Ponognaan 32

Mikpodinsamaꞌ si Yaꞌkub sok Poktongow nilon ni Esaw

Na dangan mipanow na siloꞌ Yaꞌkub, linumpak yanin nong mga nok Tuhan. 2 Poktontong ni Yaꞌkub dinilon taluꞌ in, “Pigonongan ma saan kini nong mga sundalu nok Tuhan.” Dadi iningalananin og bonuwa koyon nong Mahanaim.

3 Na ongon ong mga tow nok sinuguꞌ ni Yaꞌkub moguna diyanin posunguꞌ sog gilugin nok si Esaw dituꞌ sok kobontudan nok Seir sog bonuwa nog Edom. 4 Tinonduan ilon ni Yaꞌkub, ok taluꞌ in, “Taluan niyu og gilugu, ‘Tuwan Esaw, ok taluꞌ nok sosuguon nu nok si Yaꞌkub, “Dituꞌ u migonong ni bapaꞌ Laban bu ondaꞌ u poguliꞌ-uliꞌ sampoy na song ningkomun. 5 Modakol na ong mga sapiꞌ u, mga , mga bug mga kambing, bu modakol na ong mga sosuguon ku nog libun bug laki. Tuwan, piuna u diyon dinika ong mga sosuguon ku bagun posunan ka nog datongu. Bung mayan kosuatan ka da bosiya dinakon.” ’ ”

6 Doksuꞌ mikopuliꞌ na ong mga sosuguon diyon ni Yaꞌkub, taluꞌ nilon, “Pisampoy nami na ok tugun nu dituꞌ sog gilug nu nok si Esaw. Posunguꞌ na yanin dini poꞌ lumpakonin ika bu pat gatus kotow nong mga laki og dunutin.” 7 Na kiondokan tokodoy bu misusa si Yaꞌkub. Dadi tinongaꞌ in ong mga tow sog diyalomanin, sampoy na ong mga bilibili, kambing, sapiꞌ bug guntaꞌ in. 8 Poꞌ sok pikilan ni Yaꞌkub, bilaꞌ mangoy si Esaw diyon momunuꞌ dinilon, mokopolaguy pa ok sobahagiꞌ.

9 Na mingoni-ngoni si Yaꞌkub, taluꞌ in, “U Tuhan ni Omboꞌ bug gommaꞌ u nok si , mongoni u dinika nok tabang. U Pogbayaꞌ-bayaꞌ miktaluꞌ a dinakon nong muliꞌ u na sog bonuwa u bu song mga gusba u, bu jimanjiꞌ a nog bogoyan nu akon nok kobaisan. 10 Kanaꞌ u tolopon sok tabang bug nok pitongow nu sog nu kini. Poꞌ pogawaꞌ u sog bonuwa u, timolipagu sok subaꞌ Jordan nog daꞌdun ong mioyitu nog olo-olo muwal solobuk tungkod sok komotu. Ningkomun, ongon na duwaꞌ tumpukan ok potubuon bug tow sog diyaloman ku. 11 Ok kondokan ku, insunoy mangoy og gilugu nok si Esaw dini bagun patoyonin ami kotanan sampoy ong mga libun-bataꞌ u. Bung mayan tabangan nu akon. 12 Jinanjian nu akon nok pobaisan nu akon bu podakolon nu ok ponupuꞌ u sampoy sog ondiꞌ moitung, mamaꞌ nok pontad sok kilid dagat.”

