Ponognaan 27

Og Barakat nok para bosiya ni Esaw Mokangoy ni Yaꞌkub

Dangan gimulang na si , bu molamong na tokodoy ok ponontongin, pitawagin og bataꞌ in nog gulang bataꞌ nok si Esaw, taluꞌ in, “Toꞌ.” Ok tabal ni Esaw, “Olo Ommaꞌ?” 2 Miktaluꞌ si Isahak, “Mogulangu na, diꞌ u na bayuꞌ mobon sog dunya. 3 Dadi alap nu ok panaꞌ nu, bangka a angoy ponganup sog gulangan para dinakon. 4 Doksuꞌ usibaꞌ nu mahatul bagun mobais ong nanamin, mamaꞌ nok kolegan ku tokodoy kituꞌ kanon. Tubus oyit nu dini dinakon, poꞌ pongoni-ngonihan ku ika nog barakat sog diꞌ u pa matoy.”

5 Soliyan ni Isahak moktaluꞌ ni Esaw, minginongog si Ribeka. Dangan minangoy na si Esaw sog gulangan monganup, 6 tinaluan ni Ribeka og bataꞌ in nok si Yaꞌkub, “Midongogu ok paduhan nog gommaꞌ nu dituꞌ ni Esaw. 7 Sinuguꞌ in si Esaw monganup bu usibaon mahatul bagun mobais ong nanamin, poꞌ pongoni-ngonihanin si Esaw nok kobaisan sok Tuhan sog diꞌ pa yanin matoy.” 8 Tinaluan pa ni Ribeka si Yaꞌkub, “Dadi Toꞌ, tombaoy nu olo-olo ok taluon ku dinika. 9 Angoya dituꞌ song mga potubuon ta nong mga binatang. Pogoyita dini duwaꞌ buk bataꞌ nok kambing nong mokosubuk, bagun kousibaan ku og gommaꞌ nu nong mobais ong nanamin mamaꞌ nok koleganin kanon. 10 Doksuꞌ oyit nu dituꞌ diyanin, bagun pongoni-ngonihanin ika nok kobaisan tidu sok Tuhan sog diꞌ pa yanin matoy.” 11 Sugaid tinaluan ni Yaꞌkub og ginaꞌ in, “Si Esaw bolohibuhon nok tow, bu akon molonuꞌ ok pomanitu. 12 Insunoy kimalon ku ni Ommaꞌ, na kosunanin nog inakkalan ku yanin. Dadi suknaanin tibuwa akon og gantiꞌ nok pongoni-ngoni nok kobaisan.” 13 Na tinaluan yanin nog ginaꞌ in, “Toꞌ, sogaran na akon da ong mosugat bilaꞌ suknaanin ika. Tombaꞌ a hadja sok taluꞌ u, bu angoya na alap nok kambing.”

14 Dadi minalap si Yaꞌkub nog duwaꞌ buk kambing, bangka nin oyitoy sog ginaꞌ in. Inusibaꞌ na ni Ribeka nong mosarap mamaꞌ nok kolegan ni Isahak kuman. 15 Doksuꞌ inalap ni Ribeka ok kinobaisan nok ponapot ni Esaw nong mitaguꞌ sog , bangka nin posolugoy ni Yaꞌkub, og bataꞌ in nong mongud. 16 Pagga molonuꞌ ok komot bug tingkuguꞌ ni Yaꞌkub, binotanganin nok panit nong mga kambing koyon. 17 Tubus binogoyin ni Yaꞌkub ok sodaan nong mobais ong nanamin bu ok pan nok pilutuꞌ in.

18 Na inoyit na ni Yaꞌkub dituꞌ sog gommaꞌ in, taluꞌ in, “Ommaꞌ.” Tinumabal si Isahak, “Kini u da. Sima a, Toꞌ?” 19 Ok tabal ni Yaꞌkub, “Akon si Esaw og bataꞌ nu nog gulang bataꞌ, miinangu na ok suguan nu dinakon. Pogbuwata busung-busung bangka a kan nok pinganupan ku bagun pongoni-ngonihan nu akon nok kobaisan tidu sok Tuhan.” 20 Miktaluꞌ si Isahak sog bataꞌ in, “Uy, modaliꞌ a ma kopiya pokalap, Toꞌ!” Tinumabal yanin, “Oo Ommaꞌ, poꞌ tinabangan ku nok Pogbayaꞌ-bayaꞌ, ok Tuhan nu.” 21 Taluꞌ ni Isahak dituꞌ ni Yaꞌkub, “Pokpolani a bagun ku ika mokimal bug ika taꞌ dodaꞌ si Esaw.” 22 Dadi mikpolani si Yaꞌkub bangka yanin kimaloy nog gommaꞌ in. Ok taluꞌ ni Isahak, “Ok tingog nu mamaꞌ nok tingog ni Yaꞌkub, sugaid ok komot nu mamaꞌ nok komot ni Esaw.” 23 Ondaꞌ kilalahoy ni Isahak si Yaꞌkub, poꞌ ok komotin bolohibuhon mamaꞌ nong ni Esaw. Sog daꞌ in pa pongoni-ngonihoy si Yaꞌkub nok kobaisan, 24 miksak pa tokodoy yanin, “Ika da taꞌ tokodoy og bataꞌ u nok si Esaw?” Tinumabal si Yaꞌkub, “Oo Ommaꞌ, akon.” 25 Taluꞌ ni Isahak, “Oyit nu dini ok pinganupan nu nog inusibaꞌ nu, poꞌ doksuꞌ u kuman, pongoni-ngonihan ku ika nok kobaisan sok Tuhan.” Na binogoyan na ni Yaꞌkub nok sodaan bug , bangka na yanin kan bu inum. 26 Doksuꞌ tinaluan ni Isahak si Yaꞌkub, “Toꞌ, pokpolani a nakon bangka nu akon alokoy.” 27 Na mikpolani si Yaꞌkub diyanin bangka nin alokoy. Na misapu ni Isahak ok sapu nok ponapotin, dadi pingoni-ngonihanin nok kobaisan si Yaꞌkub, taluꞌ in, “Ok sapu nog bataꞌ u kini mamaꞌ nok sapu nog lupaꞌ nog binarakatan nok Tuhan. 28 Bung mayan bogoyan ka da nong mosubuk nog lupaꞌ bu sigi-sigi kotonugan, bagun ka songkuan nong modakol nok kan bug tubig anggul nog bogu.

