Sãga seewa jarapataarã k'awadai
4
1 Âpemaarã k'iniarã, na p'ek'au eujãde seewa–idaa beerã chok'ara paraa. Mãùrãpa “Tai Tachi Ak'õre Ûraa jarateepataarãda” apata mîda, ijãanáatù ãchia jara p'anù. Pia ûridaipia bù jõmaarãpa jaramaa p'anù, k'awaadait'ee wãara jara p'anù Tachi Ak'õrepa jarapi bùk'a wa mãga–e. 2 Parãpa k'awaadai chisãgà eperãpa wãara jara bù Tachi Ak'õre Jaurepa jarapi bùk'a. Chi jara bùpa: “Jesucristo eperã jîp'aak'a na p'ek'au eujãde ba cheji” jara bù Tachi Ak'õre Jaurepa jarapi bùk'a, wãara Cristode ijãapari perã. 3 Mamîda chi mãga jara–e bùpa p'oyaa jara–e Tachi Ak'õre Jaurepa jarapi bùk'a, mãgà eperãpa ijãak'aa perã Jesús, Cristo paji. Anticristo na p'ek'au eujãde bada paara, mãgà pedeeparik'a pedeek'aji. Parãpa k'awa p'anù iru cheit'ee t'êepai. Mamîda nãgaweda iru jîak'aarã na p'ek'au eujãde paraa.4 Warrarã, parã Tachi Ak'õredeerã. Mapa parãpa oodak'aa mãgà seewa–idaa beerãpa jara p'anùk'a. Parãpa ãchi mãgá p'oyaadai chi parã ome bapari, Tachi Ak'õre waibùara bairã chi na eujãdepema ijãadak'aa beerã ome bapari, Netuara Poro Waibùa k'ãyaara. 5 Ãchi mãik'aapa jõmaweda na p'ek'au eujãdepema ijãadak'aa beerã Netuara Poro Waibùa jua ek'ari p'anapata. Maperã na p'ek'au eujãdepema k'îsia k'îra t'ãdoo jara wãdak'ãri, awaraarãpa ma seewa ûripata mãik'aapa aùde ijãapata. 6 Mamîda mãga–e tai ome, tai Tachi Ak'õredeerã perã. Taipa wãarata jarateepata Tachi Ak'õre Jaurepa jarapi bùk'a. Mapa chi Tachi Ak'õre k'awa beerãpa ûri k'inia p'anapata taipa jarapata. Mamîda chi Tachi Ak'õre k'awa–e#e beerãpa ûri k'iniadak'aa taipa jarateepata. Ãchia ûri k'inia p'anù seewa jarateepataarã, Netuara Poro Waibùapa jarapi bùk'a. Nãga k'awaadai chisãgà wãarata jarateepataarã mãik'aapa chisãgà seewa jarateepataarã. Tachi Ak'õre k'awa beerãpa wãarata jarateepataarã ûri k'inia p'anapata. Jõdee Tachi Ak'õre k'awa–e#e beerãpa seewa jarateepataarã ûri k'inia p'anapata.
Tachi Ak'õrepa eperãarã jõmaweda k'inia iru bapari
7 Âpemaarã k'iniarã, chik'inia p'anapataadáma, Tachi Ak'õrepa mãga oopi bairã. Jõmaarãpa awaraarã k'inia iru p'anapata mãgá p'anapataadai, Tachi Ak'õre warrarã perã mãik'aapa Tachi Ak'õre k'awa p'anapata perã. 8 Chi awaraarã k'inia–e bùpa Tachi Ak'õre k'awa–e bù, Tachi Ak'õrepa jõmaarã k'inia iru bapari perã. 9 Nãgá Tachi Ak'õrepa unupiji tachi audú k'inia iru bapari. Na p'ek'au eujãdee pëiji ichi Warra apai iru bada, mãgà k'aurepa tachi ichita p'anapataadamerã iru ome. 10 Tachi Ak'õrepa ichi Warra mãgá pëik'ãri, ak'ùpiji tachi wãara k'inia iru bapari. Tachia iru mãgá k'iniada–e paji. Iruata tachi k'inia iru baji. Mapa ichi Warra pëiji piumerã tachia p'ek'au k'achia oopata wêpapiit'ee.
11 Âpemaarã k'iniarã, Tachi Ak'õrepa tachi mãgá audú k'inia iru bapari perã, tachi jida chik'inia p'anapataadaipia bù. 12 Apidaapa Tachi Ak'õre k'îra unuda–e p'anù. Mamîda tachi chik'inia p'anaruta pùrã, t'ãri a–ba p'anapataadait'ee Tachi Ak'õre ome. Mãgá tachi k'ap'ùa pari irua jõmaarãmaa unupiit'ee wãara irua ãra jida k'inia iru bapari. 13 Nãga k'awa p'anù tachi t'ãri a–ba p'anapata Tachi Ak'õre ome. Irua ichi Jaure pëiji tachi ome bapariimerã. 14 Ma awara taipa Tachi Ak'õre Warra bapata unujida tachi taupa. Mapa jõmaarãmaa nãga nepùrùpata: Tachi Ak'õrepa ichi Warra pëiji na p'ek'au eujãdepemaarã o k'achiadeepa k'aripa atade. 15 Mapa chi jara bùpa Jesús Tachi Ak'õre Warra t'ãri a–ba bapari Tachi Ak'õre ome.
16 Mãgá tachia Tachi Ak'õre k'awa p'anù mãik'aapa ijãa p'anù irua tachi k'inia iru bapari. Tachi Ak'õrepa eperãarã jõmaweda k'inia iru bapari perã, eperãpa auk'a Tachi Ak'õre k'inia iru bak'ãri, t'ãri a–ba bapari iru ome. 17 Tachia Tachi Ak'õre mãgá k'inia iru p'anadak'ãri, oomaa p'anù irua k'inia bùk'a. Irua k'inia bù waawee–ee p'anadamerã ichi k'îrapite, ichi ewari waibùa ewate pak'ãri. Wãara ma ewate mãga p'anadait'ee, na p'ek'au eujãde p'anù misa iru ome t'ãri a–ba p'anapata perã, Jesucristo iru ome t'ãri a–ba baparik'a. 18 Wãara Tachi Ak'õre k'inia iru baparipa maarepida waawee–ee bapari, k'awa bairã Tachi Ak'õrepa iru auk'a k'inia iru bapari mãik'aapa maarepida iru k'achia oo–e pait'ee. Mamîda chi waide mãga k'awa–e bùpa Tachi Ak'õre waawee bapari, k'îsia bairã Tachi Ak'õrepa ichi k'achia ooi. Mapa tachia nãga k'awadai. Eperã abaapa waawee bù pùrã Tachi Ak'õrepa iru k'achia ooit'ee, ma eperãpa waide pia k'awa–e bù Tachi Ak'õrepa iru audú k'inia iru bapari.
19 Tachia Tachi Ak'õre k'inia iru p'anù, irua naapùara tachi k'inia iru bada perã. 20 Tachidepemapa jarai ichia Tachi Ak'õre k'inia iru bapari. Mãga jara bù mîda, ichi t'ãride chi âpema Cristo k'aurepa unuamaa iru bù pùrã, mãgà eperã seewamaa bù. Ichi âpema unu bùta k'inia–e bù pùrã, ¿sãga k'inia iru bai Tachi Ak'õre, unu–e bùta? 21 Maperãpù Jesucristopa jaraji chi Tachi Ak'õre k'inia iru bùpa ichi âpemaarã Cristo k'aurepa auk'a k'inia iru baipia bù.