Ponognaan 31

Milaguy siloꞌ Yaꞌkub tidu ni Laban

Dadi mikodongog si Yaꞌkub nong minaluꞌ-naluꞌ ong mga gumbataꞌ ni Laban, taluꞌ nilon, “Inalap ni Yaꞌkub og lam nok pongartaꞌ nog gommaꞌ ta niyu. Og gartaꞌ ni Ommaꞌ ok pigdaya nin koyon.” 2 Mibatik ni Yaꞌkub nog len na og gaddat ni Laban diyanin, kanaꞌ na mamaꞌ nok tagnaꞌ kituꞌ.

3 Na tinaluan nok Tuhan si Yaꞌkub, “Uliꞌ a na sog bonuwa nog gommaꞌ nu bu song mga gusba-waris nu, bu diyon ku da dinika.”

4 Dadi pitawag ni Yaꞌkub ong mga libunin nok si Rakiya bu si Leya mangoy dituꞌ diyanin sok pogipatanin nong mga potubuon. 5 Miktaluꞌ si Yaꞌkub dinilon, “Mibatiku nog len na og gaddat nog gommaꞌ niyu dinakon, kanaꞌ na mamaꞌ nok tagnaꞌ kituꞌ, sugaid daꞌ u da potiyangoy nok Tuhan nog gommaꞌ u. 6 Kiosunan niyu nong miktiksaꞌ u moginang sog gommaꞌ niyu. 7 Sugaid pidupangin akon. Sopuluꞌ kali nin pinda-pindahoy og gadji u. Tibuwa daꞌ yanin kumboyoy nok Tuhan nong mulahanin akon. 8 Poꞌ bilaꞌ taluꞌ nog gommaꞌ niyu og gadji u, yonin na ong mga bottikan, na migbataꞌ nog bottikan og lam nilon. Bu bilaꞌ taluꞌ in nok taga jaliꞌ na og gadji u, na migbataꞌ nog jaliꞌ og lam nilon. 9 Inawaꞌ nok Tuhan ong mga potubuon nog gommaꞌ niyu bangka nin bogoyoy dinakon.

10 Na sog waktu nok pogloguk nong mga potubuon, miktoginopu. Mitongowu ong mga kabang, bottikan bug jaliꞌ nok kambing laki mingloguk. 11 Doksuꞌ sog diyalom toginopu, miktaluꞌ ong nok Tuhan dinakon, ‘Yaꞌkub.’ Tinumabalu, ‘Kini u da.’ 12 Miktaluꞌ ong malaikat, ‘Tontong nu ba, og lam nok potubuon nong migloguk polanan kabang, bottikan bug jaliꞌ hadja. Ininangu kini poꞌ mitongowu ok kotanan nok pinginang ni Laban dinika. 13 Akon ok Tuhan nong mikpotongow dinika dituꞌ sog Betel nok piindogan nu kituꞌ nog batu bangka nu ududoy nog lana, pomondoman nu nakon. Simapa a dinakon dituꞌ. Na pogbuwata bangka a uliꞌ dituꞌ sog bonuwa nog binataan dinika.’ ”

14 Tinumabal si Rakiya bu si Leya ni Yaꞌkub, “Daꞌdun na ok pusakaꞌ nog gommaꞌ nami dinami. 15 Len tow na ong niyatin dinami. Mamaꞌ nok pigdagangin ami, bu mitipotin na ok sunggudan nami. 16 Og lam nog gartaꞌ nog gommaꞌ nami nog inalap nok Tuhan diyanin, dinita tokodoy bu song mga gumbataꞌ ta. Dadi unut nu bug olo-olo ong mga sinuguꞌ nok Tuhan dinika.”

17 Dadi mingmomos si Yaꞌkub, bangka nin posakoyoy ong mga libun bug mga gumbataꞌ in sog guntaꞌ. 18 Piuna nin ong mga potubuonin bu inoyitin og lam nog gartaꞌ nong milumpukin sog bonuwa Paddan Aram. Puwas nituꞌ mikposunguꞌ ilon sog bonuwa nok , ok pigonongan nog gommaꞌ in nok si .

19 Sog waktu nok koawaꞌ nilon, kiotangan nog dituꞌ si Laban miggunting nong mga nin. Dadi dinakow ni Rakiya ok tuhan-tuhan nog gommaꞌ in. 20 Inakkalan ni Yaꞌkub si Laban, poꞌ daꞌ yanin pomuhun nong mawaꞌ na yanin. 21 Milaguy yanin, bu inoyitin og lam nog gartaꞌ in, bu tinumolipag ilon sok subaꞌ nog Alpurati bangka ilon pokposunguꞌ sok kobontudan nog Gilead.

