Ponognaan 26

Ok Pogonong ni sog Gerar

Na og bonuwa nok bug ayin migonong si Isahak, dinatongan na puliꞌ nok ponggutom, mamaꞌ nog gutom song masa ni tagnaꞌ. Dadi minangoy si Isahak dituꞌ ni Abimelek, ok Sultan sok Pilistin sog bonuwa Gerar. 2 Mikpotongow ok Tuhan diyon ni Isahak, ok taluꞌ in, “Diꞌ a mangoy song . Pogononga sog bonuwa nok tonduon ku dinika. 3 Pogononga soliyan sog bonuwa kini. Diꞌ u ika potiyangan, bu barakatan ku ika. Bogoyon ku ong mga bonuwa kini dinika bu song mga ponupuꞌ nu. Bologbogan ku tokodoy og janjiꞌ u sog gommaꞌ nu nok si Ibrahim. 4 Podakolon ku ok ponupuꞌ nu mamaꞌ nog dakol nog bitun sok tas langit, bu bogoyon ku og lam nog bonuwa kini song mga ponupuꞌ nu. Bu tidu dinilon, barakatan ku og lam nog bangsa sog dunya. 5 Inangon ku kini poꞌ tinumombaꞌ si Ibrahim dinakon. Inunutin og lam nok suguan bug pisampoyu.”

6 Dadi migonong si Isahak sog Gerar. 7 Na sinakan yanin nong mga kolakihan diyon bug sima og libun nog duma nin koyon, ok tabalin, “Og gilugu.” Mondok saan yanin mangkon nog libunin, poꞌ baluꞌ in dun, bunuon yanin nong mga tow diyon bagun moalap nilon si Ribeka, poꞌ molingkat yanin. 8 Dangan miobon-obon ilon migonong sog Gerar, ongon solobuk gondow minomboan ok Sultan nok Pilistin nok si Abimelek. Na mitongowin si Isahak kimokop ni Ribeka.

9 Dadi pitawag ni Abimelek si Isahak, taluꞌ in, “Manu tinaluan nu ma ami nog gilug nu yanin? Sokaliꞌ og libun nu ma saan.” Tinumabal si Isahak, “Miondoku saan, poꞌ baluꞌ u dun, patoyon niyu akon sabap diyanin.” 10 Taluꞌ ni Abimelek, “Manu ininang nu ma kini? Na bilaꞌ soupama ongon sok piktowan ku nong mokotogbing diyanin, na mogdusa ami bosiya sabap dinika.” 11 Doksuꞌ tinaluan ni Abimelek og lam nok piktowanin, taluꞌ in, “Sima-sima ong monginang nong molaton sog laki kini bu sog libunin, og hukumanin sumboy yanin patoyon.”

12 Na migimula si Isahak sog bonuwa koyon, bu sinongkuan yanin. Ok sopun, sogatus og bunga nin, poꞌ binarakatan yanin nok Tuhan. 13 Dadi miksidakol og gartaꞌ in, bu miimung na yanin nok tow dayahan. 14 Dangan miksidakol na ong mga bilibili nin, kambing, sapiꞌ bu modakol pa ok sosuguonin, na miima diyanin ong mga tow Pilistin. 15 Na dinungmaan nilon na nog lupaꞌ ong mga timbaꞌ nok kinukut nong mga nog gommaꞌ in nok si Ibrahim song masa nin pa totubuꞌ. 16 Na tinaluan ni Abimelek si Isahak, taluꞌ in, “Poglalin amu na sog len bonuwa, poꞌ mopagas amu pa tidu dinami.”

