Ponognaan 29

Ok Pogdatong ni Yaꞌkub sog Bapaꞌ in

Na pidayun ni Yaꞌkub ok panowin sampoy mikosaut yanin sog bonuwa nong mga tow nok taga silangan. 2 Mikotongow yanin dituꞌ nok timbaꞌ tinambolan nog batu mosolag, bu sog lumibutin ongon ok tolu tumpukan nog migbagad pinumon. 3 Bilaꞌ moktopuk na ong mga tumpukan nog bilibili, bangka pa ligidoy nong mga mogogipat og batu nok tambol nok timbaꞌ bangka nilon pinumoy ong mga bilibili. Doksuꞌ tambolon nilon da mokpuliꞌ.

4 Na sinakan ni Yaꞌkub ong mga mogogipat nong mga bilibili, taluꞌ in, “U mga koilugan ku, ayin amu tidu?” Ok tabal nilon, “Tidu ami sog Haran.” 5 Taluꞌ ni Yaꞌkub, “Kilalahan niyu taꞌ si Laban, og gapuꞌ ni Nahor?” Ok tabal nilon, “Oo, kilalahan nami.” 6 Taluꞌ ni Yaꞌkub dinilon, “Moolo-olo na yanin?” Tinumabal ilon, “Mobais da. Tontong nu, koyon na posunguꞌ dini og bataꞌ in nok si Rakiya dunut nong mga bilibili.” 7 Taluꞌ ni Yaꞌkub, “Motas pa og gondow, bu kanaꞌ pa og waktu nok poguliꞌ nong mga bilibili. Pinum niyu ilon bangka niyu posoksab mokpuliꞌ.” 8 Ok taluꞌ nilon, “Ondiꞌ pa mogdadi. Sumboy na matong og lam nok tumpukan nog bilibili bangka pa ligidoy ok tambol nok timbaꞌ, doksuꞌ bangka nami pa ilon pinumoy.”

9 Soliyan nilon mogabit-abit ni Yaꞌkub, minatong si Rakiya dunut nong mga bilibili nog gommaꞌ in, poꞌ yanin ong migipat dun. 10 Poktontong ni Yaꞌkub nog goguapuꞌ in nok si Rakiya bug mga bilibili ni bapaꞌ in Laban, minangoy yanin sok timbaꞌ bangka nin ligidoy ok tambol nok timbaꞌ bangka nin pinumoy ong mga bilibili nog bapaꞌ in. 11 Doksuꞌ sinalamin si Rakiya biyan sog galok, bu mikopogaduy yanin. 12 Miksuksug si Yaꞌkub ni Rakiya, “Akon og bataꞌ ni Ribeka, komanaku ni Ommaꞌ nu.” Na gimobok si Rakiya muliꞌ bangka nin suksugoy sog gommaꞌ in.

13 Dangan midongog ni Laban nog diyon ok komanakin nok si Yaꞌkub, og bataꞌ ni Ribeka, migdaliꞌ-daliꞌ yanin lumumpak dun. Kinokopin si Yaꞌkub bangka nin alokoy. Doksuꞌ inoyitin sog baloy nilon, bangka suksugoy ni Yaꞌkub og lam nok kibiyan-biyananin. 14 Tinaluan ni Laban si Yaꞌkub, “Motud tokodoy nog ika koyon og gungodu bug duguꞌ u.” Na migonong si Yaꞌkub diyanin sobulan.

Ok Pokpongakkal ni Laban

15 Pokpuwas nok sobulan, tinaluan ni Laban si Yaꞌkub, “Bisan komanaku ika, kanaꞌ nong moginanga dini nog daꞌdun og gadji nu, andun ok kolegan nu?” 16 Na ongon og bataꞌ ni Laban duwaꞌ kotow budjang. Ong ngalan nog gulang bataꞌ si Leya, bu si Rakiya ong mongud. 17 Molingkat ong mata ni Leya, sugaid mopiyalibun si Rakiya bu mobais og lawasin. 18 Na meleg si Yaꞌkub ni Rakiya, dadi tinaluanin si Laban, “Bapaꞌ, moginangu dinika pitu tahun bilaꞌ polakihan nu dinakon si Rakiya.” 19 Tinumabal si Laban, “Na mobais pa nok polakihan ku yanin dinika tidu sog len nog laki, na dini a na dinakon.”