Ginonat ni Laban si Yaꞌkub

22 Na sog ikotolu ondow piosunan na si Laban nong milaguy siloꞌ Yaꞌkub. 23 Dadi tinuyuk ilon ni Laban bug mga gusba nin sog diyalom nok pitu ondow bu misaut nilon sok kobukidan nog Gilead. 24 Sog gobi niyon mikpotoginop ok Tuhan dituꞌ ni Laban, taluꞌ nok Tuhan, “Diꞌ nu olohon si Yaꞌkub.”

25 Na mikpotindog na si Yaꞌkub nog lokow-lokowin sok kobukidan nog Gilead. Pogdatong niloꞌ Laban, dituꞌ da sop ilon mikpotindog nog lokow-lokow nilon. 26 Dadi miktaluꞌ si Laban ni Yaꞌkub, “Manu ininang nu ma kini dinakon? Manu inakkalan nu ma akon, bu inoyit nu pa ong mga gumbataꞌ u mamaꞌ nong miagow tidu sok pogbunuan? 27 Manu dinupang nu ma akon, bu daꞌ a ma tanan pomuhun dinakon? Bilaꞌ miktaluꞌ a pa, popanowon ku amu sog diyalom nok poglami-lamihan nok kolangan dunut nog biyulla bug gabbang. 28 Manu daꞌ nu ma tanan akon poalokoy song mga gapuꞌ u bug mga gumbataꞌ u sok pokpanow nilon? Dupangon ka tokodoy! 29 Ongon ok kopatutu mominasa dinika, sugaid kogobi pigondian ku nok Tuhan nog gommaꞌ nu, nog diꞌ a olohon. 30 Kiosunan ku nong melega muliꞌ poꞌ mipinglowa na tokodoy sog gusba nu, sugaid manu dinakow nu pa ma ok tuhan-tuhan ku?”

31 Tinumabal si Yaꞌkub ni Laban, “Daꞌ u na pomuhun dinika poꞌ miondoku, poꞌ baluꞌ u dun diꞌ nu kumboyon ong mga gumbataꞌ nu mogunut dinakon. 32 Sugaid pasal song mga tuhan-tuhan nu nong mibolong, bug sima-sima ok kotongowan nu dun dinami, daꞌdun ok kopatutin motubuꞌ. Na kosaksian nong mga lahasiyaꞌ ta. Ponontong nu na bilaꞌ ongon ong motongow nu nong mga gartaꞌ nu dini, bangka nu alap!” Na ondaꞌ kosunoy ni Yaꞌkub nok si Rakiya ong minakow nong mga tuhan-tuhan koyon.

33 Dadi pinontong ni Laban ong mga tuhan-tuhanin sog ni Yaꞌkub. Doksuꞌ simolod yanin sog lokow-lokow ni Leya, bug lokow-lokow nog duwaꞌ kotow nok sosuguon nilon nok siloꞌ Bilha bu Silpa. Tibuwa daꞌ in tokodoy kotongow ong mga tuhan-tuhanin. Pogluwasin sog lokow-lokow ni Leya, minangoy yanin sog lokow-lokow ni Rakiya. 34 Sugaid binuni ni Rakiya ok tuhan-tuhan sog diyalom nok sobanig nog guntaꞌ, bangka nin ingkudoy. Pinontong ni Laban ong mga tuhan-tuhan sog lokow-lokow ni Rakiya, sugaid daꞌ in tokodoy kotongow. 35 Na miktaluꞌ si Rakiya sog gommaꞌ in, “Ommaꞌ, diꞌ a dona molingit nog diꞌ u mokindog poꞌ binulan ku.” Pinontong tokodoy ni Laban, sugaid daꞌ in kotongow ong mga tuhan-tuhanin.

