Cristo Tachi K'aripapari
2
1 Warrarã,a mùa na k'art'a p'ãru parãmaa ne–inaa k'achia oonaadamerã. Mamîda tachia ne–inaa k'achia ooruta pùrã, Tachi K'aripapari iru p'anù irua chupùria iidimerã Tachi Ak'õremaa tachi pari. Mãgà Jesucristo, chi p'ek'au k'achia ook'aa bù. 2 Iru waa bat'ada k'aurepa Tachi Ak'õrepa tachia p'ek'au k'achia oopata wêpapii atuanaadamerã. Wãara tachia p'ek'au k'achia oopata wêpapii. Mamîda mãgapai–e. Ichiaba wêpapii jõmaweda na p'ek'au eujãdepemaarãpa p'ek'au k'achia oopata.3 Tachia k'awadai Tachi Ak'õre wãara k'awa p'anù, iru ûraade jara bùk'a oodak'ãri. 4 Awaraa eperãpa jarai ichia Tachi Ak'õre wãara k'awa bù. Mamîda mãgùpa oo–e bù pùrã Ak'õrepa jara bùk'a, seewamaa bù. K'awa–e bù Tachi Ak'õrepa wãarata jara pëida. 5 Mamîda eperãpa ook'ãri Tachi Ak'õre Ûraade jara bùk'a, Tachi Ak'õre wãara k'inia iru bù mãik'aapa chik'inia bapari iru ome. Nãgá k'awa p'anù tachi, Tachi Ak'õredeerã. 6 Eperãpa jara bù pùrã wãara Tachi Ak'õre k'awa bù, ma eperã baipia bù Jesucristo badak'a.
Juanpa jarada Cristode ijãapataarãpa oodamerã
7 Âpemaarã k'iniarã Cristo k'aurepa, mùa na jararu parãpa oodamerã ârapema–e, parãpa ûridooda perã Cristode ijãadak'ãriipa. Chonaarãweda paara Tachi Ak'õrepa jara pëiji eperãarãpa awaraarã ichiaba k'inia iru p'anapataadamerã. 8 Mamîda na k'art'ade mùa ma jarada chiwidi pùk'a jara bù. Chik'inia p'anapatáatù. Cristo wãara mãga bapachi ichideerã ome. Parãpa pida k'awaa wãda mãga p'anapataadait'ee. Parã Cristode ijãadai naaweda, p'ãriu pùk'a bùde p'anapachida, awaraarã k'iniada–e p'anadap'edaa perã. Mamîda ârá ma p'ãriu pùk'a bùdeepa uchia wãda âdaa pùk'a bùdee.
9 Ma jara aupada wãara mîda, parãdepemapa jarai ichia awaraarã k'inia iru bù Tachi Ak'õrepa jara bùk'a. Mamîda chi âpema Cristo k'aurepa k'îra unuamaa iru bù pùrã, wãara mãga oo–e bù. At'ãri ne–inaa k'achia oomaa bù, p'ãriu pùk'a bùde ook'ajik'a. 10 Jõdee abaapa chi âpema Cristo k'aurepa k'inia iru bak'ãri, mãgùpa wãara oopari Tachi Ak'õrepa jara bùk'a. Wãara mãgà eperã k'achiade baaipi–e. 11 Mamîda ma eperãpa chi âpema Cristo k'aurepa unuamaa iru bù pùrã, ichi k'îradoopa k'achiade bù, oo–e bairã Tachi Ak'õrepa jara bùk'a. Wãara mãgà eperãpa k'awa–e Tachi Ak'õrepa jara bù. Ma awara mãgá ne–inaa k'achia oomaa bairã, p'oyaa oo–e Tachi Ak'õrepa jara bùk'a.
12 Warrarã, mùa parãmaa p'ãru, Jesucristo piuda k'aurepa Tachi Ak'õrepa parãpa p'ek'au k'achia oopata wêpapida perã.
13 Chonaarã, mùa parãmaa p'ãru, parãpa wãara Jesucristo k'awa p'anadairã. Iru bapachi na p'ek'au eujã bai naaweda.
K'ûtrãarã, mùa parãmaa p'ãru, parãpa Netuara Poro Waibùa p'oyaa wãda perã.
14 Warrarã, mùa parãmaa p'ãmaa bù, parãpa Tachi Ak'õre wãara k'awapata perã.
Chonaarã, parãmaa p'ãmaa bù, parãpa wãara k'awapata perã chi na p'ek'au eujã ooi naaweda ichita bapari.
K'ûtrãarã, ichiaba parãmaa p'ãmaa bù, parã Cristode wãara ijãapata perã mãik'aapa oopata perã Tachi Ak'õre Ûraa p'ãdade jara bùk'a. Ma awara parãmaa p'ãmaa bù Netuara Poro Waibùapa oopi bùk'a oodak'aa perã.
