Sinuguꞌ si Yaꞌkuba Mangoy sog Bapaꞌ in
28
Na pitawag ni Isahak si Yaꞌkub.
Pogdatongin,
pingoni-ngonihanin nok kobaisan bangka nin taluoy,
“Diꞌ a moglibun nok tow Kanaan.
2 Angoya dituꞌ ni Omboꞌ nu Betuel sog bonuwa Paddan Aram.
Golom pa moglibun ka nog bataꞌ ni bapaꞌ nu Laban,
og gilug ni Inaꞌ nu.
3 Bung mayan barakatan ka nok Tuhan Mokowasa,
bu bogoyan ka nok ponupuꞌ nong modakol,
bu moimunga nok poktiduhan nong modakol nog bangsa.
4 Bung mayan,
bogoyon da nok Tuhan dinika bu song mga ponupuꞌ nu og barakat nog binogoyin ni omboꞌ nu Ibrahim,
bagun nu moangkon og lupaꞌ nok pigonongan ta soliyan kini,
yonin na og bonuwa nog binogoy nok Tuhan dituꞌ ni omboꞌ nu Ibrahim.”
5 Puwas nituꞌ sinuguꞌ in na mopanow si Yaꞌkub posunguꞌ sok Paddan Aram,
dituꞌ ni Laban,
og bataꞌ ni Betuel nok tow Aram.
Na si Laban,
og gilug ni Ribeka, og ginaꞌ niloꞌ Yaꞌkub bu Esaw.
Miglibun Puliꞌ si Esaw
6 Na kiosunan ni Esaw nok pingoni-ngonihan nok kobaisan ni Isahak si Yaꞌkub,
bangka nin suguoy mangoy moglibun sog bonuwa Paddan Aram.
Kiosunanin nok pigondian nog gommaꞌ in si Yaꞌkub moglibun nok tow Kanaan.
7 Midongogin da sop nog inunut ni Yaꞌkub ok suguan nong mokogulang nilon,
bu mipanow yanin sog bonuwa nok Paddan Aram.
8 Na misabut ni Esaw,
nog diꞌ mosuat nog gommaꞌ in ong mga kolibunan sok Kanaan.
9 Dadi minangoy yanin sog bapaꞌ in nok si Ismael,
og bataꞌ ni Ibrahim,
bangka nin pa poglibunoy og gilug ni Nebayot,b
yonin na si Mahalat,
og bataꞌ nog bapaꞌ in.
Miktoginop si Yaꞌkub sog Bonuwa Betel
10 Na minawaꞌ si Yaꞌkub sog Berseba,
bangka yanin angoy sog Haran.
11 Dangan simindop na og gondow,
minatong yanin sok solobuk bonuwa,
na dituꞌ yanin migulabung.
Minalap yanin solobuk batu,
bu inimungin nog gulunan bangka yanin tulug.
12 Doksuꞌ miktoginop yanin nog ongon og gugdan tidu sog lupaꞌ nong mikodopot sog langit,
bu mitongowin ong mga malaikat nok Tuhan mikponog-monek tidu sog gugdan koyon.
13 Mitongowin sop ok Tuhan minindog sok tas nog gugdan,
bangka yanin taluoy,
“Akon ok Pogbayaꞌ-bayaꞌ,
ok Tuhan nog gomboꞌ nu Ibrahim bu gommaꞌ nu Isahak.
Bogoyon ku dinika bu song mga ponupuꞌ nu og bonuwa nok pigbolilidan nu koyon.
14 Podakolon ku ong mga ponupuꞌ nu,
mamaꞌ nog dakol nog bogombun sog lupaꞌ,
bu mokanat ilon sog dunya.
Bu tidu dinika bug mga ponupuꞌ nu,
kobarakatan og lam nok pangkatan sog dunya.
15 Diyon ku da dinika,
bu ponondingan ku ika bisan ayin-ayin ka posunguꞌ.
Oyiton ku ika mokpuliꞌ sog bonuwa kini.
Diꞌ u ika potiyangan,
sampoy song mounut og janjiꞌ u dinika.”
16 Dadi mikotanud si Yaꞌkub,
bangka poktaluꞌ,
“Motud tokodoy nog dini ok Tuhan sog bonuwa kini,
bu ugatu pa kosunoy.”
17 Kiondokan yanin bu miktaluꞌ,
“Mokosobuꞌ-sobuꞌ og bonuwa kini,
pogonongan ma saan kini nok Tuhan,
bu mamaꞌ nog dini og bongowan posunguꞌ sog langit.”
18 Dadi migbuwat si Yaꞌkub nok subu-subu,
bu inalapin og batu nog inimungin nog gulunan bangka nin pindogoy.
Doksuꞌ tinuyunganin nog lana og dibabowin bagun moimung nok pomondoman para sok Tuhan.
19 Na iningalananin og bonuwa koyon nog Betel.c
Sugaid tagnaꞌ,
ong ngalan nog bonuwa koyon Lus.
20 Doksuꞌ simapa si Yaꞌkub bu miktaluꞌ,
“Bilaꞌ molani ok Tuhan dinakon bu ipatonin akon sok panowu kini,
bu bogoyanin akon nok kan bug ponapot
21 bagun ku mokopuliꞌ sog baloy nog gommaꞌ u nog diꞌ u da mogmula, sapahan ku nok sumbahon ku ok Tuhan Pogbayaꞌ-bayaꞌ.
22 Dadi U Tuhan,
og batu nok piindogu kini,
yonin na ok poksumbahan posunguꞌ dinika,
bu og lam nog bogoyon nu dinakon,
jakatan ku para dinika.”