Yahiya 9

Pikuliꞌ ni ok Tow Buta

Na soliyan ni Isa mopanow, mitongowin ok tow nog buta tidu sok kobataꞌ diyanin. 2 Doksuꞌ sinakan yanin nong mga mulidin, “Guru, sima ong migdusa, ok tow koyon atawa ong mokogulangin nog buta ma yanin dangan binataꞌ?”

3 Ok tabal ni Isa, “Kanaꞌ mibuta ok tow koyon sabap song migdusa yanin atawa ong mokogulangin, sugaid bagun mopotongow ok kowasa nok Tuhan diyanin. 4 Sumboy inangon ta og ginang nong mikpangoy nakon dini imakat gondow pa, poꞌ bilaꞌ gobi na, daꞌdun na ong mokopoginang. 5 Sog bon nog dini u sog dunya, akon ok nog dunya.”

6 Pogdoksuꞌ ni Isa moktaluꞌ, dimulaꞌ yanin sog lupaꞌ bangka nin limugoyoy og dulaꞌ in bug lupaꞌ, inimungin nog basak. Tubus linoklasin song mata nok tow buta koyon. 7 Tubus tinaluanin og buta, “Angoya pongulaup sok tubig nok Silowam.” Na ong maana nok Silowam, Piangoy.

Dadi minangoy yanin dituꞌ mongulaup bangka yanin pokpuliꞌ nong mokotongow na.

8 Na ong mga kilani baloyin bug mga tow nong mikotongow diyanin tagnaꞌ nituꞌ nong mokpoponglimus, miktaluꞌ ilon, “Kanaꞌ taꞌ bayuꞌ ok tow kini ong migingkud mokponglimus kituꞌ?”

9 Taluꞌ nog duma, “Yanin dodaꞌ.”

Sugaid taluꞌ sop nog duma, “Kanaꞌ, sugaid batuk-batuk hadja ilon nog bayuꞌ-bayuꞌ.”

Miktaluꞌ ok tow bakas buta, “Akon ok tow kituꞌ.”

10 Dadi sinakan yanin nong mga tow, “Manu mokotongowa na ma ningkomun?”

11 Tinumabal yanin, “Ok tow nog iningalanan nog Isa migimung nog basak bangka nin loklasoy song mata u, bu tinaluanin akon, ‘Angoya pongulaup sok Silowam.’ Dadi minangoyu mongulaup dituꞌ, doksuꞌ mokotongowu na.”

12 Miksak na sop ong mga tow, “Ayin na yanin dun?”

Tinumabal yanin, “Diꞌ u na kosunan.”

Piksumoriyahan nong mga ok Tow Bakas Buta

13 Dadi inoyit nong mga tow og bakas buta koyon dituꞌ song mga . 14 Og gondow kituꞌ nong migimung si nog basak bangka nin pokulioy ong mata nok tow kituꞌ, yonin na og . 15 Na sinakan na sop nong mga Parisi ok tow koyon bug manu mokotongow na ma yanin. Ok tabalin, “Linoklasan ni Isa nog basak ong mata u bangka u pongulaup, doksuꞌ mokotongowu na.”

16 Taluꞌ nog duma nong mga Parisi sog buta, “Ok tow nong miginang mamaꞌ niyon kanaꞌ tidu sok Tuhan poꞌ daꞌ in unutoy ok saraꞌ nog Gondow Pogogulali.”

Sugaid ok taluꞌ nog duma, “Ponoy koinang nok tow ong maꞌ niyon nong mokosobuꞌ-sobuꞌ nog ginang?”

Na mibahagiꞌ ok pikilan nilon. 17 Dadi sinakan nilon puliꞌ ok tow nog bakas buta, “Olo ong motaluꞌ nu pasal diyanin pagga yanin ong mikokuliꞌ nong mata nu?”

Ok tabalin, “Ong yanin.”

18 Na ong mga kounutan nong mga diꞌ tumombaꞌ nok tow koyon bakas buta bangka pokotongow. Dadi pitawag nilon ong mokogulangin, 19 bangka nilon sakoy, “Bataꞌ niyu taꞌ ok tow kini nok tinaluꞌ niyu nog buta tidu sok kobataꞌ dun? Manu mokotongow na ma yanin ningkomun?”

