Binarakatan nok Tuhan si Yaꞌkuba
35
Na miktaluꞌ ok Tuhan dituꞌ ni Yaꞌkub,
“Pogmomosa na bu angoya sog Betel bu dituꞌ a pogonong.
Pogimunga dituꞌ nok pokkurbanan para dinakon,
ok Tuhan nong mikpotongow dinika sog waktu nong milaguya tidu sog gilug nu nok si Esaw.”
2 Dadi tinaluan ni Yaꞌkub ong mga libun-bataꞌ in bug lam nok tow nong migunut diyanin,
“Lumpuk niyu og lam nok tuhan-tuhan niyu,
poktowbat amu,
bangka amu poliguꞌ,
bu gantian niyu ong mga ponapot niyu.
3 Mangoy ita sog Betel,
bu mogimungu nok pokkurbanan dituꞌ posunguꞌ sok Tuhan nok tinumabang dinakon sog waktu nok sog diyalomu nok kosusahan.
Daꞌ in akon potiyangoy sok panowu bisan ayin-ayin ku angoy.”
4 Dadi binogoy nilon ni Yaꞌkub ong mga tuhan-tuhan nilon,
sampoy ong mga ponampongb nilon.
Doksuꞌ linobut ni Yaꞌkub og lam nituꞌ sog diyalom nong mosolag nok pun kayu molani sog bonuwa Sekem.
5 Dangan mipanow na siloꞌ Yaꞌkub,
daꞌdun ong mikogaus gumonat dinilon poꞌ pidatongan nok Tuhan nog gondok ong mga tow song mga lungsud sok polibut nilon koyon.
6 Minatong si Yaꞌkub bug mga duma nin dituꞌ sog bonuwa Lus,
nok tinawag sop nog Betel,
dituꞌ sok Kanaan.
7 Na migimung si Yaꞌkub diyon nok pokkurbanan.
Iningalananin og bonuwa koyon nog El Betel poꞌ diyon mikpotongow ok Tuhan diyanin dangan milaguy yanin tidu sog gilugin nok si Esaw.
8 Na ongon ong migogipat ni Ribeka,
ong ngalanin si Debora.
Minatoy yanin,
bu kinubul yanin sok silung nong mosolag nok pun kayu sog babaan nog bonuwa Betel.
Saan na og bonuwa koyon iningalanan nog Allon Bakut.c
9 Na mikpotongow mokpuliꞌ ok Tuhan ni Yaꞌkub poguliꞌ in tidu sok Paddan Aram,
bu binarakatan yanin.
10 Miktaluꞌ ok Tuhan diyanin,
“Ong ngalan nu si Yaꞌkub,
sugaid tidu ningkomun ondiꞌ a na tawagon nog Yaꞌkub,
sugaid Israel na ong ngalan nu.”
Dadi miimung Israel ong ngalanin.
11 Miktaluꞌ na sop ok Tuhan diyanin,
“Akon ok Tuhan nong Mokowasa.
Poktupuꞌ bu poksidakola!
Moimunga nong modakol nog bangsa,
bu modakol ok sultan nong moktidu dinika.
12 Og bonuwa nog binogoyu ni Ibrahim bu ni Isahak,
bogoyon ku sop dinika bu song mga ponupuꞌ nu.”
13 Na minawaꞌ ok Tuhan sog bonuwa koyon doksuꞌ in taluoy si Yaꞌkub.
14 Dadi mikpotindog si Yaꞌkub nog batu sog bonuwa nok tinaluan yanin nok Tuhan,
bu tinuyunganin nok tubig anggul bug lana bagun podinsamaon imungon poksumbahan sok Tuhan.
15 Iningalananin og bonuwa koyon nog Beteld bug ayin yanin tinaluan nok Tuhan.
Pasal sok Kopatoy ni Rakiya bu ni Isahak
16 Puwas nituꞌ minawaꞌ na siloꞌ Yaꞌkub sog bonuwa nog Betel.
Dangan molayuꞌ-layuꞌ pa ilon tidu sog bonuwa nog Eprata,
pinakitan na si Rakiya,
bu kilogonan yanin mogbataꞌ.
17 Dangan pinakitan na tokodoy yanin,
tinaluan yanin nok pandoy,
“Diꞌ a mondok Rakiya,
poꞌ og laki na sop og bataꞌ nu.”
18 Dangan posunguꞌ na motoktus si Rakiya doksuꞌ mogbataꞌ,
iningalananin og bataꞌ in nog Ben Oni,e
sugaid iningalanan ni Yaꞌkub nog Benhamin.f
19 Minatoy si Rakiya,
bu kinubul yanin sok kilid dalan nok posunguꞌ sog Eprata nok tinawag ningkomun nog Betlehem.
20 Binotangan ni Yaꞌkub nok sunduk nog batu ok kubul ni Rakiya,
bu diyon pa sampoy ningkomun.
21 Mipanow na sop siloꞌ Israel,
bu mikpotindog ilon nog lokow-lokow sok sobolaꞌ nong Migdal Eder.
22 Dangan dituꞌ migonong si Israel,
minuboy si Ruben ni Bilha,
ok solobuk nong mga libun nog gommaꞌ in.
Na midongog ni Israel pasal dun.g
Na ong mga gumbataꞌ ni Yaꞌkub nog laki,
sopuluꞌ bu duwaꞌ kotow.
23 Ong mga gumbataꞌ in ni Leya,
yonin na si Ruben,
og gulang bataꞌ,
bu si Simeon,
si Lebi,
si Yahud,
si Issakar,
bu si Sebulun.
24 Ong mga gumbataꞌ in ni Rakiya,
yonin na si Yusuph bug si Benhamin.
25 Ong mga gumbataꞌ in ni Bilha,
nok sosuguon ni Rakiya,
yonin na siloꞌ Dan bug Naptali.
26 Ong mga gumbataꞌ in ni Silpa,
nok sosuguon ni Leya,
yonin na si Gad bug si Aser.
Ilon koyon ong mga gumbataꞌ ni Yaꞌkub nog laki nog binataꞌ sok Paddan Aram.
27 Tubus minangoy si Yaꞌkub dituꞌ sog gommaꞌ in nok si Isahak sog bonuwa Mamre,
molani sog Hebron,
og iningalanan nok Kiryat Arba tagnaꞌ.
Yonin na ok pigonongan ni Ibrahim bu ni Isahak.
28 Na og gumul ni Isahak mikosaut sogatus bu walu puluꞌ tahun.
29 Dadi minatoy yanin nog gulanganin,
bu kinubul yanin nong mga gumbataꞌ in nok si Esaw bu si Yaꞌkub.