Hinukum na si Panghuꞌ Isa nok Patoyon
19
Dadi inalap ni Pilatu si Isa bangka nin polanogoy.
2 Tubus sinulapid nilon ok kayu-kayu dugihon,
doksuꞌ binuligtus baasa kuruna bangka botangoy sog gulu nin.
Pisolugan nilon si Isa nog juba bayulet,
mamaꞌ nog juba nok sultan.
3 Puwas nituꞌ mikpolani ilon diyanin bangka poktaluꞌ,
“Bantugon ok Sultan nong mga Yahudi!”
Bu sinumpiling nilon yanin.
4 Na linumuwas puliꞌ si Pilatu,
bangka nin taluoy ong mga tow,
“Tontong niyu ba,
oyiton ku yanin diniyu bagun niyu kosunan nog daꞌdun ong mobalaku nog dusa nin.”
5 Dadi limuwas si Isa dunut nog bogbod nog dugi sog gulu nin bug juba nin.
Tinaluan ilon ni Pilatu,
“Tontong niyu ba ok tow kini.”
6 Dangan mitongow yanin nong mga kounutan nok koimaman bug mga mogbobantoy sog Baloy nok Tuhan,
miggekes ilon,
taluꞌ nilon,
“Lansang nu yanin sok kayu,
lansang nu yanin!”
Na taluꞌ ni Pilatu dinilon,
“Alap niyu yanin bu amu na ong moglansang diyanin,
poꞌ daꞌdun ong mitongowu nong miinangin nog dusa.”
7 Tinumabal ong mga Yahudi,
“Ongon ok saraꞌ nami,
bu mounut sok saraꞌ koyon sumboy yanin matoy poꞌ inangkonin nog Bataꞌ yanin nok Tuhan.”
8 Dangan midongog ni Pilatu ok taluꞌ nilon koyon,
miglanduꞌ og gondokin.
9 Doksuꞌ simolod yanin mokpuliꞌ sog gastanaꞌ in bangka nin na sop sakoy si Isa,
“Ayin ka miktidu?”
Sugaid daꞌ tabal si Isa.
10 Tinaluan yanin ni Pilatu,
“Manu diꞌ a ma tumabal dinakon?
Daꞌ nu taꞌ kosunoy nog ongon ok kopatutu mokpoluwas dinika atawa mokpolansang dinika?”
11 Tinabal yanin ni Isa,
“Daꞌdun bosiya ok kopatut nu humukum dinakon bug daꞌ a bogoyoy dun tidu sok Tuhan,
sugaid ok tow nong migwakil dinakon diyon dinikaa labi pa mosolag og dusa nin.”
12 Tidu niyon minontong si Pilatu nok pobiyan bagun mopoluwasin si Isa.
Sugaid migekes ong mga Yahudi,
taluꞌ nilon,
“Bilaꞌ poluwason nu ok tow koyon,
kanaꞌ a ok supali nok sultan sog bonuwa Rum.
Ok sosuku nong mangkon nog ginawa-baranin nok sultan,
minanta yanin sok sultan nog Rum.”
13 Dangan midongog ni Pilatu ok tinaluꞌ nilon koyon,
inoyitin si Isa sog luwasan bangka yanin ingkud sog gingkudan nok poghukuman dituꞌ lambul sok poktawagon nog Loma-lomahan nog Batu,
bilaꞌ sog bahasa Ibrani,
Gabbata.
14 Na og gondow kituꞌ,
og gondow poktogama para sog Halilaya Pogliyus.
Dangan motas na og gondow taluꞌ ni Pilatu song mga Yahudi,
“Tontong niyu,
ok sultan niyu!”
15 Sugaid migekes na sop ong mga tow,
taluꞌ nilon,
“Pawaꞌ nu yanin!
Pawaꞌ nu yanin!
Lansang nu yanin sok kayu!”
Taluꞌ ni Pilatu dinilon,
“Ok kolegan niyu,
lansangon ku taꞌ ok sultan niyu?”
Ok tabal nong mga kounutan nok koimaman,
“Daꞌdun ok sultan nami nog len luwal sok sultan nog Rum.”
16 Na inuwakil ni Gubernur Pilatu si Isa dituꞌ dinilon bagun lansangon sok kayu.
Ok Poglansang ni Panghuꞌ Isa
Dadi inalap nong mga sundalu si Isa.
17 Pinisanin ok kayu nok poglansangan diyanin posunguꞌ sog bonuwa nok pogingalanan nog Bakuk,
bilaꞌ sog bahasa Ibrani,
Golgota.
18 Dangan dituꞌ na ilon,
linansang nilon na si Isa sok kayu dunut nog duwaꞌ kotow song mansing kilidin,
si Isa sok titongaꞌ.
19 Na ongon ok sinulat ni Gubernur Pilatu bangka pobotangoy sok kayu,
ok pogbasta dun,
“SI ISA OK TOW NASARET,
SULTAN NONG MGA YAHUDI.”
20 Ok sulat kituꞌ,
sinulat sog bahasa Ibrani,
Rum bug Grik,
bu og dapit piglansangan ni Isa molani sok siyudad.
Saan na modakol nong mga tow Yahudi ong mikobasta nok sulat kituꞌ.
21 Dadi ok taluꞌ nong mga kounutan nok koimaman dituꞌ ni Pilatu,
“Diꞌ nu sulaton nog ‘Sultan nong mga Yahudi,’
sugaid maꞌ nini,
‘Ok tow kini miktaluꞌ nog yanin ok sultan nong mga Yahudi.’ ”
22 Tinumabal si Pilatu,
“Ong misulatu,
misulatu na.”
