Ong mga Gaddat nong mga Koapuꞌ-apuan
15
Na ongon ong mga Parisi bug mga guru agama tidu sog Jerusalem nong minatong diyon ni Isa.
Sinakan nilon yanin,
2 “Manu dinugtul ma nong mga mulid nu ong mga gaddat nong mga mokogulang ta niyu poꞌ daꞌ ilon pongugas poguna nok komot nilon dangan kinuman ilon?”
3 Ok tabal ni Isa,
“Amu sop buwan,
manu dinugtul niyu ma ok suguan nok Tuhan pasal sog gaddat nong mokogulang niyu?
4 Poꞌ miksuguꞌ ok Tuhan,
taluꞌ in,
‘Pogaddatoy niyu og gommaꞌ bug ginaꞌ niyu,’a
bu ‘Sima-sima ong monaluꞌ nong molaat sog ginaꞌ atawa gommaꞌ in,
potiyangan yanin matoy.’b
5 Sugaid mounut sok ponintuluꞌ niyu,
mogdadi taluon nok solokotow sog gommaꞌ bug ginaꞌ in nog daꞌdun na ong motabangin dinilon.
Poꞌ ok tabangin bosiya kituꞌ dinilon,
binogoyin na sok Tuhan,
inimung na nok kurban.
6 Dadi ong mamaꞌ nituꞌ kituꞌ,
mounut diniyu,
diꞌ na yanin sumboy mogaddat song mokogulangin biyan sok tabangin.
Saan na binolong niyu ok suguan nok Tuhan sabap sog gaddat niyu.
7 Amu mga mokpobaluꞌ-baluꞌ!
Sinumugat tokodoy ok taluꞌ nok Tuhan nong misulat sok Kitab Nabi Isaya pasal diniyu,
8 ‘Ong mga tow kini piotas nilon akon toktob tibuwa sok taluꞌ nilon,
sugaid molayuꞌ ok pongatoyan nilon dinakon.
9 Mogasta ok poksumba nilon dinakon,
poꞌ ok ponintuluꞌ nilon,
ong mga suguan da nong manusiyaꞌ.’ ”c
10 Tubus pitawag ni Isa ok tumpukan nong mga tow bangka nin taluoy,
“Inongogoy niyu bu sabut niyu ok taluon ku kini.
11 Ondiꞌ mosammal ok tow sog olo-olo ok sumolod sog babaꞌ in,
sugaid ong mokosammal dun,
og olo-olo nog lumuwas tidu sog babaꞌ in.”
12 Doksuꞌ minangoy diyon ni Isa ong mga mulidin bangka poktaluꞌ,
“Mibatik nu taꞌ nong miubaꞌ ong mga Parisi sok tinaluꞌ nu kituꞌ?”
13 Tinumabal si Isa,
“Og lam nok pomulan nog daꞌ pomulahoy nog Gommaꞌ u sok surgaꞌ,
mobogdut da.
14 Potiyangoy niyu na ilon,
poꞌ ilon koyon mga polonontul nog buta nong minambit da sop sog buta.
Na bilaꞌ og buta minambit sog buta,
na duwaꞌ ilon molabuꞌ sog luwang.”
15 Doksuꞌ miktaluꞌ si Petros diyanin,
“Potampal nu dinami ok pononggiꞌ nu kituꞌ pasal bug olo ong mokosammal sok tow.”
16 Taluꞌ ni Isa,
“Daꞌ amu pa taꞌ sop pokosabut?
17 Daꞌ niyu taꞌ kosunoy nog olo-olo ong moungod sog babaꞌ,
miyan da sok tiyan bu lumuwas da sog lawas niyu?
18 Tibuwa ok taluꞌ nong molaat nog lumuwas sog babaꞌ,
miktidu sok pongatoyan,
bu yonin koyon ong mokosammal song manusiyaꞌ.
19 Poꞌ tidu sok pongatoyan nong manusiyaꞌ lumuwas ong molaat nok pikilan,
bangka koongon ok pokpatoy,
pogjina,
pokponakow,
ponaksiꞌ nog loput bug ponaluꞌ-naluꞌ.
20 Yonin kini ong mokosammal song manusiyaꞌ,
sugaid ok kuman nog diꞌ mongugas,
ondiꞌ mokosammal dinilon.”
