1 SAN JUAN
San Juanpa K'art'a Naapùara P'ãda
Jesucristopa ichi k'ap'ùa eperã k'ap'ùade unupida
1
1 Tai Jesucristo ome nipapatap'edaarãpa nepùrùpata k'aita iru. Mùa na k'art'a p'ã pëiru parãpa pida mãga k'awaadamerã. Na p'ek'au eujã bai naaweda, Tachi Ak'õre Pedeeta bapachi. Mãgà Jesucristo. Iru k'aurépata eperãarã ichita p'anapataadai Tachi Ak'õre ome iru truade. Jesucristo na p'ek'au eujãde nipak'ãri, taipa iru unujida eperã jîp'aak'a. Taipa iru t'õbaijida tachi juapa. Ichiaba ûrijida irua ûraa jarada. 2 Cristo Tachi Ak'õre ome ichita bapachi mîda, tai ârapemaarãmaa eperã k'ap'ùade unupiji. Irua Tachi Ak'õre Ûraa jarateepachi eperãarãmaa, ma ûraa ijãadap'eda ichita p'anapataadamerã iru ome Tachi Ak'õre truade. Cheji na p'ek'au eujãdee. Taipa unujida irua ooda mãik'aapa jõmaarãmaa ma ooda nepùrùpata. 3 Parãmaa jarapata taipa unudap'edaa mãik'aapa taipa ûridap'edaa, parãpa mãga k'awaadap'eda, araa p'anapataadamerã tai ome, tai araa p'anapatak'a Tachi Ak'õre ome mãik'aapa iru Warra Jesucristo ome. 4 Tachi jõmaarãta mãga p'anapataadak'ãri, wãara o–îa p'anadait'ee. Ma–it'eeta mùa parãmaa na k'art'a p'ãmaa bù.Tachi Ak'õre âdaa pùk'a bù
5 Jesucristo k'ap'ùa pari Tachi Ak'õrepa taimaa nãga jara pëiji. Tachi Ak'õre âdaa pùk'a bù. Âdaade maarepida p'ãriu unuda–e p'anùk'a, mãga pùk'a Tachi Ak'õrede maarepida k'achia unuda–e. 6 Tachidepemapa jarai ichi araa bapari Tachi Ak'õre ome. Mamîda ma eperãpa at'ãri ne–inaa k'achia oomaa bù pùrã, seewamaa bù. Ichia oo–e bù Tachi Ak'õrepa wãarata jara pëidak'a. 7 Mamîda eperã wãara âdaa pùk'a bùde bapari pùrã Tachi Ak'õrepa k'inia bùk'a, araa bapariit'ee Tachi Ak'õre ome mãik'aapa awaraa ijãapataarã ome. Ma awara Tachi Ak'õrepa ma eperã p'ek'au k'achia jõmaweda wêpapiit'ee, iru Warra Jesús waa bat'ada k'aurepa.
8 Tachidepemapa jararu pùrã ichi t'ãride k'îsia k'achia wêe bù, ichi itu k'ûramaa bù, seewamaa bairã. Mãgùpa k'awa–e bù Tachi Ak'õrepa wãarata jara pëida. 9 Mamîda mãgùpa ichia p'ek'au k'achia oopata jõmaweda jararu pùrã Tachi Ak'õremaa, tachi t'ãride k'awa p'anù Tachi Ak'õrepa chupùria k'awaait'ee. Ooit'ee ichia jara bùk'a ichi ûraa jara pëidade. Ma eperã p'ek'au k'achia jõmaweda wêpapiit'ee. 10 Mamîda abaapa jararu pùrã ichia ne–inaa k'achia ook'aa, jõmaarãmaa ak'ùpi bù ichia Tachi Ak'õre Ûraade ijãa–e. Mãgà eperãpa k'îsia bù pùrã ichia p'ek'au k'achia ook'aa, mãgara ichiaba k'îsia bù Tachi Ak'õrepa seewa jara bù ichi ûraade.