Tachi Ak'õre warrarã
3
1 ¡K'îsíatù! Tachi Ak'õrepa tachi audú k'inia iru bapari perã, jarapari tachi ichi warrarã. ¡Wãarapù! Mamîda na p'ek'au eujãdepema ijãadak'aa beerãpa mãga p'oyaa k'awada–e, wãara Tachi Ak'õre k'awadak'aa perã.2 Âpemaarã k'iniarã, ârá tachi wãara Tachi Ak'õre warrarã. Mamîda waide k'awada–e sãga p'anadai Cristo cheda t'êepai. Aba k'awa p'anù Cristo waya chek'ãri, iruk'a p'anadait'ee, iru k'îra wãree k'awadait'ee perã. 3 Tachi jõmaweda mãga k'awa p'anùùrã nùmaa p'anù iru cherumaa. Mapa mãgá nù p'anù misa, ne–inaa k'achia jõmaweda oo amaadaipia bù, iruk'a p'anadait'ee, k'awa p'anadairã iru p'ek'au k'achia wêe bapari.
4 Tachia k'awa p'anù chi ne–inaa k'achia oo bùpa oo–e bù Tachi Ak'õrepa jara bùk'a. Mãga oo–e bak'ãri, k'achiade bù. 5 Parãpa ichiaba k'awa p'anù Jesucristo na p'ek'au eujãdee cheji eperãarãpa p'ek'au k'achia oopata jõmaweda wêpapiit'ee. Irua maarepida k'achia ook'aa paji. 6 Mapa wãara oo k'inia p'anùùrãpa irua oopi bùk'a t'ãri a–ba p'anapata iru ome. Ne–inaa k'achia oo k'iniadak'aa, ichideerã perã. Mamîda chi ne–inaa k'achia oopataarã t'ãri a–ba p'anadak'aa iru ome, irude wãara ijãadak'aa perã mãik'aapa wãara iru k'awadak'aa perã.
7 Warrarã, k'ûrapináatù apida seewapataarãmaa. Chi ooparipa Tachi Ak'õrepa oopi bùk'a t'ãri pia bapari Tachi Ak'õrek'a. 8 Jõdee chi ne–inaa k'achia ooparipa oomaa bù Netuara Poro Waibùapa oopi bùk'a. Tachi Ak'õrepa na p'ek'au eujã oodak'ãriipa, Netuara Poro Waibùapa p'ek'au k'achia k'îra t'ãdoo oopari. Ma–it'ee cheji Tachi Ak'õre Warra na p'ek'au eujãdee: jõpiit'ee Netuara Poro Waibùapa ne–inaa k'achia oopata.
9 Tachi Ak'õre warrarãpa p'ek'au k'achia oo k'iniadak'aa, Tachi Ak'õre Jaure ãchi ome bapari perã. Wãara k'achiade p'oyaa p'anadak'aa, Tachi Ak'õre warrarã perã. 10 Nãga k'awa p'anù chisãgà Tachi Ak'õre warrarã mãik'aapa chisãgà Netuara Poro Waibùa warrarã. Chi oo–e bùpa Tachi Ak'õrepa oopi bùk'a Tachi Ak'õre warra–e. Ma awara chi âpema Cristo k'aurepa k'îra unuamaa iru bùpa Tachi Ak'õre warra–e.
Chik'inia p'anapataadaipia bù
11 Cristode ijãadak'ãriipa parãpa nãga ûridooda: chik'inia p'anapataadaipia bù. 12 Tachia mãga k'awa p'anadairã, oonaadáma Cainpa oodak'a. Ichia ooji Netuara Poro Waibùapa oopidak'a. Chi âpema k'îra unuamaa iru bap'eda, peet'aaji. ¿Sãap'eda mãga ooji? Ichi t'ãri k'achia bapachi. Jõdee chi âpema t'ãri pia bapachi.
