Miktongow si Yaꞌkuba bu si Esaw
33
Na ondaꞌ kobon,
mitongow ni Yaꞌkub si Esaw posunguꞌ diyon diyanin dunut pat gatus piktowanin nog laki.
Dadi piangoyin ong mga gumbataꞌ in song mga ginaꞌ nilon.
2 Doksuꞌ piuna nin og duwaꞌ kotow nok sosuguon nog libun bug gumbataꞌ nilon,
sumunuꞌ si Leya bug mga gumbataꞌ in,
bangka si Rakiya bug bataꞌ in nok si Yusupb.
3 Si Yaꞌkub tibuwa ong miguna dinilon kotanan.
Sinumujud yanin toktob pitu kali,
soliyanin mokpolani sog gilugin nok si Esaw.
4 Tibuwa ginumobok si Esaw lumumpak ni Yaꞌkub,
bangka nin kokopoy bu alokoy,
bu mikopogaduy ilon duwaꞌ.
5 Doksuꞌ mitongow ni Esaw ong mga libun bug mga gumbataꞌ,
dadi sinakanin si Yaꞌkub,
“Sima ilon koyon?”
Tinumabal si Yaꞌkub,
“Yonin na koyon ong mga gumbataꞌ u nog binogoy nok Tuhan dinakon kini tidu sog lolatin.”
6 Dadi mikpolani og duwaꞌ kotow nok sosuguon bug mga gumbataꞌ in,
bangka sudjud sog gadapan ni Esaw.
7 Simunuꞌ sop si Leya bug mga gumbataꞌ in nong mikpolani bu sinumudjud,
bu ong mibinayaꞌ si Rakiya bug bataꞌ in nok si Yusup nok sinumudjud.
8 Doksuꞌ miksak si Esaw ni Yaꞌkub,
“Olo ong maana nok tumpukan nong mga potubuon nong milumpaku kituꞌ?”
Tinumabal si Yaꞌkub,
“Tuwan,
kituꞌ og lolumpakan para dinika bagun kololatan nu akon.”
9 Miktaluꞌ si Esaw,
“Toꞌ,
ondiꞌ na,
poꞌ modakol na og gartaꞌ u,
nika na kituꞌ.”
10 Taluꞌ ni Yaꞌkub,
“Bilaꞌ mobais na og gatoy nu dinakon,
tolimaꞌ nu busung-busung ong mga pimogoyu dinika.
Poꞌ dangan mitongowu ong muluꞌ nu,
mamaꞌ da nong mitongowu ong muluꞌ nok Tuhan poꞌ tinolimaꞌ nu akon nong mobais.
11 Tabuk nu na og lolumpakan nu dinakon.
Daꞌdun na ok kulang dinakon,
poꞌ binogoyan ku da nok Tuhan nok kobaisan.”
Pasal sok koponogol ni Yaꞌkub mamaꞌ nituꞌ,
tinolimaꞌ na ni Esaw.
12 Na miktaluꞌ si Esaw,
“Sung,
mopanow ita,
mogdunut ita na.”
13 Na tinumabal si Yaꞌkub,
“Tuwan,
kiosunan nu nong mayaꞌ-mayaꞌ mopanow ong mga gumbataꞌ,
bu piduduꞌ pa nong mga bilibili bug kambing bug mga sapiꞌ og bataꞌ nilon.
Bilaꞌ togolon ta ilon mopanow bisan sondow,
insunoy momatoy ilon.
14 Tuwan,
mobais pa bayuꞌ in bilaꞌ moguna amu na sok sosuguon nu kini.
Mogmayaꞌ-mayaꞌ ami dona tumuyuk diniyu,
poꞌ mogalagad ami sok kopagas mopanow nong mga bataꞌ bug mga potubuon.
Dituꞌ ita na pogbalak sok Seir.”
15 Miktaluꞌ si Esaw,
“Toꞌ,
bilaꞌ maꞌ nituꞌ,
bagakon ku ong mga duma nok piktowan ku dinika.”
Tinumabal si Yaꞌkub,
“Sogaran na bisan ondiꞌ na sooy.
Ong mosolag dinakon nong mobais na og gatoy nu dinakon.”
16 Dadi sog gondow nituꞌ minuliꞌ na si Esaw sok kobontudan nok Seir.
17 Sugaid siloꞌ Yaꞌkub mipanow posunguꞌ sog bonuwa Sukkot.
Pogdatong nilon dituꞌ,
mikpotindog si Yaꞌkub nog baloy bug lokow-lokow nong mga potubuon,
saan na og bonuwa koyon iningalanan nok Sukkot.c
18 Na sok poguliꞌ ni Yaꞌkub tidu sok Paddan Aram,
minatong yanin nong mosannang sog bonuwa Kanaan.
Misaut ilon sok siyudad nok Sekem, bu mikpindog yanin nong mga lokow-lokow nilon song molani nok siyudad.
19 Og lupaꞌ nok pinasokan nilon nong mga lokow-lokow,
sinaluy ni Yaꞌkub song mga gumbataꞌ ni Hamur sog halgaꞌ nok sogatus buk sin silber.
Si Hamur kini og gommaꞌ ni Sekem.
20 Migimung dituꞌ si Israel,
nog yonin na si Yaꞌkub,d
nok pokkurbanan,
bu iningalanin nog El Elohe Israel.
Ong maana nin Ok Tuhan,
ok Tuhan ni Israel.