Ong
MGA GINANG
nong mga Mokpoposampoy ni Panghuꞌ Isa Al-Masih
Ok Sinulat ni Lukas diyon ni Teyopilus
1
Kolasahan Tuwan Teyopilus,
Sok suksugan ku nong mikuna dinika,
sinulatu og lam nok tinagnaan ni Isa moginang bu mongnasihat
2 sampoy sog gondow nog inoyit yanin posunguꞌ sog langit.
Sugaid sog daꞌ pa yanin oyitoy sok tas,
migbogoy yanin nong mga suguan biyan sog Ruh Mahasutsi song mga mokpoposampoyin nok piniliꞌ in kituꞌ.
3 Sog bon nok pat puluꞌ ondow,
lolayun yanin mokpotongow dinilon biyan song modakol nog gindanan nong mitubuꞌ yanin puliꞌ tidu sok kopatoy.
Miktaluꞌ sop yanin dinilon nok pasal sok Pomarinta nok Tuhan.
4 Solobuk waktu,
soliyan nilon kuman,
sinuguꞌ in ilon nok sumboy diꞌ pa ilon mawaꞌ sok siyudad nog Jerusalem,
bu taluꞌ in pa,
“Bagadan niyu og Ruh Mahasutsi nog jinanjiꞌ nog Gommaꞌ u pangoyon diniyu,
yonin na ong midongog niyu dinakon tagnaꞌ,a
5 poꞌ si Yahiyab,
piliguꞌ in ong mga tow biyan sok tubig,
tibuwa mga sanu ondow tidu ningkomun,
poliguon amu biyan sog Ruh nok Tuhan.”c
Ok Pogangoy ni Panghuꞌ Isa sog Langit
6 Na dangan miglimud ilon,
miksak ilon,
“Panghuꞌ,
yonin na taꞌ kini og waktu nok populion nu ok pomarinta sog Israel mamaꞌ nok tagnaꞌ?”d
7 Sugaid tinaluanin ilon,
“Ondiꞌ niyu kumboyon kosunan og waktu atawa timpu nog ginantaꞌ nog Gommaꞌ poꞌ yanin da ok taga kopatut dun.
8 Tibuwa bogoyan amu nok kowasa nog Ruh Mahasutsi sog waktu mogonong yanin diniyu,
bu sumaksiꞌ amu pasal dinakon dini sog bonuwa Jerusalem,
Yahudiya,
Samariya bu sampoy sok koliwagan nog dunya.”e
9 Pogdoksuꞌ in koyon taluon,
inoyit na yanin sog langit soliyan mogbantoy nong mga mulidin toktob diꞌ na yanin motongow kobalan nog gabun.
10 Soliyan nilon moglonglong sok tas langit nog inangoyanin,
ongon ok timuwaꞌ duwaꞌ kotow laki mimonapot nok putiꞌ migindog song molani nilon.
11 Taluꞌ nog duwaꞌ kotow koyon,
“Mga tow Jalil,
manu migindog amu ma moglonglong sog langit?
Si Isa kini nog inoyit tidu diniyu posunguꞌ sog langit,
mokpuliꞌ da dini.
Bu ok pokpuliꞌ in,
mamaꞌ da nong mitongow niyu kituꞌ nok pogangoyin sog langit.”
12 Doksuꞌ nituꞌ mikpuliꞌ na ong mga mulidin sog Jerusalem tidu sog bontud nog iningalanan nog Bontud Jaytun nong molani da sog Jerusalem.
Og layuꞌ in mga sokilumitru.f
13 Pogdatong nilon,
minenek ilon sok tas bilik nok pigonongan nilon.
Ilon kini siloꞌ Petros,
Yahiya,
Yaꞌkub,
Andariyas,
Pilip,
Tomas,
Bartolomi bu si Matiyu,
si Yaꞌkub og bataꞌ ni Alpa,
si Simon og ginollalan nok Selot,
bu si Yudas,
og bataꞌ ni Yaꞌkub.
14 Lolayun ilon moksolobuk mongoni-ngoni sok Tuhan sampoy ong mga kolibunan bu si Mariam nog ginaꞌ ni Isa bug mga gilugin nog laki.
Og Bogu nong Mokpoposampoy
15 Na sog waktu kituꞌ,
minindog si Petros bangka poktaluꞌ song mga pigiluganin nong mga sogatus bu duwaꞌ puluꞌ kotow og dakolin,
longin,
16 “Mga pigilugan ku,
sumboy mounut ong misulat sok Kitab.
Saan na miunut ok tinaluꞌ nog Ruh nok Tuhan biyan ni Nabi Daud pasal ni Yudas,
ong mingulu song mga sinumaggow kituꞌ ni Isa.
17 Og duma ta niyu yanin tagnaꞌ,
bu kibahagian da sop yanin nog ginang ta kini.”
18 Na pasal sok piktindan ni Yudas sok pokponipu nin,
piksaluyin nog lupaꞌ,
bu mikuksok yanin dituꞌ bangka kobogdak ok tiyanin bu linumuwas ok tene nin.
19 Kiosunan koyon nog lam nok tow sog Jerusalem,
dadi iningalanan nilon og lupaꞌ kituꞌ nog Akeldama sog bahasa nilon,
ong maana nin,
Og Lupaꞌ nog Duguꞌ.g
20 Taluꞌ pa ni Petros,
“Yonin kini ok sinulat sog diyalom Kitab Jabur,
taluin,
‘Potiyangan na og baloyin nog daꞌdun na ong mogonong dun bisan solokotow.’h
Misulat pa sop sog len ayat,
‘Sumboy ongon og gumantiꞌ sog ginangin.’ ”i
21-22 Taluꞌ pa ni Petros,
“Dadi sumboy ongon og len tow nong mampuꞌ dinita sumaksiꞌ nong mitubuꞌ puliꞌ si Panghuꞌ Isa tidu sok kopatoy.
Ok tow koyon sumboy og duma ta sog bon ta mogdunut-dunut ni Panghuꞌ Isa tidu sok pogliguꞌ ni Yahiyaj diyanin sampoy sok kooyit diyanin sog langit.”
23 Dadi duwaꞌ kotow ok pikpilian nilon,
si Yusup nog iningalanan nog Barsabbas bu poktawagon da sop nog Yustus,
bu si Mattiyas.
24 Tubus mingoni-ngoni ilon,
taluꞌ nilon,
“U Tuhan,
ong mikokosun nog lam nok pongatoyan nong manusiyaꞌ.
Potongow nu dinami bug sima ok piniliꞌ nu dinilon duwaꞌ
25 nog gumantiꞌ sog ginang kini mokpoposampoy.
Yonin na ok tinolikudan ni Yudas bagun mangoy sog bonuwa nog dait diyanin.”
26 Tubus nituꞌ migbunut-bunut ilon,
bu si Mattiyas ong mipiliꞌ,
bu yanin ong mikodungag sok sopuluꞌ bu sala mokpoposampoy.