Ok Pongoni-ngoni ni Panghuꞌ Isa
17
Pogdoksuꞌ ni Isa moktaluꞌ,
timongal yanin sog langit bangka poktaluꞌ,
“U Ommaꞌ,
minatong na og waktu nog ginantaꞌ nu dinakon.
Potongow nu ok kotas nog Bataꞌ nu kini bagun ku sop mopotongow ok kotas nu.
2 Poꞌ binogoyan nu akon nok kopatut mogbayaꞌ sog lam nong manusiyaꞌ bagun mogbogoyu nok kotubuꞌ solama-lama sog lam nog binogoy nu dinakon.
3 Na yonin kini ong maana nok kotubuꞌ solama-lama nok kilalahan nilon ika,
ok solobuk-lobuk bug sobonnal-bonnal nok Tuhan,
sampoy akon,
si Isa Al-Masih,
ok piangoy nu dini.
4 Pitongowu na ok kotas nu dini sog dunya biyan sok pogdoksuꞌ u nok piinang nu dinakon.
5 Ningkomun,
u Ommaꞌ,
potongow nu ok kotasu sok sunguan nu mamaꞌ nok kotasu kobon ku diyon dinika sog daꞌ pa koongon og dunya kini.
6 Pitampalu na ika song mga tow nog inuwakil nu dinakon tidu sog dunya.
Ok sukuꞌ nu ilon,
bu inuwakil nu ilon dinakon,
bu inunut nilon ok Parman nu.
7 Kiosunan nilon na nog olo-olo nog binogoy nu dinakon,
miktidu dinika
8 poꞌ pisampoyu na dinilon ok Parman nog binogoy nu dinakon bu tinolimaꞌ nilon.
Kiosunan nilon na ok sobonnal nong miktidu u dinika,
bu tinumombaꞌ na ilon nok piangoy nu akon dini.
9 Ok pingoni-ngoni u kini dinika,
kanaꞌ para sog lam nong manusiyaꞌ,
sugaid song mga tow nok pisukuꞌ nu dinakon poꞌ ilon koyon ok sukuꞌ nu dodaꞌ.
10 Og lam nok sukuꞌ u,
ok sukuꞌ nu da sop,
bu og lam nok sukuꞌ nu,
sukuꞌ u da sop,
bu biyan dinilon mipotongow ok kotasu.
11 Na mogogangoyu na dinika,
bu diꞌ u na mobon sog dunya,
sugaid ilon,
dini pa sog dunya.
U Ommaꞌ Mahasutsi,
ipat nu ilon sok kowasa nong ngalan nu,
ong ngalan nog binogoy nu dinakon,
bagun ilon moksolobuk mamaꞌ nok poksolobuk ta.
12 Sog bon nog dini u dinilon inipatu ilon sok kowasa nong ngalan nu nog binogoy nu dinakon.
Inipatu,
bu daꞌdun ong mibolong dinilon luwal sok tow kituꞌ nog ginantaꞌ siksaon,
bagun mounut ok tinaluꞌ sok Kitab.
13 Na mogogangoyu na dinika,
dadi sinuksugan ku ilon nini sog dini u pa sog dunya bagun koongonan ilon nog loliyag nog jukup,
mamaꞌ nog loliyagu.
14 Pisampoyu na dinilon ok Parman nu,
bu dinumutan ilon nok tow nog daꞌ tombaꞌ.
Poꞌ mamaꞌ nog akon kanaꞌ sukuꞌ nog dunya,
ilon sooy poꞌ miimung na ilon nok sukuꞌ nu.
15 Daꞌ u pongoni-ngoni dinika nog awaon nu ilon sog dunya kini,
sugaid bagun ipaton nu ilon supaya diꞌ ilon moyit nok sassat nog Iblis.
16 Kanaꞌ na ilon sukuꞌ nog dunya mamaꞌ nog akon kanaꞌ sukuꞌ nog dunya.
17 Posolen bu sutsi nu ilon sok kowasa nok Parman nu poꞌ ok Parman nu ok kosobonnalan.
18 Na pangoyon ku ilon mokposampoy song mga manusiyaꞌ mamaꞌ nok kopangoy nu nakon dini sog dunya.
19 Poglillaꞌ u ong nyawa u dinika para dinilon bagun ilon sooy moimung nok sutsi nok sukuꞌ nu biyan sok kosobonnalan.a
20 Ok pingoni-ngoni u kini kanaꞌ hadja para song mga mulidu,
sugaid sampoy song mga tow nok tumombaꞌ dinakon pasal sok pokposampoy nilon.
21 Mingoni-ngoni u bagun mosolobuk og lam nilon,
mamaꞌ nog ika Ommaꞌ dini dinakon,
bu akon diyon dinika.
Bung mayan ilon sooy dini dinita bagun ong mga manusiyaꞌ tumombaꞌ nog ika ong mikpangoy nakon dini sog dunya.
22 Ok kotas nog binogoy nu dinakon,
binogoyu da sop dinilon,
bagun ilon moksolobuk mamaꞌ nok poksolobuk ta.
23 Diyon ku dinilon bu ika dini nakon,
bagun mojukup ok poksolobuk nilon.
Poꞌ bilaꞌ moksolobuk ilon,
kosunan nong mga manusiyaꞌ nok piangoy nu akon dini bu kilasahan nu ilon mamaꞌ nok poglasa nu dinakon.
24 U Ommaꞌ,
ok kolegan ku bosiya bug ayin ku,
dituꞌ sop ong mga tow nog inuwakil nu dinakon,
bagun nilon kosaksian ok kotas nog binogoy nu dinakon poꞌ kilasahan nu akon sog daꞌ pa koongon og dunya.
25 U Ommaꞌ,
ika ok kologdongan.
Daꞌ pokokilala dinika ong mga tow nog daꞌ tombaꞌ,
sugaid kilalahan ku ika,
bu kiosunan na nong mga mulidu nok piangoy nu akon dini.
26 Piilala u ika dinilon,
bu podayunon ku ok pokpoilala dinika diyon dinilon bagun og lasa nu dinakon,
moongon da sop dinilon bu bagun mokpobilin ku sok pongatoyan nilon.”