29 Bung mayan tolagadan ka nong mga tow, bu mokpobabaꞌ dinika ong mga bangsa.

Bung mayan pogbayaan nu ong mga lahasiyaꞌ nu, bu tumombaꞌ dinika ong mga gilug nu.

Bung mayan siksaon nok Tuhan ong mga tow nok sumuknaꞌ dinika, bu barakatanin ong mga tow nong mokpobais dinika.”

30 Dangan kipongoni-ngonihan na si Yaꞌkub nok kobaisan, linumuwas na yanin. Agon-agon ilon moksaut ni Esaw nok tidu monganup. 31 Migusibaꞌ mogdayun si Esaw nok sodaan nong mobais ong nanamin, bangka nin na oyitoy sog gommaꞌ in, taluꞌ in, “Ommaꞌ pogbuwata pa busung-busung. Kan ka nok pinganupan ku bagun nu akon pongoni-ngonihoy nog barakat sok Tuhan.” 32 Na sinakan yanin ni Isahak, “Sima a koyon?” Tinumabal yanin, “Akon si Esaw, og bataꞌ nu nog gulang bataꞌ.” 33 Na mingongkog tokodoy og lawas ni Isahak, bu miktaluꞌ yanin, “Sima buwan ong minganup kituꞌ, bu inoyitanin akon nok kan? Bogu u pa tanan kodoksuꞌ kuman dun. Pingoni-ngonihan ku na yanin nog barakat sok Tuhan, bu diꞌ u na mobawiꞌ ok pingoni-ngoni u.” 34 Dangan midongog ni Esaw ok taluꞌ nog gommaꞌ in, miggunggul-unggul yanin mogaduy kobalan nok sakit-atoyin. Taluꞌ in, “Akon sooy, Ommaꞌ, pongoni-ngonihan nu akon sok Tuhan nog barakat.” 35 Tinumabal si Isahak, “Inakkalan ku nong mongud nu, bu mialapin na og barakat nok para bosiya dinika.” 36 Miktaluꞌ si Esaw, “Daitan da sop yanin ingalanan nog Yaꞌkub, poꞌ duwaꞌ kali nin na akon akkaloy. Tagnaꞌ inalapin ok kopatutu nog gulang bataꞌ, bu ningkomun inalapin na sop og barakat tidu sok Tuhan nok para bosiya dinakon. Daꞌdun na taꞌ ok samaꞌ nog barakat kituꞌ para dinakon?” 37 Ok tabal ni Isahak, “Inimungu na yanin nok kounutan nu, bu inimungu ok kotanan nog lahasiyaꞌ in nok sosuguonin. Mibogoyu diyanin ong modakol nok kan bug moinum. Na olo ong moinangu dinika, Toꞌ?” 38 Miktaluꞌ si Esaw, “Ommaꞌ, solobuk da taꞌ og barakat nog binogoy dinika nok Tuhan? Pongoni-ngonihan nu sop akon!” Doksuꞌ migaduy na sop yanin. 39 Dadi tinumabal si Isahak diyanin, “Kanaꞌ mosubuk og lupaꞌ nok pogonongan nu bu molayuꞌ a song namug nok tidu sog langit. 40 Ok kotubuꞌ-tubuan nu biyan sok kalis, bu kopogbayaan ka nong mongud nu. Sugaid ongon da gondow nok sumaggaꞌ a diyanin, bu mokawaꞌ a tidu sok kongkomanin.”

41 Na milingit si Esaw ni Yaꞌkub, pasal sog barakat nok pingoni-ngoni nog gommaꞌ in. Sog diyalom atoy ni Esaw, “Posunguꞌ na matoy si Ommaꞌ, dadi bilaꞌ daꞌ na yanin diya, patoyon ku si Yaꞌkub.”

42 Na ongon ong mikoposun ni Ribeka pasal song mipikil ni Esaw. Dadi tinawagin si Yaꞌkub bangka nin taluoy, “Miksipi og gulang bataꞌ nu nok patoyonin ika bagun kulian ok sakit-atoyin. 43 Dadi poginongoga nok taluꞌ u. Polaguya dituꞌ sog gilugu nok si Laban, sog bonuwa Haran. 44 Dituꞌ a soliyan pogonong diyanin toktob song mawaꞌ og lingit nok kakaꞌ nu pasal sog ininang nu diyanin. 45 Bilaꞌ tumigdow na ok pongatoyanin, tugunon ku dona ika bagun ka mokuliꞌ dini. Angoya na dituꞌ poꞌ diꞌ u kosandalan nong mogdongan amu duwaꞌ kobolong dinakon.”

46 Tubus miktaluꞌ si Ribeka ni Isahak, “Mitonopu na song mga libun ni Esaw nog bangsa Hit koyon. Bilaꞌ mokopoglibun da sop si Yaꞌkub nog bangsa Hit, golomu pa matoy.”