20 Dadi miginang si Yaꞌkub dituꞌ ni Laban sog diyalom pitu tahun bagun mopoglibunin si Rakiya. Sokaliꞌ daꞌ in tanan kobatik ok pitu tahun kituꞌ, mamaꞌ da nok sanu ondow diyanin sabap sok kolasa nin ni Rakiya.

21 Na pokpuwas nok pitu tahun, miktaluꞌ si Yaꞌkub ni Laban, “Misaut na og waktu. Polakihan nu na dinakon og bataꞌ nu.” 22 Na meleg si Laban. Mikpojamu yanin bu piosunanin og lam nong mga tow sog bonuwa koyon nong mangoy lumuduk sok kawing. 23 Tibuwa poglogobi, og inoyit ni Laban dituꞌ ni Yaꞌkub, og bataꞌ in nok si Leya, bangka uboy si Yaꞌkub ni Leya. 24 Binogoy ni Laban og guliponin nog libun nok si Silpa dituꞌ ni Leya bagun moimungin nok sosuguon.

25 Dangan sisolom na, kiosunan ni Yaꞌkub nok si Leya ma taꞌ ok kikawinganin. Dadi sinakan ni Yaꞌkub si Laban, “Olo og ininang nu kini nakon? Miginangu dinika bagun mopoglibun ku si Rakiya, sugaid manu inakkalan nu akon?” 26 Ok tabal ni Laban, “Ondaꞌ koaddat dini sog bonuwa nami nong mokuna moglaki ong mongud tidu sog gulang bataꞌ. 27 Bagadan nu nong mopuwas ok sosimana kini, bangka u polakihoy si Rakiya dinika, sugaid moginanga pa puliꞌ pitu tahun para diyanin.” 28 Meleg si Yaꞌkub.

Dadi pogdoksuꞌ nok sosimana nok kawing nilon ni Leya, pilibunan ni Laban si Yaꞌkub ni Rakiya. 29 Binogoy ni Laban og guliponin nog libun nok si Bilha dituꞌ ni Rakiya bagun moimungin nok sosuguon. 30 Dadi minuboy si Yaꞌkub ni Rakiya. Na kolasahan ni Yaꞌkub si Rakiya tidu ni Leya. Doksuꞌ miginang na sop mokpuliꞌ si Yaꞌkub dituꞌ ni Laban pitu tahun.

Mga Gumbataꞌ ni Yaꞌkub

31 Na mitongow nok Tuhan nok kanaꞌ molasa si Yaꞌkub ni Leya, dadi tinabanganin si Leya bagun mokobataꞌ. Tibuwa si Rakiya ondiꞌ mokobataꞌ. 32 Migbodos si Leya bu migbataꞌ nog laki. Iningalananin nog Ruben, poꞌ taluꞌ in, “Kiosunan nok Tuhan ok kosusahan ku, tidu ningkomun kolasahan ku na nog laki u.” 33 Na migbodos na sop yanin mokpuliꞌ bu migbataꞌ yanin nog laki, miktaluꞌ yanin, “Binogoyan ku nok Tuhan nog bataꞌ nog laki, poꞌ midongogin nog diꞌ u kolasahan nog laki u.” Saan na iningalananin og bataꞌ in nok Simeon. 34 Migbodos na sop yanin, bu migbataꞌ na sop yanin nog laki. Miktaluꞌ yanin, “Ningkomun, lolayun na sumolobuk og laki u dinakon poꞌ tolu buk na og bataꞌ nami nog laki.” Saan na iningalananin og bataꞌ in nog Lebi. 35 Migbodos na sop yanin mokpuliꞌ bu migbataꞌ na sop nog laki. Miktaluꞌ yanin, “Pudjihon ku ok Tuhan.” Saan na iningalananin og bataꞌ in nog Yahud. Tidu dituꞌ ondaꞌ pa yanin pogbataꞌ.