Ok Kopongandol nog Libun nok Tow Kanaan
21 Pokpuwas nituꞌ,
minawaꞌ na si Isa dituꞌ bangka yanin angoy sog lambul nong mga bonuwa nok Tirus bug Sidon.
22 Na ongon og libun,
bangsa Kanaan tidu sog bonuwa koyon nong minangoy diyon ni Isa bangka poggekes diyanin,
taluꞌ in,
“Kololatoy nu akon Tuwan,
ponupuꞌ ni Sultan Daud,
og bataꞌ u nog libun sinolodan nok soytan bu mibinsanaꞌ tokodoy dun.”
23 Tibuwa daꞌ in tabaloy og libun.
Na minangoy diyanin ong mga mulidin bangka poktaluꞌ,
“Pawaꞌ nu og libun koyon,
poꞌ mokosasow og gekesin.”
24 Tibuwa tinabal ni Isa og libun,
longin,
“Piangoyu da dini song mga bangsa Israel nong mamaꞌ hantang nong mga bilibili mibolong.”
25 Tibuwa mikpolani og libun koyon diyanin bangka sudjud sog gadapanin,
taluꞌ in,
“Tuwan,
tabangoy nu akon!”
26 Tinumabal si Isa,
“Kanaꞌ mobais awion ok kan nong mga gumbataꞌ bangka bogoyoy song mga gitok.”d
27 Ok taluꞌ nog libun koyon,
“Oo,
motud Tuwan,
sugaid ong mga gitok sooy kuman da sop nong mga mumu nong molabuꞌ tidu sog lomisahan nog gapuꞌ nilon.”
28 Tubus miktaluꞌ si Isa diyanin,
“Mosolag ok pongandol nu,
buweꞌ!
Na mounut ok kolegan nu koyon.”
Bu kiulian mogdayun og bataꞌ in sog waktu kituꞌ.
Piokan ni Panghuꞌ Isa ok Pat Ngibu Labi nok Tow
29 Doksuꞌ miglandan na siloꞌ Isa tidu dituꞌ,
minusul ilon sok kilid nog Linow Jalil.
Tubus tinumukad yanin sog bontud bangka ingkud dituꞌ.
30 Na minangoy diyanin ong mga mosolag nok tumpukan nok tow.
Inoyit nilon ong mga daday,
pingkaꞌ,
buta,
gumow,
bu modakol pa.
Binotang nilon ong mga misaki koyon sog gadapan ni Isa,
bu kiulianin ilon.
31 Kisobuan ong mga tow dangan mitongow nilon nong mokopoktaluꞌ na og gumow,
ok pingkaꞌ kiulian na,
og daday mokopanow na,
bu og buta mokotongow na,
bu piotas nilon ok Tuhan nog bangsa Israel.
32 Tubus tinawag ni Isa ong mga mulidin,
bangka nin taluoy,
“Mololatu sok tumpukan nong mga tow kini,
poꞌ tolu ondow na ilon dini dinakon,
bu daꞌdun na ong mokan nilon.
Diꞌ u da sop meleg nok pulion ku ilon nong mogutom,
poꞌ sunoy punungon ilon sog dalan.”
33 Na sinakan yanin nong mga mulidin,
“Ayin ita ma buwan alap nok kan nong mogimpod sog landuꞌ kodakol nok tow koyon nog dini ita ma song mohinok nog bonuwa kini?”
34 Sinakan ilon ni Isa,
“Sanu buk ok pan niyu?”
Ok tabal nilon,
“Pitu buk,
bu ongon sop sanu buk nok sodaꞌ nong mobeteꞌ.”
35 Na tinaluan ni Isa ok tumpukan nong mga tow nong mingkud ilon sog lupaꞌ.
36 Doksuꞌ inalapin ok pitu buk nok pan bug sodaꞌ bangka yanin poksukul sok Tuhan.
Puwas nituꞌ pikpitak-pitakin bu binogoyin song mga mulidin,
bangka nilon sop bogoyoy sok tumpukan nong mga tow.
37 Na mikokan ilon kotanan bu mibosug ilon.
Pinglimud pa tanan nilon ok pitu ambung nok samaꞌ nok kan.
38 Og dakol nong mikokan kituꞌ,
pat ngibu kotow nog laki,
liyu song mga kolibunan bug gumbataꞌ.
39 Tubus piuliꞌ na ni Isa ok tumpukan nong mga tow,
bangka yanin sakoy sog bolangoy bu minangoy ilon sog bonuwa molani song Magadan.