Ponognaan 30

Na si Rakiya, daꞌ pa tokodoy kobodos. Dadi migdalu yanin ni Leya. Miktaluꞌ yanin ni Yaꞌkub, “Bogoyoy nu akon nog bataꞌ poꞌ bug ondiꞌ, golomu pa matoy.” 2 Pigboluanan ni Yaꞌkub si Rakiya, taluꞌ in, “Manu, akon taꞌ ok Tuhan? Yanin ong mogbayaꞌ nog diꞌ a mogbataꞌ.” 3 Na miktaluꞌ si Rakiya, “Bilaꞌ mamaꞌ niyon, kini na ok sosuguon ku nok si Bilha. Angoya diyanin bagun mokobalaku pa nog bataꞌ tidu diyanin.” 4 Doksuꞌ piktahakimin si Bilha sog laki nin bagun mopoglibunin. Dadi miksolobuk na ilon.

5 Na migbodos si Bilha bu migbataꞌ yanin nog laki. 6 Ok taluꞌ ni Rakiya, “Sinugutan ku nok Tuhan. Midongogin ok pongoni-ngoni u bu binogoyanin akon nog bataꞌ nog laki.” Saan na iningalananin nog Dan og bataꞌ kituꞌ nog inangkonin. 7 Doksuꞌ migbodos na sop mokpuliꞌ si Bilha. Migbataꞌ yanin nog laki, og ikoduwaꞌ bataꞌ nilon ni Yaꞌkub. 8 Miktaluꞌ si Rakiya, “Landuꞌ tokodoy ok poktiggolu sok kobinsanaan ku sog gilugu, sugaid mimondagu da.” Dadi iningalananin og bataꞌ koyon nong Naptali.

9 Dangan kiosunan ni Leya nog diꞌ na yanin mogbataꞌ, piktahakimin ok sosuguonin nok si Silpa bagun mopoglibun ni Yaꞌkub. 10 Na migbataꞌ si Silpa nog laki. 11 Miktaluꞌ si Leya, “Mobais ok sukudu!” Na iningalananin nog Gad og bataꞌ koyon. 12 Migbataꞌ na sop si Silpa nog laki, og ikoduwaꞌ nog bataꞌ nilon ni Yaꞌkub. 13 Na miktaluꞌ si Leya, “Migloliyagu na tokodoy! Motaluꞌ na nong mga kolibunan nong migloliyagu.” Dadi iningalananin og bataꞌ koyon nog Aser.

14 Na sog waktu nok ponggani nong mga ongon og gondow mipanow si Ruben, og bataꞌ ni Leya, bangka yanin pokobalak nong mga pomulan. Ok pomulan kituꞌ sok ponontong nilon og bulung bagun mokopogbataꞌ. Inoyit ni Ruben dituꞌ sog ginaꞌ in. Dadi mingoni si Rakiya dituꞌ ni Leya, taluꞌ in, “Kaꞌ, bogoyan nu pa akon nok pomulan nong mibalak nog bataꞌ nu.” 15 Ok tabal ni Leya, “Manu, daꞌ a pa koduhuloy nog inalap nu og laki u? Sampoy ok pomulan nong mibalak nog bataꞌ u, alapon nu pa?” Tinumabal si Rakiya, “Sigi, bilaꞌ bogoyan nu akon, diyon dinika si Yaꞌkub sog gobi kini.”

16 Dangan simindop na og gondow, minatong si Yaꞌkub tidu sog guma. Linumpak yanin ni Leya, bu tinaluanin, “Sumboy dini a tulug gobi kini, poꞌ binayadan ku na si Rakiya nok pomulan nong mibalak nog bataꞌ ta.” Dadi dituꞌ mitulug ni Leya si Yaꞌkub sog gobi nituꞌ. 17 Dinuhul nok Tuhan ok pingoni-ngoni ni Leya. Migbodos yanin, bu migbataꞌ yanin nog laki, og ikolima nog bataꞌ nilon ni Yaꞌkub. 18 Miktaluꞌ si Leya, “Tinungbasan ku nok Tuhan, poꞌ binogoyu ok sosuguon ku sog laki u bagun mopoglibunin.” Dadi iningalananin og bataꞌ in nog Issakar. 19 Migbodos na sop si Leya mokpuliꞌ, migbataꞌ yanin nog laki, og ikonom bataꞌ nilon ni Yaꞌkub. 20 Miktaluꞌ si Leya, “Mobais tokodoy og binogoy nakon nok Tuhan. Bantugon ku na bayuꞌ in nog laki u, poꞌ kibogoyan ku na yanin nong nom kotow nog bataꞌ nog laki.” Dadi iningalananin og bataꞌ in nok Sebulun. 21 Doksuꞌ migbodos na sop si Leya, bu migbataꞌ yanin nog libun. Na iningalananin nog Dina.

