Kiulian og Daday
3
Solobuk gondow sog lisag tolu nog lolabung,
timukad siloꞌ Petros bug Yahiyaa posunguꞌ sog Baloy nok Tuhan sog waktu nok sombahayang.
2 Pogdopot nilon sog bongowan nog iningalanan nong Molingkat diyon sog Baloy nok Tuhan,
ongon og daday tidu pa sok kobataꞌ dun og ugat pa kooyit diyon.
Gondow-gondow yanin botangon sog bongowan koyon bagun monglimus song mga tow nok sumolod.
3 Dangan mitongowin si Petros bu si Yahiya nok posunguꞌ sumolod sog Baloy nok Tuhan,
mingoni yanin nok sin.
4 Na piglonglongan yanin ni Petros bu ni Yahiya,
bangka poktaluꞌ si Petros,
“Tontonga dinami.”
5 Dadi timontong yanin dinilon poꞌ ong niyatin bogoyan yanin nok sin.
6 Tibuwa taluꞌ ni Petros diyanin,
“Daꞌdun tokodoy ok sin ku,
sugaid ongon og bogoyon ku dinika,
song ngalan ni Isa Al-Masih nok taga Nasaret,
indoga bangka a panow.”
7 Dadi inonggaydan ni Petros og daday koyon sok komotin nog lintu bangka nin pindogoy.
Na sododuun taga pagas na og botisin bug buku-bukunin.
8 Limoksu yanin mindog bangka panow.
Migunut yanin dinilon sumolod sog Baloy nok Tuhan,
mipanow yanin bu migloksu-loksu dunut pudji nin sok Tuhan.
9 Mitongow nog lam nok tow nong mipanow yanin bu mikpudji sok Tuhan.
10 Kilalahan nilon nog yanin ong migingkud mokponglimus dituꞌ song Molingkat nog Bongowan sog Baloy nok Tuhan,
dadi misobuꞌ tokodoy ilon bug olo ong mikobiyan diyanin.
Ok Pongnasihat ni Petros
11 Dangan daꞌ suwoy ok tow koyon ni Petros bu ni Yahiya,
ginumobok moktopuk og lam nok tow dinilon sok pogingalanan nok Pogbiyanan ni Sulayman,
poꞌ kisobuan ilon tokodoy.
12 Poktontong ni Petros niyon,
tinaluanin ilon,
“Mga tow Israel,
manu misobuꞌ amu ma nini bu manu piglonglongan niyu ma ami?
Song niyat niyu mipopanow nami taꞌ ok tow kini tidu sok kowasa atawa sok pogammal nami?
Na kanaꞌ.
13 Ok Tuhan niloꞌ Ibrahim,
Isahak,
Yaꞌkub bug mga pingapuꞌ ta,
pitongowin diniyu ok kotas nok sosuguonin nok si Isa.
Tibuwa inuwakil niyu yanin song mga kounutan bu pinoliluhan niyu sog gadapan ni Gubernur Pilatu bisan misolobuk na ok pikilanin nok poluwason yanin.
14 Si Isa ok Sutsi bug Mologdong pinoliluhan niyu,
bangka niyu pongonihoy poluwason diniyu ok tow nok polomunuꞌ.
15 Pinatoy niyu ok pun nok kotubuꞌ,
sugaid pitubuꞌ yanin nok Tuhan tidu sok kopatoy.
Ami ok saksiꞌ sok pasal niyon.
16 Na kobalan nok pagas nong ngalan ni Isa bug pongandol diyanin,
yonin na ong mikokuliꞌ sok tow kini nong mitongow bu kilala niyu.
17 Dadi mga pigilugan ku,
kiosunan ku nok kulang ok sene-sabut niyu bug mga kounutan niyu sog ininang niyu ni Isa.
18 Sugaid biyan diyon,
inunut nok Tuhan og olo-olo ok pidinsamaꞌ in song mga konabihan sok timpu tagnaꞌ,
nok sumboy miyan sok kobinsanaan og Al-Masih,
ong Mipiliꞌ in kituꞌ.
19 Dadi poktowbat amu,
bu pokpuliꞌ amu sok Tuhan,
bagun mopapas og lam nog dusa niyu
20 boyaan datongan amu nok kobaisan tidu sok Tuhan,
bu pangoyonin puliꞌ dini og Al-Masih ong mipiliꞌ para diniyu,
yonin na si Isa.
21 Sugaid sumboy dituꞌ pa si Isa sok surgaꞌ toktob poboguhon nok Tuhan og lam nituꞌ mamaꞌ nok pidinsamaꞌ in tumaluꞌ biyan song mga sutsi nok konabihanin masa tagnaꞌ.
22 Asal na tinaluꞌ ni Nabi Musa,
‘Ongon og waktu nok pangoyan amu nok Tuhan solobuk nabi nong moktidu sog bangsa ta niyu mamaꞌ dinakon.
Sumboy niyu yanin tombaan sog lam nok tinaluꞌ in.
23 Sima-sima og diꞌ tumombaꞌ song nabi koyon,
mopapas tidu song mga piktowan nok Tuhan.’ ”b
24 Taluꞌ pa ni Petros,
“Na og lam nok konabihan tidu ni Nabi Samwel bu song mga simunuꞌ diyanin,
mikpodinsamaꞌ da sop tumaluꞌ pasal song ningkomun kini.
25 Amu ong mga tow kituꞌ nok pigbinaan nong mga konabihan bu misunuꞌ amu sog jinanjiꞌ nok Tuhan song mga koapuꞌ-apuan niyu.
Tinaluꞌ in diyon ni Nabi Ibrahim,
‘Sabap sok tupuꞌ nu,
mobarakat og lam nog bangsa sog dunya.’c
26 Saan na piangoy nok Tuhan dinita poguna ok sosuguonin bagun barakatan amu biyan sok poktolikud niyu nog ginang nong molaat.”