23 Dangan milansang na nong mga sundalu si Isa,
inalap nilon ok ponapotin,
bangka nilon bahagioy pat,
sobahagiꞌ sok sosolokotow dinilon.
Inalap nilon da sop og juba nin.
Daꞌdun og biyaꞌ sobotan dun,
maꞌ nituꞌ na ok koimung dun,
tidu sok tas mangoy sok silung.
24 Dadi miktaluꞌ ok kokoniya dinilon,
“Diꞌ ta niyu kini goditon,
pogbunut-bunutan ta bug sima ong mokalap dun.”
Na miinang koyon bagun mounut ok tinaluꞌ sok Kitab,
“Pigbobahagian nilon ong mga ponapotu,
bu pigbunut-bunutan nilon og juba u.”b
Yonin koyon og ininang nong mga sundalu.
25 Na song molani nok kayu ni Isa,
migindog og ginaꞌ in,
og gilug nog ginaꞌ in,
si Mariam og libun ni Kilopas,
bu si Mariam,
ok tow Magdalac.
26 Dangan mitongow ni Isa og ginaꞌ in bu ong mulidin nok kolasahanin diyon,
tinaluanin og ginaꞌ in,
“Tontong nu,
og bataꞌ nu na yanin.”
27 Doksuꞌ tinaluanin sop ong mulidin koyon,
“Tontong nu,
og ginaꞌ nu na yanin.”
Tidu sog waktu kituꞌ,
pionong na nong mulid koyon sog baloyin og ginaꞌ ni Isa.
Ok Kopatoy ni Panghuꞌ Isa
28 Na kiosunan ni Isa nong midoksuꞌ na og lam nok piinang diyanin,
dadi miktaluꞌ yanin,
“Kinuwowu.”
Tinaluꞌ in koyon bagun mounut ok sinulat sog diyalom nok Kitab.d
29 Na ongon diyon og banggaꞌ-banggaꞌ miponuꞌ nog ginumon nong mosom.
Dadi minalap ilon nok kokanaꞌ,
bangka doluoy dun,
bangka botangoy sok sosugget.
Tubus tinoyoꞌ nilon sog babaꞌ ni Isa.
30 Poksoksop ni Isa nog ginumon nong mosom,
miktaluꞌ yanin,
“Midoksuꞌ na og ginangu.”
Tubus minokung yanin,
bu piglillaꞌ in ong nyawa nin.
31 Na og gondow kituꞌ,
og gondow poktogama.e
Dadi pingambat nong mga Yahudi nog balion og botisf nong mga linansang koyon bagun modaliꞌ patoy bu awaon na diyon.
Poꞌ diꞌ ilon meleg nong mobagak diyon ong mga bangkoy nilon sog Gondow Pogogulali,
poꞌ mosolag og gondow koyon.
32 Dadi minangoy dituꞌ ong mga sundalu bangka nilon balioy og botis nog duwaꞌ kotow kituꞌ nog linansang dunut ni Isa.
33 Sugaid pogangoy nilon dituꞌ ni Isa,
mitongow nilon nong minatoy na.
Saan na daꞌ nilon balioy og botisin.
34 Tibuwa tinodjok nok solobuk sundalu ok kilidan ni Isa biyan sog budjak,
bu sododuun limuwas og duguꞌ bug tubig.
35 Ong mikosaksiꞌ nog biyan-biyan koyon,
yonin na ong miksuksug nini.
Kiosunanin nong miktaluꞌ yanin nong motud,
bu sinaksianin koyon bagun amu sop mokotombaꞌ.
36 Miinang kini bagun mounut ok tinaluꞌ sok Kitab,
“Daꞌdun ong mobaliꞌ bisan solobuk nok tulanin.”g
37 Bu ongon pa sop ong misulat sog diyalom nok Kitab,
taluꞌ in,
“Tontongon nilon ok tow nok tinodjok nilon.”h
Ok Pokkubul ni Panghuꞌ Isa
38 Na ongon ok tow pogingalanan nog Yusup,
ok tow Arimati.
Solobuk yanin mulid ni Isa,
sugaid daꞌ yanin pokpotampal sabap sog gondokin song mga Yahudi.
Pingoni nin og bangkoy ni Isa,
bu kinumboy diyanin ni Gubernur Pilatu.
Dadi minangoy yanin dituꞌ bangka nin alapoy og bangkoy ni Isa.
39 Migunut sop diyanin si Nikodemus,i
yonin na ok tow nong minangoy ni Isa sog gobi nituꞌ.
Migoyit yanin nok pokpomut nog inimung tidu song mira bug alus,
mga 35 kilu og bogatin.
40 Na inalap nilon na og bangkoy ni Isa,
bangka nilon pomogbodoy nok kokanaꞌ dunut nong mga pokpomut koyon poꞌ mamaꞌ nituꞌ og gaddat nong mga Yahudi bilaꞌ mokkubul.
41 Na sog bonuwa nok piglansangan ni Isa,
ongon ok kabbun diyon.
Sok kabbun koyon,
ongon ok kubulan nog bogu da imungoy bu daꞌ pa sibon kokubuloy.
42 Sabap yonin kituꞌ og gondow poktogama nong mga Yahudi,
bu pasal molani da ok kubulan kituꞌ,
dituꞌ nilon binotang si Isa.