13 Maperã âpemaarã, k'îsianáatù na p'ek'au eujãdepema ijãadak'aa beerãpa parã k'îra unuamaa iru p'anadak'ãri. 14 Naaweda tachi jida ãchik'a atuadait'ee paji, Tachi Ak'õrepa jara bùk'a oodak'aa pada perã. Mamîda Cristopa tachi o k'achiadeepa k'aripa ataji, ichita p'anapataadamerã Tachi Ak'õre ome mãik'aapa oopataadamerã irua oopi bùk'a. K'awa p'anù tachia wãara mãga oomaa p'anù, tachi âpemaarã Cristo k'aurepa k'inia iru p'anapata perã. Chi âpemaarã k'îra unuamaa iru p'anapataarã atuadait'ee. 15 Tachi Ak'õre–it'ee eperãpa ichi âpema k'îra unuamaa iru bù pùrã, auk'a bù eperã chîara peepari ome. Parãpa k'awa p'anù chîara peepataarã ùt'aa wãdak'aa. 16 Nãgá k'awa p'anù Tachi Ak'õrepa tachi k'inia iru bapari. Jesucristo piuji tachi pari. Mãga ooji tachi audú k'aripa k'inia bada perã. Mãgá tachia pida tachi âpemaarã Cristo k'aurepa k'aripa k'inia p'anadaipia bù, *ma k'aurepa *piuruta pùjida. 17 Mapa chi net'aa iru bùpa ichi âpema Cristo k'aurepa chupùria nâbù unuru pùrã, mamîda chupùria k'awa–e bù pùrã, ma eperãpa ak'ùpimaa bù ichia Tachi Ak'õre k'inia–e bù. ¿Sãgá ichia Tachi Ak'õre k'inia iru bùda aima, chi âpema Cristo k'aurepa k'aripa–e bù pùrã? 18 Warrarã, pedeepapai tachi âpemaarã k'inia iru p'anadaik'araa bù. Ãra k'aripadaipia bù. Mãgá ooruta pùrã, ak'ùpidai wãara ãra mãik'aapa Tachi Ak'õre k'inia iru p'anù.
Inejasia–ee ùt'aa t'âpataadaipia bù Tachi Ak'õremaa
19 Mãgá tachi âpemaarã k'inia iru p'anadak'ãri, tachia nãgà wãarata k'awaadait'ee. Tachi, Tachi Ak'õredeerã. T'ãride mãga k'awadak'ãri, inejasia–ee ùt'aa t'âpataadait'ee irumaa. 20 Mamîda inejasiadarii tachi t'ãridepai k'îsiaruta pùrã: “Aai, mùa wãara mù âpemaarã Cristo k'aurepa mak'ùara k'aripa–e.” Mãga k'îsiaruta pùrã, k'irãpadaipia bù Tachi Ak'õrepa ne–inaa jõmaweda k'awa bù. Tachi k'ãyaara k'awaara bù tachia wãara oo k'inia p'anù ichi–it'ee. 21 Jõdee, âpemaarã k'iniarã, tachia mãgá k'îsiada–e p'anù pùrã, wãara inejasia–ee ùt'aa t'âpataadait'ee Tachi Ak'õremaa. 22 Ma awara ùt'aa iididak'ãri Tachi Ak'õremaa, irua ooit'ee jõmaweda tachia iidi p'anù. Mãga ooit'ee tachia oopata perã irua jara bùk'a. 23 Tachi Ak'õrepa jara bù tachia nãga oodamerã: Ijãadaipia bù Jesucristo wãara Tachi Ak'õre Warra mãik'aapa chik'inia p'anapataadaipia bù irua jaradak'a. 24 Chi ooparipa Tachi Ak'õrepa jara bùk'a t'ãri a–ba bapari iru ome. Chik'inia p'anapata. Tachia mãga k'awa p'anù Tachi Ak'õre Jaurepa tachimaa mãga k'awapipari perã. Ma–it'ee ichi Jaure pëiji tachi ome bapariimerã.