15 P'ananáatù na p'ek'au eujãdepema ijãadak'aa beerã p'anapatak'a. Jùrùnáatù ne–inaa k'achia k'îra t'ãdoo na p'ek'au eujãde paraa. Mãga jùrùruta pùrã, chik'inia p'anada–e pai Tachi Ak'õre ome. 16 Mùa mãga jara bù na p'ek'au eujãde tachia unupata perã nãgee ne–inaa k'achia k'îra t'ãdoo: ne–inaa k'achia oo k'inia p'anù tachi t'ãridepai; ne–inaa k'achia unudak'ãri tachi taupa, auk'a oo k'inia p'anù; pedee audua p'anapata ne–inaa iru p'anadairã. Tachi Ak'õrepa mãgee ne–inaa k'achia apida oopik'aa eperãarãmaa. 17 Mãgee ne–inaa mãik'aapa jõma ne–inaa k'achia na p'ek'au eujãdepemaarãpa oo k'inia p'anù jõdaridait'ee. Mamîda chi Tachi Ak'õrepa oopi bùk'a oopataarã ichita p'anapataadait'ee iru ome.
Wãara Cristode ijãapataarãpa k'ûrapida–e<R>seewa jarapataarãmaa
18 Warrarã, taarã–e na p'ek'au eujã jõdariit'ee. Parãpa ûrijida Anticristo cheit'ee. Wãara mãgà jîak'aarã paraa tachi t'ãide. Mapa k'awa p'anù na p'ek'au eujã taarã–e jõdariit'ee. 19 Mãgùùrã tachi t'ãideepa uchiajida Cristode wãara ijãada–e pada perã tachia ijãapatak'a. Wãara mãgá ijãadap'edaa paara, wãda–e pak'aji. Mamîda uchiadak'ãri, unupijida ãchidepema apida Cristode wãara ijãada–e paji.
20 Jõdee parã jõmaweda Cristode wãara ijãa p'anù. Parãpa k'awa p'anù Tachi Ak'õrepa wãarata jara pëida, Jesucristo, chi p'ek'au k'achia wêe bùpa mãga k'awapida perã ichi Jaure pëik'ãri parã ome bapariimerã. 21 Mùa na k'art'a p'ãrupa jara k'inia–e bù parãpa k'awada–e Tachi Ak'õrepa wãarata jara pëida. Jîp'a mùa p'ãmaa bù parãpa k'awa p'anadairã ma wãarata jara pëidade seewa apida unudak'aa, Tachi Ak'õrépata ma wãara jarada perã. 22 Maperã abaapa jara bù pùrã Tachi Ak'õrepa Jesús pëi–e paji eperãarã rey pamerã, mãgà eperã seewamaa bù. Ma eperã Anticristo, jara bairã Jesús Tachi Ak'õre Warra–e mãik'aapa Tachi Ak'õre Jesús Ak'õre–e. 23 Chi mãga jara bùpa wãara Jesucristode ijãa–e bù mãik'aapa Tachi Ak'õre wãara k'awa–e bù. Jõdee chi jara bùpa Jesucristo Tachi Ak'õre Warra, Tachi Ak'õre wãara k'awa bù.
24 Maperã k'irãpátù parãpa naaweda ûridap'edaa, ewaa Cristode ijãadak'ãri. Maapai k'awaajida Tachi Ak'õrepa wãarata jara pëida eperãarãmaa mãik'aapa t'ãripa oo k'inia p'aneejida irua oopi bùk'a. Mãgá oo wãk'ãtù wåtù. Mãga ooruta pùrã, t'ãri a–ba p'anapataadait'ee Tachi Ak'õre ome mãik'aapa ichi Warra Jesucristo ome. 25 Cristopa mãga jara baji, jarak'ãri ichita p'anapataadai Tachi Ak'õre ome.
26 Mùa naa jaradak'a mãgee Cristo k'îra unuamaa iru p'anùùrã tachi t'ãide paraa. Mãgùùrãpa parã k'ûra k'inia p'anù. 27 Mamîda parãpa ûrida–e pait'ee mãgeerãpa jarateepata, Cristopa ichi Jaure pëida perã parã ome bapariimerã. Ma Jaurepa parãmaa ne–inaa wãara jõmaweda jarateepari. Seewa jarateek'aa. Mapa irua jaratee bùk'a oo wãk'ãtù wåtù. Mãgá wãara t'ãri a–ba p'anapataadait'ee Cristo ome.
28 Warrarã, mãgá t'ãri a–ba p'anaruta pùrã Cristo ome, parãpa waaweeda–e pait'ee iru waya chek'ãri na p'ek'au eujãdee. Ma ewate iru k'îrapite k'îra nejasia–ee p'anadait'ee.
29 Parãpa k'awa p'anù Jesucristo, Tachi Ak'õre Warrapa ichita oopari ichi Ak'õrepa jara bùk'a. Ichiaba k'awadaipia bù chi Tachi Ak'õrepa jara bùk'a ooparipa auk'a Tachi Ak'õre warra.