17 Na minawaꞌ na siloꞌ Isahak, bu migonong ilon sok kopatagan nog Gerar. 18 Pikukutanin mokpuliꞌ ong mga timbaꞌ nog gommaꞌ in nog dinungmaan nong mga Pilistin pokpatoy ni Ibrahim. Iningalanan ni Isahak ong mga timbaꞌ mamaꞌ da sop nok koingalan nog gommaꞌ in dun. 19 Tubus mikkukut ong mga sosuguon ni Isahak nog bogu timbaꞌ, bu mikobalak ilon nok tubud. 20 Sugaid sinuwal ong mga mogogipat nok potubuon ni Isahak nong mga tow Gerar, og asal mogogipat nok potubuon diyon. Taluꞌ nong mga tow Gerar, “Nami ok timbaꞌ koyon.” Saan na iningalanan ni Isahak ok timbaꞌ koyon nog Esek, ong maana nin poksuwal, poꞌ sinuwal sop yanin nong mga tow Gerar.

21 Na mikkukut ilon mokpuliꞌ nog len timbaꞌ, sugaid sinuwal da sop ilon nong mga tow Gerar. Saan na iningalanan ni Isahak nok Sitna, ong maana nin poksaggaꞌ. 22 Dadi minawaꞌ siloꞌ Isahak dituꞌ bangka ilon pokkukut nog len timbaꞌ, bu daꞌdun na ong minuwal, saan na iningalananin ok timbaꞌ koyon nog Rehobot, ong maana nin koluhayahan. Poꞌ taluꞌ in, “Binogoyan ita na nok Tuhan nok koluhayahan, bu mokkodakol ita na dini.”

23 Miglandan na sop ilon posunguꞌ sog bonuwa nog Berseba. 24 Sog gobi niyon, mikpotongow ok Tuhan diyon ni Isahak, bangka poktaluꞌ, “Akon ok Tuhan nog gommaꞌ nu nok si Ibrahim. Ondiꞌ a mondok, poꞌ diꞌ u ika potiyangan. Barakatan ku ika, bu podakolon ku ong mga ponupuꞌ nu sabap sog gulipon ku nok si Ibrahim.”

25 Dadi migimung si Isahak nok diyon, bu sinumabbut yanin song ngalan nok Tuhan bangka nin pudjihoy. Mikpotindog yanin nog lokow-lokowin diyon, bangka na sop pokkukut nog len timbaꞌ ong mga sosuguonin.

Ok Pokpasadan ni bu ni Sultan Abimelek

26 Na ongon og gondow minangoy si Abimelek dituꞌ ni Isahak tidu sog Gerar. Og duma nin si Ahusat ong mokpopituwa dun, bu si Pikol, ok kounutan nong mga sundalu nin. 27 Miktaluꞌ si Isahak dinilon, “Manu minangoy amu ma dini dinakon? Kanaꞌ taꞌ nong milingit amu dinakon saan na piawaꞌ niyu akon sog bonuwa niyu?” 28 Ok tabal nilon, “Kiosunan nami nok tinabangan ka nok Tuhan, dadi mipikil nami nong mogimung ita nok pokpasadan nok poksapahan ta. 29 Na sapa a nog ondiꞌ nu ami olohon, poꞌ daꞌ nami da sop amu olohoy. Pibaisan nami amu, bu pipolayuꞌ nami amu nong mosannang. Motampal nog binarakatan ka nok Tuhan.”

30 Doksuꞌ niyon, jinamuhan ilon ni Isahak, bangka ilon kan bu inum. 31 Pogdoliꞌ-ondow, miksinapahoy na ilon, doksuꞌ pigonat na ilon ni Isahak nong mosannang.

32 Na sog gondow nituꞌ tinaluan si Isahak nong mga sosuguonin nok pasal sok timbaꞌ nok kinukut nilon. Taluꞌ nilon, “Mikobalak ami nok tubig.” 33 Dadi iningalanan ni Isahak ok timbaꞌ koyon nok Seba, ong maana nin poksapahan, saan na sampoy ningkomun iningalanan og bonuwa koyon nog Berseba, ong maana nin ok timbaꞌ nok poksapahan.

Ok Poglibun ni Esaw

34 Dangan migumul si Esaw pat puluꞌ tahun, miglibun yanin ni Yehudit og bataꞌ ni Beri, og bangsa Hit, bu si Basemat og bataꞌ ni Elon, og bangsa Hit da sop. 35 Og duwaꞌ kotow kini, mogbogoy hadja nok kosusahan ni bu ni Ribeka.