20 Tinumabal ong mokogulangin, “Oo, og bataꞌ nami yanin koyon, bu asal na yanin og buta tidu pa sok kobataꞌ dun. 21 Sugaid diꞌ nami kosunan bug manu mokotongow na ma yanin, bu diꞌ nami da sop kosunan bug sima ong mikobogoy diyanin nok ponontong. Sakan niyu na hadja yanin! Mokosun na yanin koyon moksuksug poꞌ motas na og gumulin.”

22 Maꞌ niyon ok tinaluꞌ nong mokogulangin sabap miondok ilon song mga kounutan nong mga Yahudi. Poꞌ pigisunan na nong mga kounutan nog bilaꞌ ongon ok sumaksiꞌ nok si Isa og , pawaon sog nilon. 23 Saan na ok taluꞌ nong mokogulangin, “Motas na og gumulin, dadi sakan niyu na hadja yanin.”

24 Na ikoduwaꞌ na nilon pitawag ok tow bakas buta bangka nilon sakoy, “Sapa a sok Tuhan nong moktaluꞌ a nong motud, poꞌ kiosunan nami nog baldusa ok tow nong mikokuliꞌ dinika.”

25 Tinumabal yanin, “Diꞌ u kosunan bug baldusa taꞌ yanin atawa kanaꞌ. Solobuk da ok kosunan ku, bakasu og buta, sugaid ningkomun mokotongowu na.”

26 Sinakan na sop nong mga kounutan, “Olo og ininangin dinika? Inolo nin pogbulung ong mata nu?”

27 Tinumabal yanin, “Tinaluan ku na amu, sugaid diꞌ amu da monginongog. Manu meleg amu ma monginongog nituꞌ puliꞌ? Meleg amu da taꞌ sop moimung nong mulidin?”

28 Na pigboluan nilon yanin, taluꞌ nilon, “Ika ong mulidin, sugaid ami kini, mga mulid ni Nabi Musa. 29 Kiosunan nami nong miktaluꞌ ok Tuhan dituꞌ ni Nabi Musa. Tibuwa ok tow koyon, diꞌ nami tanan kosunan bug ayin yanin tidu.”

30 Dadi ok taluꞌ nok tow bakas buta, “Mokosobuꞌ-sobuꞌ kini tokodoy! Ondaꞌ niyu kosunoy bug ayin yanin tidu, sokaliꞌ binogoyanin nok ponontong ong mata u. 31 Kiosunan ta nog ondiꞌ monginongog ok Tuhan sok tow baldusa, sugaid ok tow nong miggogondok sok Tuhan bu monginang nok suguanin, inongogan yanin nok Tuhan. 32 Tidu pa sok ponognaan nog dunya daꞌ sibon kodongog nog ongon ong mikobogoy nok ponontong sok tow nog buta tidu pa sok kobataꞌ dun. 33 Bilaꞌ ok tow kituꞌ kanaꞌ tidu sok Tuhan, diꞌ yanin mokinang nong mokosobuꞌ-sobuꞌ.”

34 Tinabal nilon yanin, “Ika koyon, asala nog baldusa tidu sok kobataꞌ dinika, sokaliꞌ monintuluꞌ a pa dinami?”

Doksuꞌ binugow nilon yanin.

35 Na midongog ni Isa nog binugow nilon og bakas buta kituꞌ. Dadi dangan mibalakin ok tow koyon, sinakanin, “Tinumombaꞌ a taꞌ sog ?”

36 Ok tabalin, “Sima yanin, Tuwan? Taluan nu akon bagun ku mokotombaꞌ.”

37 Taluꞌ ni Isa diyanin, “Mitongow nu na, bu yanin og duma nu mogabit-abit ningkomun.”

38 Taluꞌ nok tow koyon, “Panghuꞌ, tinumombaꞌ u na dinika.”

Doksuꞌ sinumudjud yanin sumumba ni Isa. 39 Taluꞌ ni Isa, “Minangoyu dini sog dunya moghukum. Dadi ayin og buta sok kosobonnalan tabangan ku bagun mokotongow yanin, sugaid ayin ong migniyat nong mokotongow yanin, mamaꞌ yanin sopantun buta, diꞌ mokotongow.”

40 Na og duma nong mga Parisi nog diyon song molani nin, mikodongog, dadi taluꞌ nilon, “Og buta ami da taꞌ sop kini?”

41 Tinaluan ilon ni Isa, “Bilaꞌ mangkon amu nog buta amu sok kosobonnalan, daꞌdun bosiya og niyu. Sugaid pagga miktaluꞌ amu ma nong mokotongow amu, tattap diyon diniyu og dusa niyu.”