22 Pasal ni Rakiya, daꞌ da yanin kolingowoy nok Tuhan, dinuhul da ok pingoni-ngoni nin. 23 Migbodos yanin bu migbataꞌ nog laki. Taluꞌ in, “Inawaꞌ na nok Tuhan ok kosipogan ku.” 24 Dadi iningalananin nog Yusup, bu taluꞌ in, “Bung mayan bogoyan ku da mokpuliꞌ nok Tuhan nog bataꞌ nog laki.”

Ok Pokpasadan ni Yaꞌkub bu ni Laban

25 Dangan binataꞌ ni Rakiya si Yusup, inabit-abit ni Yaꞌkub si Laban, taluꞌ in, “Melegu na muliꞌ sog bonuwa u. 26 Pounut nu na dinakon ong mga libun-bataꞌ u ong miusaha u dini sog diyaloman nu. Kiosunan nu nok piktuyuan ku moginang dini dinika.” 27 Ok tabal ni Laban ni Yaꞌkub, “Poginongoga busung-busung poguna, poꞌ miutikaꞌ u nog rinidjikian ku nok Tuhan pasal dinika. 28 Na taluꞌ nu bug andun ok kolegan nu nog gadji, poꞌ bogoyon ku dinika.” 29 Tinumabal si Yaꞌkub, “Kiosunan nu da bug ponoy ok poktuyuꞌ u moginang dini dinika, bug ponoy ok pogdakol nong mga potubuon nu sog bon ku mogipat. 30 Sok pogdatongu dini, mikaan da ong mga potubuon nu, sugaid ningkomun modakol na tokodoy, poꞌ binarakatan ka nok Tuhan biyan sog ininangu. Na sumboy na monontongu nok kotubuan para song mga libun-bataꞌ u.” 31 Miksak mokpuliꞌ si Laban, “Andun tokodoy og gadji nok kolegan nu?” Ok tabal ni Yaꞌkub, “Diꞌ nu na akon gadjihan. Bilaꞌ melega, mogipatu mokpuliꞌ nong mga potubuon nu, sugaid ongon ok pongonihon ku dinika. 32 Duhulan nu akon nok polenon ku ningkomun ong mga bataꞌ nog bilibili nog gitom, bug mga bilibili bug kambing nok kabang song mga potubuon nu. Yonin hadja koyon og gantaꞌ gadji u. 33 Dadi sog lomaꞌ-dinglag molomu nu kosunan bug kopongandolan ku taꞌ atawa ondiꞌ. Poꞌ bilaꞌ motongow nu dinakon ong mga bilibili nok kanaꞌ gitom bu ok kambing nok kanaꞌ kabang, itung na koyon nog dinakowu tidu dinika.” 34 Ok tabal ni Laban, “Oo, sigi unutan ku ok kolegan nu.”

35 Sugaid sog gondow nituꞌ, pilen mogdayun ni Laban ong mga kabang nok kambing nog laki bug libun, bug lam nong mga gitom nog bataꞌ nog bilibili. Piipatin song mga gumbataꞌ in. 36 Doksuꞌ pipolayuꞌ in tidu ni Yaꞌkub. Og layuꞌ in mga tolu ondow panowon. Dadi ong mibagak nong mga potubuon yonin og inipat ni Yaꞌkub.

37 Na minalap si Yaꞌkub tolu ginis nok panga nok kayu bangka nin panitoy, sugaid daꞌ in tipotoy manit. Dadi bilaꞌ tontongon, ongon og jaliꞌ in nok putiꞌ. 38-39 Doksuꞌ pinasokin ong mga panga koyon sok tubig poginuman nong mga potubuon bagun motongow nilon. Na moglinogukoy ong mga potubuon bilaꞌ mangoy diyon minum sog gunan nong mga panga kayu nok pinanitan koyon. Dadi bilaꞌ mogbodos, og bataꞌ nilon kabang, boktikan bug baglis-baglis. 40 Na pilen ni Yaꞌkub ong mga bataꞌ nog bilibili bug kambing koyon tidu sok kodakolan nong mga potubuon. Doksuꞌ bilaꞌ moglinogukoy ok kodakolan kituꞌ, posunguonin song mga kabang bug gitom nok potubuon ni Laban. Maꞌ nini, ok koongon nok potubuon ni Yaꞌkub tidu ni Laban. 41 Na bilaꞌ posunguꞌ na moglinogukoy ong mga potubuon nong mobais og lawasin, pasokon mogdayun ni Yaꞌkub ong mga panga nog bakasin pinanitan sok sunguan nilon. 42 Sugaid diꞌ in inangon bilaꞌ ong mga potubuon nong mokolamma ong moglinogukoy. Dadi ong mga mokolamma, ni Laban bu ong mga mokolasig ong ni Yaꞌkub. 43 Song maꞌ niyon nok pobiyan mikkodayahan si Yaꞌkub. Miksidakol tokodoy diyanin ong mga bilibili, kambing, guntaꞌ bug sampoy ong mga sosuguonin libun bug laki.