36 Dadi milingit si Yaꞌkub, taluꞌ in ni Laban, “Olo og u? Olo ok saraꞌ nong midugtulu nog ginonat nu akon dini? 37 Pinglungkal nu na ok kotanan nog goyitu. Dadi poluwas nu ong mitongow nu nong nika og gapuꞌ in, bagun motongow nong mga gusba-waris ta, bu ilon na og humukum dinita. 38 Duwaꞌ puluꞌ tahun ku na sog diyaloman nu. Inipatan ku nong mahatul ong mga bilibili nu, saan diꞌ da kapasan, bu daꞌ u tanan kan nog bilibili nu. 39 Ong mga potubuon nu nok pinatoy nong mga binatang talun, ginantian ku mogdayun. Pibayad nu sop nakon ong mga potubuon nog dinakow sog gondow atawa gobi. 40 Milossahi u tokodoy sok kopodosan, bu sog gobi sok kotigdowan, bu sigi-sigi kulang ok tulugu. 41 Migonongu diniyu sog diyalom duwaꞌ puluꞌ tahun. Miginangu dinika sopuluꞌ bu pat tahun para sog duwaꞌ kotow nog bataꞌ nu. Doksuꞌ miginangu pa tokodoy nom tahun mogipat nong mga potubuon nu. Tibuwa og ininang nu, pikpinda-pinda nu mokosopuluꞌ kali og gadji u. 42 Daypara, tinabangan ku nok Tuhan, ok pigondok nog gommaꞌ u nok si , bu ok piktuhanan ni Omboꞌ . Bilaꞌ daꞌ u pa tabangoy nok Tuhan, sunoy pipanow nu na akon nog daꞌdun ong mioyit-oyitu. Sugaid mitongow nok Tuhan ok kologon bug tiksaꞌ u, dadi pigondianin ika kogobi.”

Ok Pikpasadan ni Yaꞌkub bu ni Laban

43 Tinumabal si Laban ni Yaꞌkub, “Ong mga libun koyon mga gumbataꞌ u, bu mga gumbataꞌ nilon, ong mga gapuꞌ u, ong mga potubuon koyon nakon sop, bu og lam nong motongow nu, nakon og gapuꞌ in. Tibuwa daꞌdun na ong moinangu song mga bataꞌ u bug mga gapuꞌ u. 44 Na mogimung ita nok pokpasadan, bagun pomondoman ta nog diꞌ ta kolingowan.”

45 Dadi minalap si Yaꞌkub nong mosolag nog batu bangka nin poindogoy inimung nok pomondoman. 46 Doksuꞌ sinuguꞌ in ong mga gusba nin nong moktopuk nong mga batu, bu tinuman nilon. Doksuꞌ kinuman ilon sok tinopuk nog batu. 47 Iningalanan ni Laban ok tinopuk nog batu kituꞌ nog Yegar Sahaduta. Bu iningalanan ni Yaꞌkub nog Galeed.

48 Tinaluꞌ ni Laban dituꞌ ni Yaꞌkub, “Ok tinopuk nog batu kini ong mokposobonnal nok pokpasadan ta duwaꞌ.” Saan na iningalanan nog Galeed. 49 Tinawag sop og bonuwa koyon nong Mispa poꞌ timaluꞌ pa si Laban, “Bung mayan ipaton ita da nok Tuhan bagun diꞌ ita dumugtul sok pokpasadan ta sok poksuwoy ta kini. 50 Bilaꞌ kanaꞌ mobais ok pogoyit nu song mga gumbataꞌ u, atawa moglibun ka nog len, bisan diꞌ u kosunan, ok Tuhan da ong mokosaksiꞌ dun.” 51 Miktaluꞌ pa si Laban ni Yaꞌkub, “Tontong nu ok tinopuk nog batu bu og batu nok piindog sog lot ta. 52 Yonin kini ong mokpopondom dinita nog diꞌ u mogdadi lumiyu sok topukan nog batu kini bagun monglaat dinika, bu diꞌ a sop mogdadi lumiyu sok tinopuk nog batu kini bagun monglaat dinakon. 53 Bung mayan og humukum dinita ok Tuhan ni bu ok tuhan ni Nahor.” Dadi sinumapa si Yaꞌkub song ngalan nok Tuhan ok piggondok nog gommaꞌ in nok si .

54 Na mikkurban si Yaꞌkub posunguꞌ sok Tuhan sog bukid koyon. Tinawagin mogjamu og lam nog gusba-warisin, bu dituꞌ da sop ilon migulabung sok kobukidan. 55 Na migbuwat si Laban nog doliꞌ-ondow bangka nin alokoy ong mga gapuꞌ in bug mga gumbataꞌ in. Doksuꞌ pingoni-ngonihanin ilon nok kobaisan bangka uliꞌ siloꞌ Laban sog bonuwa nilon.