Yahiya 15

Ong Mosobonnal nok Pun Anggul

Puwas nituꞌ miksuksug si Isa nok pononggiꞌ, taluꞌ in, “Akon ong mosobonnal nok pun , bu og u ong mogogipat dun. 2 Ok sosuku nok panga u nog daꞌ pogbunga, pomutukonin bu ok panga nong mogbunga, putuk-putukanin bagun dumakol og bunga nin. 3 Na amu koyon, molonuꞌ amu na poꞌ tinabuk niyu ok tintuluan ku diniyu. 4 Sumboy tattap ok poksolobuk niyu dinakon, bu tattapu da sop sumolobuk diyon diniyu. Ok panga nok kayu, ondiꞌ mogbunga bilaꞌ ondaꞌ na kosukpat sok punin. Na domikkiyan da sop diniyu, diꞌ sop mokopogbunga ok kotombaꞌ niyu bilaꞌ diꞌ amu sumolobuk dinakon.

5 Akon ok pun anggul, bu amu ong mga panga. Sima-sima diniyu ok sumolobuk dinakon, bu akon sooy sumolobuk diniyu, na amu koyon ong mogbunga nong modakol. Poꞌ bilaꞌ diꞌ amu sumolobuk dinakon, na daꞌdun ong moinang niyu. 6 Bilaꞌ ok tow diꞌ sumolobuk dinakon, mamaꞌ yanin nok panga nok pinutuk bu pinilak bangka kolawos. Topukon ong mga panga koyon bangka tikpuoy sog gapuy bu motutung. 7 Sugaid bilaꞌ sumolobuk amu dinakon, bu ong mga lapalu diyon diniyu, pongoni-ngoni amu nog olo-olo ok kolegan niyu, bu mounut koyon para diniyu. 8 Mopotongow ok kotas nog Gommaꞌ u bilaꞌ mogbunga amu nong modakol, bu mopotampal da sop koyon nog amu ong mga mulidu. 9 Bug ponoy ok poglasa nog Gommaꞌ u dinakon, mamaꞌ niyon da sop ok poglasa u diniyu. Na suboy mokpotattap amu sog lasa u. 10 Bilaꞌ unuton niyu ong mga suguan ku, mokpotattap amu sog lasa u, mamaꞌ nok pogunutu song mga suguan nog Gommaꞌ u, bu lolayun ku mokpotattap sog lasa nin. 11 Sinuksugu diniyu og lam nini bagun modiyon diniyu og loliyagu, bu bagun sop mojukup og loliyag niyu. 12 Yonin kini ok suguan ku, poglasa-linasahoy amu, mamaꞌ nok poglasa u diniyu. 13 Daꞌdun og lasa nog lumabi pa tidu sog lasa nok tow nok poglillaꞌ in ok kotubuꞌ in para song mga supali nin. 14 Amu koyon ong mga supali u bilaꞌ unuton niyu ong mga suguan ku. 15 Diꞌ u na amu tawagon nong mga sosuguon ku, poꞌ ok sosuguon, diꞌ in kosunan og inangon nog gamu nin. Tibuwa tawagon ku amu nok supali u, poꞌ og lam nong midongogu tidu sog Gommaꞌ u, piosun ku diniyu. 16 Ondaꞌ niyu akon pilioy, sugaid akon ong mikpiliꞌ diniyu bagun momunga amu nog daꞌdun ok kodoksuanin. Dadi olo-olo ok pongonihon niyu sog Gommaꞌ biyan song ngalan ku, duhulonin diniyu. 17 Na yonin kini ok suguan ku diniyu, poglasa-linasahoy amu.”

Ok Pogdumut nong mga daꞌ Tombaꞌ song mga ni Panghuꞌ Isa

18 “Bilaꞌ dumutan amu nong mga tow dini sog dunya, na pondom niyu nog akon og dinumutan nilon poguna. 19 Bilaꞌ soupama motud amu sukuꞌ nog dunya, na tantu nok kolasahan nilon amu, sugaid kanaꞌ amu motud sukuꞌ nog dunya poꞌ piniliꞌ u amu tidu dinilon, saan na mogdumut ilon diniyu. 20 Dadi pondom niyu ok tinaluꞌ u diniyu, ‘Ok sosuguon ondiꞌ lumabi sog gamu nin.’ Bilaꞌ binsanaon nilon akon, na binsanaon nilon da sop amu. Bilaꞌ unuton nilon bosiya ong mga taluꞌ u, na unuton nilon da sop ok taluꞌ niyu. 21 Sugaid og lam niyon, inangon nilon da diniyu pasal sok pogunut niyu dinakon, poꞌ diꞌ nilon kosunan ong mikpangoy nakon dini. 22 Bilaꞌ daꞌ u angoy dini moksuksug dinilon, diꞌ bosiya tumampal nok taga ilon. Tibuwa ningkomun, daꞌdun na ong modaawa nilon pasal sog dusa nilon. 23 Sima-sima ong mogdumut dinakon, mogdumut da sop sog u. 24 Bilaꞌ daꞌ nilon kotongow nog duwaꞌ mata nilon ong mga pinginangu nog daꞌ pa sibon koinang nog duma, diꞌ bosiya tumampal nok taga dusa ilon. Sugaid mitongow nilon na, sokaliꞌ mogdumut pa ilon dinakon bu sog Gommaꞌ u. 25 Biyan dun miunut ong misulat sok Kitab Sutsi nog ‘Dinumutan nilon akon nog daꞌdun ok sabapanin.’ 26 Na pangoyon ku diniyu ok Polopituwa tidu sog Gommaꞌ, yonin na og nong moktonduꞌ nok kosobonnalan. Bilaꞌ matong na yanin, sumaksiꞌ yanin pasal dinakon. 27 Bu amu sooy sumaksiꞌ da sop, poꞌ tidu sok ponognaan nog ginangu, dini amu dinakon.”