonglongan yanin nog lam nok tow sok poghukuman koyon,
bu mitongow nilon og bayuꞌ-bayuꞌ in,
mamaꞌ na nog bayuꞌ-bayuꞌ nong malaikat.