13 Na sog gobi niyon diyon mitulug siloꞌ Yaꞌkub. Poksisolom mimiliꞌ yanin nong mga potubuonin gantaꞌ nog lolumpakan ni Esaw. 14 Og lolumpakanin dun yonin na duwaꞌ gatus kambing libun, bu duwaꞌ puluꞌ kambing laki. Duwaꞌ gatus bilibili libun, bu duwaꞌ puluꞌ bilibili laki. 15 Tolu puluꞌ guntaꞌ nok poggatasan dunut nati nin, pat puluꞌ sapiꞌ nog libun bu sopuluꞌ turu. Duwaꞌ puluꞌ kudaꞌ himar nog libun, bu sopuluꞌ kudaꞌ himar nog laki. 16 Na piglumpuk-lumpuk ni Yaꞌkub ong mga potubuon koyon, bu ok solumpuk ongon ong mga sosuguon nong migipat dun. Tinaluanin ong mga sosuguonin, “Poguna amu dinakon sog dipag, bu poglayuꞌ-layuꞌ niyu ok sosuku nog lumpukan sog len lumpukan.” 17 Tinaluanin ok sosuguonin nong mikuna, taluꞌ in, “Bilaꞌ molumpak nu og gulang bataꞌ u nok si Esaw bu sakonin ika, ‘Sima og gamu nu?’ Atawa, ‘Ayin ka posunguꞌ?’ Atawa, ‘Sima og gapuꞌ nong mga potubuon nog inoyit nu?’ 18 Na ok tabal nu diyanin, ‘Tuwan, og gapuꞌ nini ok sosuguon nu nok si Yaꞌkub. Sinuguꞌ in mogoyit diyon dinika og lolumpakan nu. Diyon na yanin miktuyuk sog binayaan.’ ” 19 Bu yonin sop kituꞌ ok tinaluꞌ in sog ikoduwaꞌ bu sog ikotolu bu sog lam nong mga sosuguon nong migoyit nok tumpukan nong mga potubuon. 20 Pipondomanin ilon, ok taluꞌ in, “Diꞌ niyu kolingowan moktaluꞌ nog diyon na sog binayaan ok sosuguon nu nok si Yaꞌkub.” Sog diyalom atoy ni Yaꞌkub, “Punahon ku ong mga lolumpakan nog gulang bataꞌ u bagun mopobaisu og gatoyin. Dadi bilaꞌ moktongow ami, kalu-kalu ampunonin na akon.” 21 Dadi piuna ni Yaꞌkub ong mga lolumpakan kituꞌ, bu mikpobilin pa yanin sogobi diyon sok pigulalihan nilon koyon.

Ongon og Limudoy ni Yaꞌkub sok Peniel

22 Sog gobi nituꞌ, migbuwat si Yaꞌkub bu inoyitin og duwaꞌ kotow nog libunin, bu ok sopuluꞌ bu sala kotow nog gumbataꞌ in, sampoy ok kododuwaꞌ nong mga libunin. Doksuꞌ timolipag ilon sok subaꞌ nog Yabbok. 23 Tubus nituꞌ pitolipagin na sop og lam nog gartaꞌ in. 24 Dangan sala-sala dona ni Yaꞌkub mibagak diyon, ongon ong minatong nog laki bangka nin ludoyoy si Yaꞌkub taman sog doliꞌ-ondow. 25 Na mibatik ok tow koyon nog diꞌ dagon si Yaꞌkub, dadi pinosolin og longlonguan nok pangkat ni Yaꞌkub bu miluwad. 26 Doksuꞌ miktaluꞌ ok tow, “Lukatan nu na akon poꞌ posunguꞌ na og doliꞌ-ondow.” Ok tabal ni Yaꞌkub, “Diꞌ u ika lukatan bug diꞌ nu akon barakatan.” 27 Sinakan nok tow kituꞌ si Yaꞌkub, “Sima ong ngalan nu?” Tinumabal yanin, “Ong ngalan ku si Yaꞌkub.” 28 Na ok taluꞌ nok tow kituꞌ, “Kanaꞌ na Yaꞌkub ong ngalan nu, sugaid Israel na, poꞌ mikotatasa sok poksuloy nok Tuhan bug tow.” 29 Dadi miksak si Yaꞌkub diyanin, “Sima a koyon?” Ok tabalin, “Manu sakon nu ma ong ngalan ku?” Doksuꞌ binarakatanin si Yaꞌkub diyon. 30 Taluꞌ ni Yaꞌkub, “Uy na, tidu u na ma saan mogadap bug Tuhan sokaliꞌ totubuꞌ u pa.” Saan na iningalanan ni Yaꞌkub og bonuwa koyon nok Peniel.

31 Ok kogonat ni Yaꞌkub sok Peniel, similak na ong mata gondow. Mikpingkaꞌ-pingkaꞌ na yanin pasal sog longlonguanin. 32 Saan na sampoy ningkomun diꞌ kuman ong mga tow nong mosolag nog gugat nok sinumbaliꞌ sog dapit pangkat, poꞌ diyon tampal pinosol si Yaꞌkub nog duma nin kituꞌ mogludoy.