Ok Pokkawing sog Lungsud nok Kana
2
Na sog ikotolu ondow nilon sok probinsiya Jalil,
ongon ok kawing dituꞌ sog lungsud nok pogingalanan Kana,
bu linumuduk dituꞌ og ginaꞌ ni Isa.
2 Inonggat da sop si Isa bug mga mulidin sok pokkawingan koyon.
3 Sog bon nilon diyon sok pokoradjaan,
mitipot ok tubig anggul,a
dadi tinaluan si Isa nog ginaꞌ in,
“Kinobus ilon na nok tubig anggul.”
4 Tinumabal si Isa sog ginaꞌ in,
“Olo og labot ta dun?
Daꞌ pa datong og waktu u.”
5 Dadi tinaluan nog ginaꞌ ni Isa ong mga sosuguon diyon,
“Inang niyu na og olo-olo ok taluonin diniyu.”
6 Na ongon diyon nom buk mokoluksang nog banggaꞌ batu pogbotangan nok tubig para poksutsi mamaꞌ nok saraꞌ sog agama Yahudi.
Ok sobanggaꞌ koungodan duwaꞌ puluꞌ mangoy sok tolu puluꞌ galun tubig.
7 Tinaluan ni Isa ong mga sosuguon diyon,
“Ponuꞌ niyu nok tubig ong mga banggaꞌ koyon.”
Dadi pinonuꞌ nilon.
8 Tinaluan ni Isa ong mga sosuguon diyon,
“Saguk amu na bangka niyu oyitoy sog inuwakilan nok pokoradjaan kini bagun koinamanin.”
Dadi inoyit nilon na.
9 Dangan ininaman nog inuwakilan nok pokoradjaan koyon,
na kanaꞌ na ok tubig,
sugaid ok tubig anggul na.
Daꞌ in kosunoy nok tubig ok piktiduhanin,
sugaid kiosunan nong mga sosuguon kituꞌ nok sinumaguk dun.
Na pitawagin ok pongantim laki,
10 bangka nin taluoy,
“Miaddat nong mga tow nok pinumon poguna song mga tow ok kinobaisan nok tubig anggul.
Doksuꞌ bilaꞌ mokinum na mahatul ong mga limuduk,
bangka pa poluwasoy ok tubig anggul nok kanaꞌ tantu mobais.
Sugaid ika len,
poꞌ ningkomun nu pa piluwas ok kinobaisan nok tubig anggul kini.”
11 Dadi dituꞌ sok Kana sok probinsiya nog Jalil timagnaꞌ si Isa moginang nong mokosobuꞌ-sobuꞌ.
Pitongowin diyon ok kowasa nin,
bu tinumombaꞌ diyanin ong mga mulidin.
12 Doksuꞌ nituꞌ dinumiksun si Isa sog lungsud nok Kapernaum dunut nog ginaꞌ in,
mga gilugin nog laki bug mga mulidin.
Migonong ilon dituꞌ mga sanu-sanu ondow.
Si Panghuꞌ Isa sog Baloy nok Tuhan
13 Dangan posunguꞌ na og Halilaya nong mga Yahudi nog iningalanan nog Halilaya Pogliyus,b
tinumukad siloꞌ Isa sog Jerusalem.
14 Pogdatong nilon,
mitongow ni Isa ong mga tow mogdodagang nok sapiꞌ,
bilibili bug mga kolopatic sog loma-lomahan sog diyalom Baloy nok Tuhan.d
Ongon sop diyon ong mga mononoliyu nok sine migingkud sog lomisahan nilon.
15 Poktongow ni Isa niyon,
migimung yanin nog lolakpos nok tali bangka nin ilon kotanan pomugowoy dunut nong mga bilibili bug sapiꞌ posunguꞌ sog luwasan nog Baloy nok Tuhan.
Pinganatin sop ok sin nong mga tow nong monoliyu,
bu pimolitukaꞌ in og lomisahan nilon.
16 Doksuꞌ tinaluanin ong mga tow nong migdodagang nok kolopati,
“Oyit niyu sog luwasan ong mga dogangan niyu koyon.
Diꞌ niyu imungon nok tabuan og Baloy nog Gommaꞌ u.”
17 Poginang ni Isa niyon,
mipondom nong mga mulidin ong misulat sog diyalom nok Kitab,
longin,
“U Tuhan,
og landuꞌ nok poglasa u sog Baloy nu mamaꞌ nog gapuy sok pongatoyan ku nong mokomula dinakon.”f
18 Dadi miktaluꞌ ong mga Yahudi diyanin,
“Potongowan nu ami nong mokosobuꞌ-sobuꞌ bagun kosunan nami nog ongon dodaꞌ ok kopatut nu monginang nini.”
19 Tinabal ilon ni Isa,
“Ladak niyu og Baloy nok Tuhan kini,
bu poindogon ku mokpuliꞌ sog diyalom tolu ondow.”
20 Taluꞌ nong mga Yahudi,
“Uy,
ok pokpotindog nog baloy kini,
pat puluꞌ bu nom tahun,
sokaliꞌ ika sambatan nu dun,
poindogon nu hadja sog diyalom nok tolu ondow.”
21 Sugaid og Baloy nok Tuhan nok pigbinaan ni Isa,
yonin na og lawasin.
22 Saan na dangan mitubuꞌ si Isa mokpuliꞌ tidu sok kopatoy,
mipondom nong mga mulidin ok tinaluꞌ in koyon,
bu tinumombaꞌ ilon sok Kitab bu sok tinaluꞌ ni Isa.
23 Dangan diyon si Isa sog Jerusalem solabu nog Halilaya Pogliyus,
modakol ok tow nok tinumombaꞌ diyanin dangan mitongow nilon ong mokosobuꞌ-sobuꞌ nog ininangin.
24 Sugaid daꞌ pongandol si Isa dinilon,
poꞌ kiosunanin og diyalom pongatoyan nog lam nong manusiyaꞌ.
25 Diꞌ na yanin sumboy posunan nok pasal song manusiyaꞌ poꞌ asalin na kiosunan ok pikilan nilon.